Nkand’a Nzambi ke uyikanga konso diambu ko disonganga vo yoka evimbu diambi.

Vena ye lusansu lwa Nkand’a Nzambi lusonganga vo mavimbu yovo visi ya wantu yayokwanga. (Yos. 7:25; 2 Tus. 34:4, 5) Ediadi nanga diasonganga vo wantu awaya ke bafwanukina luziku lwa zitu ko. Kansi, vava mavimbu mayokwanga, ke ntangwa zawonso ko diasonganga vo wantu awaya ke bafwanukina zikwa ko.

Tulenda bakula diambu diadi muna lusansu lwa lufwa lwa Saulu wa Ntinu ye wan’andi tatu. Yau ayá bafwa muna vita ina banwana ye Afelesetia. Mosi muna wana awaya i Yonatane, ona wakala nkundi ambote a Davidi ye nkwa kwikizi. Vava makesa ma Aneyisaele bakala kuna Yabese-Ngiladi bawá dina diabwa, bayenda baka mavimbu mau yá yo yoka mo, i bosi bazika e visi. Kuna kwalanda, Davidi wasanisina Aneyisaele awana mu kuma kia vangu diau.—1 Sam. 31:2, 8-13; 2 Sam. 2:4-6.

Nkand’a Nzambi uvananga e vuvu kia lufuluku kwa mafwa—Nzambi ovutulwisa e mioyo mia wantu. Diakala vo muntu yokwa kayokwa yovo ve, Yave una yo nkuma wavutulwisa moyo yo kumvana nitu yampa. Aleke tatu akwikizi esi Ayibere ana batubwa van’esoka dia tiya muna lutumu lwa Nebukandesa wa Ntinu, ke bakala ye kuma kia mona wonga ko wa sia vo avo bayokelo vana tiya, Nzambi kalendi kubafula ko. (Dan. 3:16-18) I diau mpe diavangama kwa selo ya Yave ana bafilwa mu fulu ya salu yampasi muna luyalu lwa Nazi ana bavondwa yo yokwa. Selo yayingi yakwikizi ya Yave yafwila muna bomba ye mu mpila zankaka lembi sala konso lekwa kia nitu zau. Kana una vo i wau, Yave okubafula.—Lus. 20:13.

Ke divava ko vo Yave kavangulula nitu zau muna kubafula. Tulenda mona e ziku kiaki muna mpila Nzambi kefudilanga Akristu akuswa mu kwenda zingila kuna zulu. Nze Yesu ona ‘wavaninw’o moyo muna mwanda,’ Akristu akuswa befulwanga ye kiwuntu kina bakala kiau, kansi muna nitu nze za mbasi. Ke vena ndambu ko ya nitu au ya kimuntu ikwendanga yau kuna zulu.—1 Pe. 3:18; 1 Kor. 15:42-53; 1 Yoa. 3:2.

E vuvu kieto kia lufuluku, kitukanga muna lukwikilu lweto muna nkum’a Nzambi y’etima diandi dia lungisa e nsilu miandi, kansi ke mu dina ko diabwila evimbu dieto. (Mav. 24:15) Kieleka, ka tuzeye mawonso ko mu mpila ina Nzambi kavangila masivi muna fula wantu kuna nz’ankulu, ngatu una kevangila mo kuna sentu. Kana una vo i wau, tubundanga e vuvu kieto muna Yave. Watuvana ‘lusikidisu’ yovo ziku wau kafula Yesu.—Mav. 17:31; Luka 24:2, 3.

Akristu bezitisanga e fu ya kisi nsi ye nsiku mia luyalu muna diambu ditadidi mavimbu ma wantu. (2 Kor. 6:3, 4) Muna kuma kiaki, yoka yovo lembi yoka evimbu dia muntu, i nzengo za muntu yandi kibeni yovo za yitu yandi.