UNA OLENDA YAMBULWILA E FU KIA MENGA AKAKA
2 | Kulandi Kunda Ko
Bibila kivovanga vo:
“Ke nuvutula muntu mbi muna mbi ko. . . . Avo dilendakana, kuna dieno sambu, nukadila kuna luvuvamu yo wantu awonso. . . . ke nulandi kunda ko . . . ; kadi diasonama vo: ‘“Diame dia landa e kunda; mono isenda,” u kavovele o Yave.’”—ROMA 12:17-19.
E sono kiaki aweyi kisongele?
Kisongele vo tulenda funga makasi avo muntu utuvangidi e mbi, kansi o Nzambi kazolele ko vo twavutula e mbi kwa muntu utuvangidi yo. Nzambi ozolele vo twasonga luzindalalu, kadi oyandi wasia nsilu vo ke kolo ko osingika mambu mawonso mambi.—Nkunga 37:7, 10.
Aweyi e sono kiaki kilenda kusadisila?
Vava o wantu a lembi lunga belandanga e kunda, ediadi diwokesanga e fu kia mengaziana. Muna kuma kiaki, avo muntu uvangidi e mbi, kulandi kunda ko. Sia e ngolo za vova yo vangila mambu kuna luvuvamu. Ezak’e ntangwa diambote mu vilakana dina divangamene. (Ngana 19:11) Kuna diak’e sambu, dilenda kala diambote mu zayisa diambu divangamene. Muna bonga e nona, avo diambu dikululanga o nsiku ovangilu, olenda dio zayisa kwa mapolisia yovo kw’awana bevitanga o ntu.
O mengaziana mfwilu miayingi kutwasanga
Adieyi ovanga avo omwene vo ke vena ye mpila ya luvuvamu ko yasingikila e diambu? Yovo adieyi ovanga avo ovangidi kala mawonso olenda muna singikila e diambu diodio kuna luvuvamu? Kulandi kunda ko. Kadi, olenda sakisa e mambu. Kansi avo ovengele e fu kia landa e kunda, disadisa mu venga e fu kia mengaziana. Bunda e vuvu muna mpila ina o Nzambi kesingikilanga o mambu. “Umbunda e vuvu, yandi ovanga mambu muna wete diaku”—Nkunga 37:3-5.
