Ludi mu Kuma kia Nzambi yo Kristu

WINIKINA MU

Kanele vo wantu nzambi zayingi besambilanga, kansi vena ye Nzambi mosi kaka aludi. (Yoane 17:3) Yandi i “Mpungu,” i Mvangi a lekwa yawonso ye Tuku dia mioyo miawonso. Yandi kaka ofwanukini sambilwa.—Daniele 7:18; Lusengomono 4:11.

Nani i Nzambi? Nkumbu a Nzambi Nani?

Nkumbu a Nzambi ina muna sono yankulu TEZO KIA FULU 7.000

YAVE I nkumbu a Nzambi

MFUMU, NZAMBI, SE—Mazina mankaka ma Yave

Nzambi yandi kibeni wavova vo: “Mono i Yave. Eyayi i nkumbu ame.” (Yesaya 42:8) E nkumbu a Nzambi tezo kia fulu 7.000 yasonekwa muna Bibila. Kansi, nsekola zayingi za Bibila zavingisa mazina nze “Mfumu” vana fulu kia nkumbu yayi. Nzambi ozolele vo wakala nkundi andi, muna kuma kiaki okukasakesanga vo ‘wavovelanga e nkumbu andi.’—Nkunga 105:1.

Mazina ma Yave. Bibila kiyikilanga Yave muna mazina nze “Nzambi,” “Mpungu-ngolo,” “Mvangi,” “Se” ye “Mfumu.” Sambu yayingi yasonekwa muna Bibila, awana bavanga yo basadila mazina mandi ye nkumbu andi, Yave.—Daniele 9:4.

Nzambi Aweyi Kena? Nzambi mwanda ulembi monekanga. (Yoane 4:24) Bibila kivovanga vo “ke vena nkutu muntu ko wamona Nzambi.” (Yoane 1:18) Bibila kisonganga una Yave kemonanga. Wantu balenda kunkendeleka yovo ‘kuntwasila kiese.’—Ngana 11:20; Nkunga 78:40, 41.

Fu Yambote ya Nzambi. Nzambi kesianga mpambula ko vana vena wantu a zula yawonso. (Mavangu 10:34, 35) Yandi mpe i Nzambi a “nkenda ye ngemba, ke funganga makasi mu nzaki ko, ozele yo walakazi ye ludi” (Luvaiku 34:6, 7) Kansi, fu yá ya Nzambi itoma yikwanga.

Nkuma. Wau vo yandi i “Nzambi a Mpungu-ngolo,” ovuidi nkuma ulembi tezakana mu lungisa konso nsilu kasidi.—Tuku 17:1.

Ngangu. E ngangu za Nzambi ziviokele ngangu za wantu awonso. Ekiaki i kuma Bibila kivovelanga vo yandi “kaka i nkwa ngangu.”—Roma 16:27.

Unsongi. Nzambi mambu mansongi kaka kevanganga. Mavangu mandi “malunga,” ye “okondelo vilwa.”—Nsiku 32:4.

Zola. Bibila kivovanga vo “Nzambi i zola.” (1 Yoane 4:8) Nzambi ke songanga kaka zola ko, kansi yandi kibeni i zola. O zola kwandi kusundidi, kufilanga mawonso kevanganga ye kukututwasilanga nluta mu mpila zayingi.

Kikundi kia Nzambi yo Wantu. Nzambi i Se dieto dianzodi kuna zulu. (Matai 6:9) Avo tukwikidi muna yandi, tulenda kala akundi andi. (Nkunga 25:14) Ozevo, Nzambi okubokelanga wamfinama muna sambu yo ‘yekeka ntokani zaku zawonso kwa yandi, kadi mfunu kekuvuanga.’—1 Petelo 5:7; Yakobo 4:8.

Nkia Nswaswani ina Vana Vena Nzambi yo Kristu?

Yesu ke Nzambi Ko. Yesu yandi kaka wavangwa kwa yandi kibeni Nzambi. Kiaki i kuma e Bibila kiyikilanga Yesu vo Mwan’a Nzambi. (Yoane 1:14) Vava kavanga Yesu, Yave wasadila mwan’andi antete se “nsadi a ngangu” muna vanga lekwa yawonso yankaka.—Ngana 8:30, 31; Kolosai 1:15, 16.

Yesu Kristu Kasidi Vova ko vo Yandi i Nzambi. Kansi, wavova vo: “Kwa [Nzambi] yatuka, yandi mpe wantuma.” (Yoane 7:29) Vava kamokenanga yo mosi muna alongoki andi, Yesu wayikila Yave vo: ‘Se diame ye Se dieno,’ “Nzambi ame ye Nzambi eno mpe.” (Yoane 20:17) Vava Yesu kafwa, Yave wamfula mu zingila kuna zulu yo kumvana wisa kiayingi kuna koko kwandi kwalunene.—Matai 28:18; Mavangu 2:32, 33.

Yesu Kristu Olenda Kusadisa mu Finama Nzambi

Yesu wayiza ova ntoto kimana katulonga e ludi mu kuma kia Se diandi. Yave yandi kibeni wavova mu kuma kia Yesu vo: “Ndioyo i Mwan’ame anzolwa. Nunwila.” (Maku 9:7) Yesu watoma zaya Nzambi lutila wantu awonso. Wavova vo: “Ke vena mpe muntu ko ozeye una kena o Se, kansi Mwana kaka, ye konso ona o Mwana kazolele sengomwena Se.”—Luka 10:22.

Yesu otangininanga e fu ya Yave una ufwene. Yesu watanginina e fu ya Se diandi una ufwene yamu tezo kia vova vo: “Konso ona umbwene, omwene mpe o Se.” (Yoane 14:9) Yesu watanginina o zola kwa Se diandi muna mvovo ye mavangu, ediadi diasadisa wantu bafinama Nzambi. Wavova vo: “Mono i nzila ye ludi yo moyo. Kavena ona okwiza kwa Se ko avo ke mu mono ko.” (Yoane 14:6) Wavova mpe vo: “Asambidi aludi besambila o Se muna mwanda ye ludi, kadi o Se, wantu a mpila yayi kevavanga bansambila.” (Yoane 4:23) Yindula e diadi, Yave ovavanga wantu nze ngeye ana bazolele zaya e ludi mu kuma kiandi.