Vava tufwilwanga nzolw’eto, tudilanga kadi ke tukala yandi diaka ko. Kana una vo watoma zolanga Lazaro, Yesu kadila ko mu kuma kia Lazaro wafwa. Kansi, Yesu wadila mu kuma kia yitu ya Lazaro kumosi y’akundi andi, nze una usonganga lusansu luna muna nkand’a Yoane.—Yoa. 11:36.

Vava Yesu kawá vo Lazaro oyelele, ke vana vau ko kayenda kuna nzo au mu kunwuka. O lusansu luvovanga vo: ‘Vava [Yesu] kawa wo vo [Lazaro] yela keyela, onangini lumbu yole kuna kakala.’ (Yoa. 11:6) Ekuma Yesu kazingidila? Ekani kakala diau. Wavova vo: “O yela kwaku ke kwa mfwa ko, kwa nkembo a Nzambi kaka, o Mwan’a Nzambi kakembelèlelwa mo.” (Yoa. 11:4) E kimbevo kia Lazaro ke kiakala y’ekani dia kumvonda ko. Yesu wakala y’ekani dia sadila lufwa lwa Lazaro mu vana ‘nkembo kwa Nzambi.’ Mu nkia mpila? Yesu sivi kazola vanga dia fula nkundi andi muna ziami.

Muna moko kakala kiau y’alongoki andi muna kolo kiakina, Yesu watezanesa lufwa ye tulu. Ekiaki i kuma kabavovesela vo ‘nkwenda yasikamesa [Lazaro].’ (Yoa. 11:11) Kuna kwa Yesu, o fula Lazaro diakala nze se osikamesanga mwan’andi ku tulu. Muna kuma kiaki, ke diakala mfunu ko kwa yandi mu kendalala mu kuma kia lufwa lwa Lazaro.

Kansi, ekuma Yesu kadidila? O Nkand’a Nzambi uvananga e mvutu. Vava Yesu kawanana ye Maria wa mpangi a Lazaro y’akaka ana badilanga, “ofululukidi muna ntima, o moyo andi utelamene.” Vava kamona e ntantu zau, Yesu wakendalala yamu tezo kia ‘fululuka muna ntima.’ Ekiaki i kuma ‘Yesu kadidila.’ Yesu wakendalala kikilu mu mona akundi andi azolwa bakala muna mpasi.—Yoa. 11:33, 35.

O lusansu lwalu lusonganga vo Yesu una ye nkuma wa fula azolw’eto yo vimpi wambote muna nz’ampa eyi ifinamanga. Lusansu lwalu lutusadisi mpe mu zaya vo Yesu osonganga e nkenda kw’awana befwilwanga azolw’au mu kuma ki’esumu dia Adami. E diambu diakaka tulenda longoka muna lusansu lwalu, i dia sia vo, tufwete songanga e nkenda kw’awana bekendalalanga mu kuma kia lufwa lwa azolw’au.

Yesu wazaya wo vo ofula Lazaro. Kana una vo i wau, o zola ye nkenda mu kuma ki’akundi andi zamfila mu dila. Diau adimosi, e ngemba zilenda kutufila mu ‘didis’awana bedilanga.’ (Roma 12:15) O songa nkenda za mpila yayi ke disongele ko vo muntu kena ye vuvu kia lufuluku ko. Muna kuma kiaki, Yesu wasisa mbandu ambote ya songa nkenda kw’awana bena mu mpasi muna dila, kana una vo wayenda kimana kafula Lazaro.