“Wauna e sumu diakotela ova nza muna muntu mosi, o lufwa mpe muna sumu, i nsayana lwasayana o lufwa kwa wantu awonso.”—ROMA 5:12.

Nzambi wavanga mase meto mantete, Adami yo Eva ye nitu ye ngindu zalunga. Wabavana e paradiso ova ntoto, i sia vo mpatu a Edene. Wabavovesa vo badia kwau e bundu ya nti miawonso muna mpatu, bundu kia nti mosi kaka kabasima. Kansi, Adami yo Eva basola dia e bundu kia nti wowo ye basumuka. (Tuku 2:15-17; 3:1-19) Mu kuma kia ukolami wau, Nzambi wabayinga muna mpatu a Edene, e zingu kiau kiakituka se kiampasi. Kuna kwalanda, bawuta wana, e zingu kia wan’au mpe kiakituka kiampasi. Yau awonso banuna yo fwa. (Tuku 3:23; 5:5) Oyeto mpe wau vo mu luvila lwalu twatuka, tuyelanga, tununanga yo fwa.

“Nza yawonso ina muna wisa kia ndiona wambi.”—1 YOANE 5:19.

“Ndiona wambi” i Satana. Satana i mbasi ona wakolamena Nzambi. (Yoane 8:44; Lusengomono 12:9) Kuna kwalanda, mbasi zankaka zayikama Satana. Beyikilwanga vo nkuya. E nkuya miami besadilanga o nkuma au muna vuna o wantu yo kubavambula yo Mvangi eto. E nkuya bevukumunanga o wantu mu vanga mambu mambi. (Nkunga 106:35-38; 1 Timoteo 4:1) Satana ye nkuya beyangalalanga mwesa o wantu e mpasi.

“Kadi o muntu konso kina kekuna i kiau mpe kekutika.”—NGALATIA 6:7.

Nkumbu miayingi tumonanga e mpasi mu kuma kia sumu twasambukila yo umpukumuni wa nza ya Satana ituzungidi. Kansi, ezak’e ntangwa o wantu yau kibeni bekuyitwasilanga e mpasi. Mu nkia mpila? Vava bevanganga mambu mambi yovo baka nzengo zambi, mfwilu kaka bebakanga. Kuna diaka e sambu, vava wantu bevanganga mambu mambote, nluta kaka bebakanga. Muna bonga e nona, o yakala una vo se ye nkwa ziku, ona otoma salanga yo zola esi nzo andi, nluta miayingi kevuanga yo mwesa esi nzo andi e kiese. Kansi ndiona ofwasanga e nzimbu zandi muna nsaka, nua malavu mayingi mankolwa yovo miolo, olenda sukama kumosi ye esi nzo andi. Muna diadi, diangangu twalemvokelanga o Mvangi eto. Ozolele vo twatambulanga lekwa yayingi yambote kumosi ye “luvuvamu.”—Nkunga 119:165.

“Muna lumbu yambaninu . . . , wantu bekala akwa kuyizola, minzol’a nzimbu,  . . . akolamini a mase ye ngudi, . . . minkondwa volo, akwa nganzi, mindembi zola mawete.”—2 TIMOTEO 3:1-5.

O unu, wantu ayingi bena ye fu yayi yasakulwa muna Bibila. E kiaki i ziku kisonganga vo mu “lumbu yambaninu” a nza yayi tuzingilanga. E Bibila kiasakula vo mu lumbu yeto mu kala ye vita, mvengele, nzakama za ntoto ye vuku. (Matai 24:3, 7, 8; Luka 21:10, 11) E mambu mama mpasi zayingi ye lufwa metwasanga.