Vava tuvavanga zaya o muntu, e diambu diantete tukunyuvulanga i diadi: “E nkumbu aku nani?” Avo oyuvuidi e kiuvu kiaki kwa Nzambi, nkia mvutu kekuvana?

‘Mono i Yave. Eyayi i nkumbu ame.’—Yesaya 42:8.

E nkumbu yayi mfunu ina kwa Nzambi. Ke vena muntu ko wamvana e nkumbu yayi, yandi kibeni wasola yo. Yave wavova vo: “Eyayi i nkumbu ame yamu mvu ya mvu, i luyindulu luame lulu yamu tandu ya tandu.” (Luvaiku 3:15) Muna Bibila, e nkumbu a Nzambi ilutidi sadilwa ke mu mazina mandi ko nze, Mpungu-ngolo, Se, Mfumu yovo Nzambi, ilutidi mpe sadilwa ke mu nkumbu zankaka ko nze, Abarayama, Mose, Davidi yovo Yesu. Vana ntandu, Yave ozolele vo e nkumbu andi yazayakana. Nkand’a Nzambi uvovanga vo: ‘Bazaya wo vo nge kaka wina ye nkumbu a Yave, u Mpungu omu nza yawonso.’—Nkunga 83:18.

Yesu watoma sadilanga e nkumbu yayi. Muna sambu kiyikilwanga vo sambu kia Se dieto yovo kia Mfumu eto, Yesu walonga alongoki andi vo basambanga kwa Nzambi mu mvovo emi: “Yambula nkumbu aku yazitiswa.” (Matai 6:9) Yesu yandi kibeni wasamba kwa Nzambi vo: “E Tata, kembesa nkumbu aku.” (Yoane 12:28) O kembela e nkumbu a Nzambi i diau o Yesu kasianga vana fulu kiantete muna zingu kiandi. Muna kuma kiaki, wasamba vo: “Yabazayisa e nkumbu aku, izayisa yo mpe.”—Yoane 17:26.

E nkumbu yayi mfunu ina kw’awana bazeye Nzambi. Kuna nz’ankulu, o nkangu a Nzambi wabakula vo lutaninu ye luvuluzu lwau ngwizani lwakala ye nkumbu a Nzambi. “E nkumbu a Yave, nzo ezulu angolo. O nsongi otinina mo, ovulukidi.” (Ngana 18:10) “Konso on’ovovelela nkumbu a Yave,  ovuluka.” (Yoele 2:32) Nkand’a Nzambi usonganga vo e nkumbu a Nzambi yadi swaswanesa awana bekunsadilanga. ‘Kadi nkangu miawonso midiata konso muntu muna nkumbu a nzambi andi, kansi yeto tudiatila muna nkumbu a Yave wa Nzambi eto yakwele mvu.’—Mika 4:5; Mavangu 15:14.

I nkumbu isunzulanga Nzambi. Ndonga muna akwa ngangu bevovanga vo e nkumbu a Yave ina ye nsasa vo: “Ona okadisanga.” Yave wa Nzambi wasonga e nsas’a nkumbu andi vava kakiyikila muna mvovo miami miasonekwa kwa Mose vo: ‘Omono Ikituka Konso una Nzolele Kituka.’ (Luvaiku 3:14) Ozevo, e nkumbu yayi mayingi isonganga, ke mu sia kaka ko vo yandi i Mvangi a lekwa yawonso. E nkumbu andi isonganga e ngangu zandi za kuyikitula yo kitula nsem’andi konso una kazolele muna lungisa e kani diandi. Ekolo mazina ma Nzambi mesonganga e fulu, wisa yovo nkum’andi, e nkumbu andi, Yave, yau kaka isunzulanga una kena ye una kalenda kituka.

E nkumbu a Nzambi isonganga vo okutuvuanga kikilu o mfunu. E nsas’a nkumbu a Nzambi isonganga o zola kwandi muna nsem’andi kumosi yo yeto. Wau vo Nzambi wazayisa e nkumbu andi, ediadi disongele vo ozolele twanzaya. Vana ntandu, Nzambi watuzayisa e nkumbu andi vitila nkutu twanyuvula yo. Kieleka, o Nzambi ozolele vo twanzaya ke nze nzambi ampimpita ko ona una kwandá, kansi nze Muntu akieleka ona tulenda finama.—Nkunga 73:28.

O sadila e nkumbu a Nzambi disonganga vo mfunu tukumvuanga. Muna bonga e nona, olenda lomba kwa muntu ozolele vanga yandi kikundi vo kabokelelanga muna nkumbu aku. Aweyi wadi mona kele vo muntu ndioyu nkumbu miayingi ke kubokelelanga mu nkumbu aku ko? Kuna kulanda, nanga okukiyuvula kana vo muntu ndioyu ozolele kikilu kala nkundi aku. Diau dimosi mpe yo Nzambi. Yave ozayisanga nkumbu andi kwa wantu yo kutukasakesa twasadilanga yo. Vava tuvanganga wo, tusonganga kwa Yave vo tuzolele kala ye ngwizani ambote yo yandi. Nzambi osianga sungididi kana nkutu kw’awana “bebadikanga [yovo lunda] nkumbu andi.”—Malaki 3:16.

O longoka e nkumbu a Nzambi i diambu diantete tufwete vanga muna kunzaya. Kansi, ke diau kaka ko. Tufwete zaya kana nkia mpila muntu kena ye fu yandi.