YINDUL’EDI: Ekolo okingulanga lundilu dia lekwa yankulu, omwene vo yayingi muna fwaniswa ina mo yamana fusa, yankaka yazala ye mbumbu. Yayingi muna fwaniswa yayi ke ina diaka yalungwa ko. Kansi, omwene fwaniswa kimosi kiakinu kiambote, ke vena lekwa ko kikondelo. Oyuvuidi kwa mfidi vo: “Nga e fwaniswa kiaki kiakinu kiampa?” O mfidi ovutwidi vo: “Ve, kiankulu kikilu lutila nkutu yankaka, yamu wau ke kiavangulwilu ko.” Unyuvuidi diaka vo: “Nga taninua kitoma taninuanga?” O mfidi ovutwidi vo: “Ve, e fwaniswa kiaki mupepe ye mvula zayingi kinokeno kala. Yimpumbulu yayingi bevavanga kio fwasa.” Nanga sivika osivika yo vova vo: ‘Mu nkia lekwa kiavangilwa?’

O Nkand’a Nzambi una nze fwaniswa kiaki. Nkanda wankulu kikilu lutila nkanda miankaka. Dialudi, vena ye nkanda miayingi miankulu. Kansi, nze fwaniswa yayina yankulu yamana fusa, nkanda miayingi mifwasukanga ekolo e mvu miviokanga. Kasikil’owu, mana masonama mo mu kuma kia ngangu za nza mevuniswanga vava zayi wa wantu uwokelanga yo solola mambu mankaka. Nkumbu miayingi, malongi mena mo mu kuma kia mawuku mpasi diaka mekudikilanga vana fulu kia wuka yimbevo. Vana ntandu, nkanda miayingi miankulu ndambu kaka zasala, e ndambu zankaka zavila yovo zafwasakana.

Kansi, Nkand’a Nzambi waswaswana kikilu ye nkanda miankaka. E mambu mena mo mayantika sonekwa se vioka 3.500 za mvu, kansi Nkand’a Nzambi ke usobanga ko. Kana una vo Nkand’a Nzambi usiwanga kitantu, yokwa vana tiya, simwa yo badikilwa vo ke una mfunu ko, mana masonama mo ke mevilanga ko. Vana fulu kia viokela e ntangwa mu kuma kia wokela kwa ngangu za wantu, Nkand’a Nzambi utoma vovelanga mana mevangama kuna sentu.—Tala e babu “Nga Waviokela e Ntangwa?”

Nanga olenda kukiyuvula: ‘Nga malongi ma Nkand’a Nzambi mfunu kikilu mena mu lumbu yeto?’ Muna baka e mvutu za kiuvu kiaki, ukiyuvula: ‘Nkia mambu mampasi benuananga mau o wantu o unu? Ameyi metoma kutumwesanga o wonga?’ Nanga olenda yika e mvita, safulwa kwa kalu kia wantu, umpumbulu yovo kondwa kwa unsongi. Owau, tubadika maka malongi ma Nkand’a Nzambi. Ekolo tubadikanga malongi mama, ukiyuvula: ‘Kele vo wantu balemvokelanga o malongi mama, nga e nza ke fulu kiambote ko yadi kala?’

AZODI A LUVUVAMU

“Kiese kw’avangi a luvuvamu, kadi beyikilwa vo wan’a Nzambi.” (Matai 5:9) “Avo dilendakana, kuna dieno sambu, nukadila kuna luvuvamu yo wantu awonso.”—Roma 12:18.

NKENDA YO LOLOKA AKAKA

“Kiese kw’awana bena ye nkenda, kadi befwilw’e nkenda.” (Matai 5:7) “Nuvezananga mambu yo loloka muntu yo nkw’andi kuna mvevo, kana nkutu vo muntu obakidi nkw’andi diambu. Wauna Yave * kanulolokela kuna mvevo, oyeno mpe i wau nufwete vanga.”—Kolosai 3:13.

NGWIZANI VANA VENA MAKANDA

“Muna muntu mosi i kavangila zula yawonso, kimana bakala ova nza, wasikidisa e kolo yo sia nkendelo muna kalu ya wantu.” (Mavangu 17:26) “Muna diadi, Petelo oyantikidi vova vo: “Nzambi ke sianga mpambula ko, kansi muna zula yawonso, ndiona okumvumina yo vanga oma mansongi otondwa kwa yandi.”—Mavangu 10:34, 35.

LUNGA-LUNGA O NTOTO

“Yave wa Nzambi obongele o muntu, unsidi muna mpatu a Edene kimana kavata yo lunga-lunga yo.” (Etuku 2:15) Nzambi osinga “fwasa awana befwasanga e nza.”—Lusengomono 11:18.

