Nga wayindula kala una wadi kala e zingu ova ntoto kondwa kwa ntemo a ntangwa? O mwini usadisanga e nti mu vaikisa makaya, mvuma, bundu ye mbongo. Usadisanga mpe e nti mu vua o maza tuka muna ntoto, muna mianzi yamuna makaya. I bosi, o maza mama metombokanga muna ngambwila.

E mvula i lukau lwamfunu lutukanga kwa Nzambi. Isadisanga e ntoto mu yima e madia tudianga. Nzambi okutuvananga e mvula ye nsungi ziyimanga e mbongo, okutuyukutisanga yo madia yo zadisa e ntima mieto ye kiese.

Mase mayingi betokananga kana vo bekala ye madia ye mvuatu miafwana mu kuma kia esi nzo zau. Tala dina e Sono Yavauka ivovanga: “Nutoma tala e nuni za zulu; ke zikunanga ko yovo vela ngatu kutika madia muna malundilu, kansi o Se dieno kuna zulu odikilanga zo. Nga yeno ke nubasundidi o mfunu ko e?”—Matai 6:25, 26.

“Nutoma badika una e mvuma za mfuta zikudilanga . . . ; kansi inuvovese wo vo, kana nkutu Solomo [wa ntinu] muna nkembo andi wawonso, kasidi vuatila nze imosi muna mvuma zazi ko. Avo Nzambi ovuikanga e titi ya mfuta . . . , nga keluta kunuvuika ko?”—Matai 6:28-30.

Wau vo Nzambi olenda kutuvana madia ye mvuatu, tulenda kala mpe ye ziku vo okutusadisa mu vua ina tuvuidi o mfunu muna zingu. Avo tusidi luzolo lwa Nzambi vana fulu kiantete, Nzambi olenda sambula e ngolo zeto muna vua madia yovo kutusadisa mu solola e salu kimana twasumba ina tuvuidi o mfunu.—Matai 6:32, 33.

Kieleka, vava tutalanga e ntangwa, mvula, nuni ye mvuma kekutuvananga o Nzambi, ediadi dikutufilanga mu kunzola. E longi dilende, disasila una o Mvangi eto kemokenenanga yeto.