Yambula Twayangalala Kumosi!

DIAMPASI mu kala ye kiese mu lumbu yayi. Kuna kwa wantu ayingi, diampasi dikalanga mu yindula mambu ma kiese balenda zayisa kw’akaka. E zingu kia unu, musungula muna mbanza zampwena, kifilanga wantu mu kuyivambula yo kituka nze ansona.

Alberto Oliverio, otalanga oma ma nkal’a wantu, wavova vo: “Wantu ayingi bena mu kinsona o unu. Ka lukatikisu ko vo zingu muna mbanza zampwena kisakisanga diambu diadi. Muna kuma kia kinsona, wantu ayingi ke bevwanga akundi au a salu mfunu ko, ngatu esi belo yau yovo ana besadilanga mu nzo za tekela lekwa.” Nkumbu miayingi e kinsona kiaki lukendalalu kitwasanga.

Kansi, mpangi zeto Akristu ngindu zaswaswana bena zau. Paulu wa ntumwa wasoneka vo: “Numonang’aka kiese.” (1 Tes. 5:16) Vena ye kuma yayingi tufwete yangalela kumosi ye mpangi zeto. Yave wa Nzambi a Mpungu-ngolo tusambilanga. Tubakulanga e ludi kia Nkand’a Nzambi. Tuna ye vuvu kia luvuluzu ye kia  moyo a mvu ya mvu. Tulenda mpe sadisa akaka mu vwa nsambu zazi.—Nku. 106:4, 5; Yer. 15:16; Roma 12:12.

Akristu akieleka beyangalalanga y’akaka. Ekiaki i kuma Paulu kasonekena esi Filipi vo: “Nkemba, yo kunukembesa yeno awonso; oyeno mpe nukemba nkemba mosi, yo kunkembesa.” (Fili. 2:17, 18) Mu tini yole yayi kaka, Paulu nkumbu miole kayika e mvovo kemba yovo yangalala ye kembesa yovo yangalala kumosi y’akaka.

Akristu bafwete venga e fu kia kuyivambula. O muntu okuyivambulanga ye mpangi zandi kalendi yangalala yau ko muna nkutakani. Muna kuma kiaki, aweyi tulenda lemvokela luludiku lwa Paulu lwa ‘kwamanana kembelela muna Mfumu’ kumosi ye mpangi zeto?—Fili. 3:1.

Tuyangalala Kumosi ye Mpangi Zeto

Vava Paulu kasoneka o nkand’andi kwa esi Filipi, nanga mu pelezo kakala kuna Roma mu kuma kia salu kia samuna nsangu zambote. (Fili. 1:7; 4:22) Kana nkutu muna pelezo, wakwamanana songa o vema muna salu kia umbangi. Wakala ye kiese wau vo wasadilanga Yave una ufwene yo kuyivana nze “nkelelwa muna ntambiku.” (Fili. 2:17) O vema kasonga o Paulu kusonganga vo tulenda kala ye kiese kana nkutu nkia mambu matubwididi. Kana una vo mu pelezo kakala, Paulu wavova vo: ‘Ikwamanana yangalala.’—Fili. 1:18.

Wau vo Paulu wasikidisa nkutakani kuna Filipi, zola kwayingi kakala kwau muna mpangi za mbanza yayi. Wazaya wo vo lenda kubakasakesa muna kubazayisa e kiese kemonanga muna sadila Yave. Ekiaki i kuma kasonekena vo: “Nzolele nwazaya wo, abunzi, ovo oma mambwidìdi mezìdi muna lunungununu lua nsangu zambote; e kangwa yame yasenzekwa, ovo muna diambu dia Kristu, vana vena mvengo wawonso w’ayingidi a lumbu, y’akaka mpe awonso.” (Fili. 1:12, 13) Esi Filipi bayangalala kikilu vava Paulu kabazayisa e kiese kamonanga. Paulu wayangalala kumosi ye mpangi zandi kuna Filipi, oyau mpe bayangalala yo yandi. Diavavanga vo esi Filipi basungamena e kuma kia luyangalalu lwau yo lembi kendalala wau vo Paulu mu pelezo kakala. Bakasakeswa vo batanginina e mbandu a Paulu. (Fili. 1:14; 3:17) Vana ntandu, esi Filipi basambanga mu kuma kia Paulu yo kumvana lusadisu kavwanga o mfunu.—Fili. 1:19; 4:14-16.

