NGA OLENDA SOLA UNA UKALA E ZINGU KIAKU KUNA SENTU? Akaka bekwikilanga vo mawonso mateka sikidiswa, ke vena muntu ko olenda sola una ukala e zingu kiandi kia kusentu. Vava ke belendanga lungisa makani mau mankaka ko, bebadikilanga dio vo i una diateka sikidisilwa. Bevovanga vo, “Diateka sikidiswa vo kilendi lungisa makani mame ko!”

Akaka bekendalalanga vava ke bemonanga ko una balenda vuila luvevoko mu nza yayi yampasi yakondwa unsongi tuzingilanga. Kana nkutu bavavidi tomesa e zingu kiau, vita, nsoki, sumbula ye yimbevo ifungisanga makani mau kaka bemonga ntangwa zawonso. Bekukiyuvulanga vo, ‘Ekuma mfwete tokanena mambu mama?’

Dialudi vo mambu mebwanga muna zingu malenda fungisa makani maku. (Kimpovi 9:11) Kansi, e diambu dia vuvu kiaku kia kusentu, dina osola mfunu kikilu dina. Muna kuma kiaki, o Nkand’a Nzambi usonganga vo dina osola, i nsabi za zingu kiaku kia kusentu. Tala mana uvovanga.

Mose wa mfidi a zula kia Isayele yankulu, wavovesa nkangu vava bafinama kota muna Nsi ya Nsilu vo: “Inusididi moyo yo lufwa, nsambu ye sibu: i diau vo, sola moyo wazinga, ongeye ye mbongo aku: muna zola Yave wa Nzambi aku, yo wila nding’andi, yo kuntatidila.”—Nsiku 30:15, 19, 20.

“Inusididi moyo yo lufwa, nsambu ye sibu: i diau vo, sola moyo.” ​—Nsiku 30:19

Elo! Nzambi wakatula Aneyisaele muna ubundu muna Engipito yo kubavana elau dia vua luvevoko ye zingu kiakiese muna Nsi ya Nsilu. Kansi, mawonso mama muna lungana, diambu bafwana vanga. Muna vua nsambu zazi, diavavanga vo “basola moyo.” Mu nkia mpila? ‘Muna zola Nzambi, wila nding’andi yo kuntatidila.’

O unu, ngeye mpe una ye lau dia sola. Mana osola mesonga una ukala e zingu kiaku kuna sentu. Avo osolele zola Nzambi, wila nding’andi yo kuntatidila, disonga vo moyo osolele—moyo a mvu ya mvu muna paradiso ova ntoto. Ameyi mevavuanga muna konso diambu diadi?

O zola i fu kia Nzambi kisundidi. Yoane wa ntumwa vava kavumuninwa wasoneka vo: “Nzambi i zola.” (1 Yoane 4:8) Muna kuma kiaki, vava kayuvulwa o nkanikinu usundidi muna nkanikinu miawonso, Yesu wavova vo: “Zola Yave wa Nzambi aku muna nsi a ntim’aku yawonso, muna kiwuntu kiaku kiawonso ye muna nyindu aku wawonso.” (Matai 22:37) E ngwizani ambote yo Yave wa Nzambi ifwete tuka muna zola, kansi ke mu wonga watumbwa ko. Ekuma tufwete solela zola Nzambi?

E mpila Yave kezolelanga wantu yafwanana yo zola kuna mase besonganga kwa wan’au. Kana una vo wantu alembi lunga, mase ma nzodi belonganga, kasakesa, yikama yo singika wan’au, kadi bazolele vo bakala ye zingu kiakiese ye kiasikila. Adieyi mase bevingilanga kuna kwa wan’au? Mase bevingilanga vo wan’au babazolanga yo lemvokela mawonso bekubalonganga muna wete diau. Nga ke diansongi ko vo S’eto walunga kuna zulu kavingila vo twanzola yo yangalela mawonso kevanganga muna wete dieto?

Muna nding’antete yasonekenua Nkand’a Nzambi, e mvovo “wila” ezak’e ntangwa una ye nsasa vo “lemvokela.” Nga ke diau ko tuvovanga avo tuvovese kwa mwana vo, “Wilanga mase maku”? Muna kuma kiaki, owila nding’a Nzambi, disongele vo longoka yo lemvokela mana kevovanga. Wau vo katulendi wá kikilu nding’a Nzambi ko, tukunwilanga muna tanganga yo sadila mana mena muna Nkand’a Nzambi una vo i Diambu diandi.—1 Yoane 5:3.

Muna songa o mfunu wa wila nding’a Nzambi, lumbu kimosi Yesu wavova vo: “Ke mu mbolo kaka ko i kezingil’o muntu, kansi muna konso diambu divaikanga muna nua a Yave.” (Matai 4:4) Nze una tuvuilanga madia ma kinitu o mfunu, ovua zayi wa Nzambi, i diambu disundidi o mfunu. Ekuma? Solomo wa Ntinu a ngangu wavova vo: ‘Ngangu i vevelo; nze wauna nzimbu zinina se vevelo, kansi i wete wa zayi wuwu, ovo e ngangu zizingisa moyo a ndion’ovwidi zo.’ (Kimpovi 7:12) O zayi ye ngangu za Nzambi zilenda kututanina o unu yo baka nzengo zambote zikutufila mu vua moyo a mvu ya mvu kuna sentu.

Sungamena kingana kia Yesu tuyikidi muna longi diviokele. Yesu wavova vo: ‘O mwelo ambatakani, e nzila yaswetama mpe, i yau ifilanga ku moyo, akete kaka bena ana besololanga yo.’ (Matai 7:13, 14) Avo tuzolele baka nluta mia kangalela muna nzila yayi, i sia vo, vua moyo a mvu ya mvu, tufwete kala yo mfidi a ngangu yo kuntatidila. Ozevo, tuna ye kuma kiasikila muna finama Nzambi. (Nkunga 16:8) Aweyi tulenda kunfinamena?

Vena ye mambu mayingi tufwete vanganga konso lumbu, vena mpe ye mambu mayingi mana tuzolanga vo twavanga. E mambu mama malenda kutudia e ntangwa yovo kutufwisa e diya yamu tezo kia lembi kala ye ntangwa ya yindula mana Nzambi kazolele vo twavanga. Kiaki i kuma Nkand’a Nzambi ukutulukisilanga vo: “Nutoma tala e nkangala nukangala, ke nukangadi nze minkondwa-ngangu ko, kansi nze akwa ngangu kaka, nutoma sadilanga e ntangw’eno, e kuma kadi e lumbu i bi.” (Efeso 5:15, 16) Muna finama Nzambi tufwete sianga ngwizani eto yo yandi va fulu kiantete muna zingu kieto.—Matai 6:33.

Kanele vo kulendi vanga diambu ko muna soba mambu mana mavioka kala, olenda sola zingu kiambote kia kusentu kumosi ye azolw’aku. Nkand’a Nzambi usonganga vo o Se dieto kuna zulu, Yave wa Nzambi, otoma kutuzolanga ye okutuzayisanga mana kazolele vo twavanga. Tala mana kavova Mika wa ngunza:

‘Usongele edi diambote, e muntu; aweyi ketombel’omo ngeye o Yave? O vang’owu wansongi, yo zola nkenda, yo kangala yo Nzambi aku muna lusakalalu lua ntima.’—Mika 6:8.

Nga otambulwila mbok’a Yave ya kangala yo yandi yo vua nsambu za mvu ya mvu zina kelundilanga awana bevanganga wo? Ngeye ofwete sola!