Avo tusidi kaka sungididi muna mpila twaswaswanena y’akaka, tulenda yindula vo e nswaswani zazi diambu diambi. Ediadi dilenda mpe kutufila mu yindula vo tusundidi akaka yovo akaka batusundidi. Avo tukedi ye ngindu zazi zabendomoka mu kuma kia akaka, diampasi dikala mu kuyisia vana fulu kiau. Olembi kuyisia va fulu kia akaka i sinsu kisonganga vo fu kia sia mpambula tuna kiau.

“Nukala ye kiese kumosi ye awana bena mu kiese; nudila ye awana bedilanga.”—ROMA 12:15.

Aweyi disongele? E sono kiaki kilenda kufikwa mu mvovo emi: Ukisianga vana fulu kia akaka. Ediadi disongele vo tufwete mona wauna akaka bemonanga.

Avo tuyisidi vana fulu kia muntu ankaka, tubakula vo twafwanana kikilu yo muntu ndioyo. Tubakula mpe vo oyandi mpe olenda mona una tumonanga yo vanga mana tuvanganga. Okuyisia va fulu kia wantu ankaka dikutusadisa mu badikila wantu awonso vo esi kanda dimosi, kiakala kia fulu basansukila. Avo tubakwidi vo yeto awonso twafwanana, tukatula e ngindu zambi tukalanga zau mu kuma kiau.

O kuyisia vana fulu kia akaka, dikutusadisa mpe mu kubazitisa. Anne-Marie ozingilanga kuna Senegal, lumbu kimosi waveza wantu a zunga kimosi babadikilwanga vo ke bena mfunu ko. Anne-Marie wasasila una e fu kia kuyisia vana fulu kia akaka kiansadisila. Wavova vo: “Vava yabakula e mpasi bemonanga wantu awaya, yakiyuvula kana aweyi yadi mona kele vo yakala va fulu kiau. Yamona vo kisundidi wantu awaya ko, kadi kisidi vanga kana diambu dimosi ko dilenda songa vo ibasundidi.” Avo tuvangidi e ngolo mu bakula e mpasi benuananga zau akaka, tukuyisia vana fulu kiau, ke tukubaveza ko.

Avo ngindu zabendomoka okalanga zau mu kuma kia wantu a kanda kingandi, vanga e ngolo za vava bakula mu nkia mambu nufwananene. Muna bonga e nona, yindula una bemonanga vava:

• bedianga kumosi ye esi nzo zau

• befokolanga e lumbu ye mabibi ma salu

• bekalanga vamosi ye akundi au

• bewanga miziki betoma zolanga

I bosi, vava kuyisia vana fulu kiau. Ukiyuvula:

• ‘Adieyi ivanga avo muntu umvezele?’

• ‘Aweyi imona avo akaka bamvovele e mbi lembi teka kunzaya?’

• ‘Kele vo i mwisi kanda diau, aweyi yadi zola vo wantu bakadila yame?’