Nga tukalanga ye kiese nze kina Paulu kakala kiau? Nga tusianga ngolo za yindula mambu mambote tuwanananga mau muna  zingu ye muna salu kia umbangi? Vava tukalanga vamosi ye mpangi zeto, diambote twamokenanga mu kuma kia kiese tumonanga muna salu kia umbangi. Ka tufwete vingilanga ko yavana vebwa diambu diampwena. Nanga muntu wayangalele wá e nsangu za Kintinu mu kuma kia nkotelo za moko zambote twasadila yo toma kunsasila. Nanga mbokena zambote twakedi zau yo muntu mu kuma kia sono kimosi kia Nkand’a Nzambi. Dilenda kala mpe vo ekolo twakedi muna salu kia umbangi, wantu bazaya wo vo tu Mbangi za Yave yo kubasila kimbangi kiambote. O zayisa mambu mama kwa mpangi zeto, imosi muna mpila tulenda yangalela yau kumosi.

Ayingi muna nkangu a Yave bekuyivananga muna salu kia samun’e nsangu zambote. Aviti a nzila, akengi a zunga ye mvivu, asadi kuna Betele, misionario ye asadi mu nsi za kinzenza bekalanga ye kiese ekolo bekuyivananga muna salu kia ntangwa ke ntangwa. Nga tuyangalalanga kumosi yo yau? Ozevo, yambula twasonga vo tuyangalelanga e salu kia mpangi zazi bena vo ‘asadi y’akw’eto muna kintinu kia Nzambi.’ (Kol. 4:11) Tulenda kubakasakesa vava tukalanga yau vamosi muna tukutakanu twakete ye twampwena. Tulenda mpe tanginina o vema kwau. Tulenda vavanga e “ntangwa” ya wá mana mababwila ye mvovo miau mia lukasakeso muna kubatambula muna nzo zeto yovo dia yau entwadi.—Fili. 4:10.

Tuyangalala Kumosi Y’awana Bena mu Mpasi

Lubangamu ye mpasi kawanana zau o Paulu zakumika etima diandi dia sikila ye kwikizi muna Yave. (Kol. 1:24; Yak. 1:2, 3) O zaya vo ampangi kuna Filipi balenda wanana ye mpasi zazi yo kasakeswa kwa mbandu andi ya luzindalalu, diamvana kuma kia yangalala kumosi yo yau. Ekiaki i kuma kasonekena vo: “Kwa yeno kwavaninwa [elau] muna diambu dia Kristu, ke kwikila kaka muna yandi ko, yo kumwena mpe e mpasi: wau nuna ye ndwana mosi ina nwamon’omu mono, ina mpe nuwidi owau vo in’omu mono.”—Fili. 1:29, 30.

Diau adimosi o unu, Akristu besiwanga kitantu mu kuma kia salu kiau kia umbangi. Ezak’e ntangwa bemweswanga e mpasi. Kansi, nkumbu miayingi kitantu kiaki mu mpila yakaka kikwizilanga. Kasikil’owu, avengomoki balenda kubavunina mambu yo fungilwa makasi kwa yitu yau. Bevezwanga mpe kw’akundi au a sikola yovo a salu. Yesu wavova vo e mpasi zazi ke zifwete kutusivikisa ko ngatu kutukendeleka. Kansi, tufwete zo badikila vo diambu diakiese. Wavova vo: “Nu akwa nsambu, ovo wantu bekunutumba, yo kunubangika, yo kunuyikila bi wawonso kuna luvunu, muna kuma kiame. Nukemba, nwayangalala kikilu: kadi nsendo eno unene kun’ezulu.”—Mat. 5:11, 12.

Ka tufwete monanga wonga ko vava tuwanga vo ampangi muna nsi zakaka mu lubangamu bena. Kansi, tufwete yangalala mu kuma kia luzindalalu lwau. Tulenda samba mu kuma kiau yo lomba kwa Yave kabasadisa kimana basikila ye lukwikilu yo zindalala. (Fili. 1:3, 4) Kana una vo ke tulendi vanga mayingi ko mu kuma kia mpangi zazi, tulenda sadisa ampangi muna nkutakani zeto ana bena mu mpasi. Tulenda kubasonga vo mfunu tukubavwanga yo kubasadisa. Kasikil’owu, tulenda kubabokela mu kala yeto entwadi muna fuku wa Nsambila ya Esi Nzo, sala entwadi muna salu kia umbangi yovo sakana yau. Tulenda sadila malau mama muna yangidika muntu yo nkw’andi.

Tuvwidi kuma yayingi ya yangalala kumosi. Ke tuzolele tanginina fu kia wantu a nza ko yo kuyivambula y’akaka. Kansi, tuzolele kala vamosi ye mpangi zeto yo yangalala yau kumosi. Avo tuvanga wo, tusiamisa zola ye kintwadi muna nkutakani yo yangalela ungudi wa wana-ngudi Akristu. (Fili. 2:1, 2) Paulu watukasakesa vo: “Nukembelelelang’aka muna Mfumu: mpovele wo diaka vo, Nukembelela.”—Fili. 4:4.

[Avwe a Foto zina muna lukaya lwa 6]

Globe: Courtesy of Replogle Globes