VENGA E LOKO YE MAVANGU MA ZUMBA

“Nuyikenga ye loko diawonso, e kuma kadi, o muntu kana nkutu ulolo wa mavua kena mau, o moyo andi ke una muna mavua mandi ko.” (Luka 12:15) “E zumba ye usafu wawonso ye loko ke diyikwa nkutu ko vovo nwina, wauna ufwanukini kwa nkangu avelela.”—Efeso 5:3.

KALA NKWA ZIKU YE FULULU KIA SALA

“Tuzolele kala akwa ziku muna mambu mawonso.” (Ayibere 13:18) “Ndiona oyiyanga kayiyi diaka ko; kansi yambula kasala ye fululu kiawonso.”—Efeso 4:28.

MFUNU WA SADISA AWANA BENA MU MPASI

“Nufiaulwisa awana bakendalele, nusadisa ana batovokele, nukala yo luzindalalu kwa wantu awonso.” (1 Tesalonika 5:14) “Lunga-lunga wan’ansona ye akento bafwila mayakala muna mpasi zau.”—Yakobo 1:27.

Nkand’a Nzambi ke uyikanga kaka nkanikinu miami ko. Ukutulonganga mu mpila yakiá o mfunu wa lemvokela e nkanikinu miami muna zingu kieto kia lumbu ke lumbu. Kele vo wantu ayingi balemvokelanga e nkanikinu tuyikidi, e mpasi ke zadi kala zayingi ko ova nza. Muna kuma kiaki, e nkanikinu mia Nkand’a Nzambi miakinu miamfunu kana nkutu mu lumbu yeto. E malongi ma Nkand’a Nzambi nkia nluta malenda kutwasila owau?

O muntu ona osundidi wantu awonso e ngangu wavova vo: ‘E ngangu zilungisilwa muna mavangu mandi.’ (Matai 11:19) Nga kukwikidi ko? E longi diangangu dizayakananga muna nluta dilenda kutwasila avo olemvokele dio. Nanga olenda kukiyuvula: ‘Avo malongi ma Nkand’a Nzambi mfunu kikilu mena, nkia nluta malenda twasa muna zingu kiame? Aweyi malenda kunsadisila muna mpasi inuananga zau?’ Badika nona kimosi.

E zingu kia Delfina * kiambote kiakala, salu kiakiese kakala kiau. Kansi kuna kinsalukisa, wabwilwa mambu mayingi mampasi. Wafwilwa mwan’andi ankento. Longo lwandi lwafwa. Kakala diaka ye nzimbu ko. Wavova vo: “Kiayizayanga diaka ko kana i nani. Kiakala diaka yo mwana ko, o nkaz’ame wambembola, e nzo mpe nkatu. Yakimwenanga vo kina diaka mfunu ko, yakituka i mpasi muntu, e vuvu kiawonso kiadimbuka.”

Wau i nkumbu antete o Delfina kamona e ziku kia mvovo emi: “E lumbu ya mvu mieto lusambwadi lua mvu, Ovo muna ngolo se lunana lua mvu, Efuka diau se mfuntu ye mpasi; Ke kolo ko, diviokele, oyeto tuvempokele.”—Nkunga 90:10.

Delfina wasolola lusadisu muna Nkand’a Nzambi  muna kolo kiakina kiampasi. E nluta kabaka miasivi kikilu. Nze una usonga malongi tatu melanda, wantu ayingi mpe bavua e nluta vava bayantika sadila malongi ma Nkand’a Nzambi muna zingu kiau. Kuna kwa yau, o Nkand’a Nzambi una nze fwaniswa tuyikidi kuna lubantiku. Waswaswana kikilu ye nkanda miankaka emi mikitukanga miankulu yo viokela e ntangwa. Nga i mu kuma kia sia vo Nkand’a Nzambi mu mpila yankaka wasonekenua? Nga i mu kuma kia sia vo mana masonama mo kwa Nzambi matuka ke kwa mpasi wantu ko?—1 Tesalonika 2:13.

Nanga ongeye mpe omonanga vo e zingu kia wantu kiankufi kikilu ye kiazala ye mpasi. Avo e mpasi zisakidi muna zingu kiaku, akweyi olenda sololwela lufiaulwisu, lusadisu ye luludiku lwambote?

Yambula twabadika mpila tatu zina o Nkand’a Nzambi ulenda kutwasila nluta muna zingu kiaku. Nkand’a Nzambi ulenda kulonga una olenda

1. vengela e mpasi avo dilendakana.

2. singikila e mambu mekubwilanga.

3. zizidila e mambu mana kulendi soba ko.

E malongi melanda mevovela mambu tatu mama.