Wantu ayingi omu nza ke bena ye madia ko ngatu nzo. Akaka ke bena ye vuvu ko mu kuma kia sentu. Avo tusidi e ngolo za sadisa wantu awaya, tuvua e dienga ye nsambu za Nzambi.

“Ndiona ofwilanga nsukami e nkenda Yave kesompekanga, senda kekunsenda muna vangu diandi.”—NGANA 19:17.

Yesu wayika kingana kia muntu wawandwa kwa mivi yo siswa wafwa e kiambu. (Luka 10:29-37) Muntu mosi wakala vo nzenza waningama yo lunga-lunga muntu ndioyo wawandwa. Wansadisa kana una vo ke esi kanda dimosi ko.

Muntu ambote ndioyo kasadisa kaka nkwandi ko ona wawandwa kwa mivi muna wuka e mputa zandi yo kumvana ina kavuanga o mfunu, kansi mpe wamfiaulwisa yo kumvevola muna mpasi.

Adieyi tulongokele muna kingana kiaki? Yesu wasonga vo tufwete sadisanga awana bavuidi lusadisu o mfunu mun’owu wa tezo kieto. (Ngana 14:31) E Sono Yavauka ikutulonganga vo ke kolo ko Nzambi ofokola usukami ye mpasi. Ozevo, aweyi ye nkia ntangwa Nzambi kevanga wo? E longi dilende divovela e nsambu zina o Mvangi aku anzolwa kekulundilanga.