Zula yayingi kuna nz’ankulu bavondanga eyaka yimpumbulu muna kubakoma vana nti. Esi Roma bakomanga kimpumbulu vana nti yo kunsisa vana mu lumbu yayingi yavana kefwa mu kuma kia mpasi, vwina, nzala yovo mwini. Esi Roma babadikilanga e fu kia koma muntu vana nti vo tumbu kiansoni kiavewanga kwa yimpumbulu yasundanga o bi.

Adieyi tuvova mu kuma kia zula kia Isaele kuna nz’ankulu? Nga Aneyisaele vana nti bakomanga yimpumbulu muna kubavonda? Nsiku a Mose wavovanga vo: “O muntu, ovo ovolele esumu difwene o fwa, kavondwa, wàmanikwa muna nti; evimbu ke disala muna nti o fuku mvimba ko, zika kak’okunzika, e lumbu kiakina.” (Nsi. 21:22, 23) Muna kuma kiaki, muna tandu kiasonekwanga Sono ya Kiyibere, o muntu ona wazengelwanga e tumbu kia lufwa, entete wavondwanga i bosi kakomwanga vana nti.

Muna kuma kia diambu diadi, muna Fuka 20:2 tutanganga vo: “Konso Nyisaele yovo nzenz’onangina Isaele, on’ovana mbongo andi kwa Moleke; vondwa kevondwa: esi nsi bantuba matadi.” Awana bakala vo “ngang’a matombola yovo ngang’a ngombo,” vondwa mpe bavondwanga. Aweyi bavondelwanga? Muna ‘kubatub’o matadi.’—Fuka 20:27.

Muna Nsiku 22:23, 24 tutanganga vo: “Ovo vena yo ndumba wazìtikilwa kw’eyakala, o’yakala akaka wansolola mun’evata, yo kunlekela; ozevo nubavaikisa yau ewole kun’evitu di’evata nwabatuba matadi bafwa; o ndumba wau kakazidi ko, wau kena mun’evata; o’yakala wau kakulwidi nkaz’angani. I nsukis’osukisa bi vovo nwina.” O tuba muntu matadi i mpila batoma sadilanga Aneyisaele kuna nz’ankulu mu vonda ndiona ovolele esumu diampwena. *

Muna Nsiku 21:23 tutanganga vo: “On’omanamene wasibwa kwa Nzambi.” Evimbu dia ndiona “wasibwa kwa Nzambi,” senzekwa diasenzekwanga kimana diakala se lulukisu kwa Aneyisaele.