Mbote ye Mbi: Ngeye Ofwete Sola
E nkanikinu mia fu ya nkal’ambote tusola, misonga kana vo zingu kiakiese tukala kiau yovo ve. Yave wa Nzambi ozeye wo. Kiaki i kuma kazolele vo twalemvokelanga e nkanikinu miandi.
Yave ozolele vo twakala ye zingu kiakiese ye luvuvamu.
“Omono Yave, mono i Nzambi aku, Ndiona okulonganga muna wete diaku, Ndiona okufilanga muna nzila ina ofwete diatila. Avo osidi e sungididi muna nkanikinu miame, ozevo, o luvuvamu lwaku lukala nze nkoko, o unsongi waku ukala nze mavuku ma kalunga.”—Yesaya 48:17, 18.
Wau vo yandi i Mvangi eto, Nzambi ozeye e mpila yambote tufwete natina e zingu kieto. Ozolele vo twalemvokelanga malongi mandi, kadi nluta kaka dikututwasila. Avo tulemvokele nkanikinu miandi, ke tutokana ko kana vo e nzengo tubaka nluta zitwasa. E nzengo tubaka ntangwa zawonso zambote kaka zikala, luvuvamu ye kiese zikututwasila.
Yave ke kutulombanga mambu mana katulendi vanga ko.
“O nkanikinu wau ikukanikinanga o unu ke una kikilu mpasi ko kwa ngeye, ke una mpe kwa ndá ko.”—Nsiku 30:11.
Muna zingila e ngwizani ye nkanikinu mia Nzambi mu kuma kia fu ya nkal’ambote, divavanga vo twasoba e mpil’eto ya yindulwila ye mavangu meto. Kansi, Yave ke kutulombanga mambu maviokele tezo ko. Vana ntandu, o Mvangi eto ozeye mana tulenda vanga. Avo tutomene zaya Yave, tubakula vo “e nkanikinu miandi ke miampasi ko.”—1 Yoane 5:3.
Yave osianga nsilu vo osadisa awana bebakanga e nzengo za zingila e ngwizani ye nkanikinu miandi.
“Omono Yave wa Nzambi aku, nsimbinini o koko kwaku kwalunene, mono i Ndiona okuvovesanga vo: ‘Kumoni wonga ko. Ikusadisa.’”—Yesaya 41:13.
Tulenda kweto zingila e ngwizani ye nkanikinu mia Nzambi mu kuma kia fu ya nkal’ambote, kadi okutusadisa. Olenda sadila e Bibila kina vo i Diambu diandi muna kutusadisa. Kadi e Bibila kikutuvananga lukasakeso ye vuvu.
Mafunda ye mafunda ma wantu mu nza yawonso bebakulanga vo ozingila e ngwizani ye nkanikinu mia Bibila zingu kiau ditomesanga. Nga ozolele zaya diaka malongi mayingi mambote ma Bibila? Olenda wo vanga muna yantika longoka e finkanda, Zinga ye Kiese Yakwele Mvu! muna jw.org ye olenda fio kulumuna mu ngovo. Tala malongi mena mu finkanda fiafi:
-
E Bibila Aweyi Kilenda Tomesena e Zingu Kiaku?
-
Bibila Kisianga Nsilu wa Zingu Kiakiese Kuna Sentu
-
Nga Olenda Bunda e Vuvu Muna Bibila?
Avo otomene longoka e Bibila kina vo i Diambu dia Nzambi, obakula vo ke kiaviokela ntangwa ko, kansi kiafwana “bundwa e vuvu tuka wau yamu mvu ya mvu.” (Nkunga 111:8) Olemvokela nkanikinu mia fu ya nkal’ambote mina muna Bibila i mpila yambote tulenda natina e zingu kieto. Kansi, Nzambi kalendi kutukomekena ko vo twalemvokela e nkanikinu miandi. (Nsiku 30:19, 20; Yosua 24:15) Ediadi i diambu konso muntu mu yeto kafwete sola.
