1, 2. Nkia kani kekalanga diau konso Nkristu? Yika nona.

ADIEYI o nkento kesianga e sungididi vava kesumbanga e bundu vana zandu? Ke sianga sungididi mu vonga kwa bundu ko yovo ina ya ntalu ayingi. Kansi, osianga sungididi muna bundu ina ye nsunga zambote, ina ke yawola ko. Ovavanga e bundu ina yatoma bwaka.

² Vava muntu kezayanga e ludi yo bak’e nzengo za vubwa, e ngwizani andi yo Nzambi ikwamanananga wokela. E kani diandi i kituka Nkristu azikuka. O zikuka kwaku ke disongele ko vo muntu kakituka mbuta. Kansi, kazikuka muna mwanda, i sia vo, kala ye ngwizani ambote yo Yave. Paulu wa ntumwa wazola vo Akristu kuna Efeso bazikuka muna mwanda. Wabakasakesa mu kala kintwadi muna lukwikilu yo kwamanana longoka mu kuma kia Yesu kimana bakituka ‘wantu azikuka yamuna tezo kia ntel’a luzalu lua Kristu.’—Efeso 4:13.

3. Nkia diambu dina betela vana vena nkutakani ya Efeso yo nkangu a Yave o unu?

 ³ E nkutakani ya Efeso yakikadila se mvu miayingi vava Paulu kabasonekena nkanda. Ayingi muna nkutakani yayina Akristu azikuka bakala. Kana una vo i wau, diavavanga vo akaka muna yau basiamisa e ngwizani au yo Yave. Diau adimosi mpe o unu, mpangi zayingi z’akala ye z’akento besadilanga Yave se mvu miayingi yo kituka Akristu azikuka. Kansi, vena ye mpangi zankaka muna nkutakani ke balueke mu tezo kiaki ko. Kasikil’owu, mazunda ye mazunda bevubwanga konso mvu. Divavanga vo ayingi muna yau bazikuka muna mwanda. Adieyi tuvova mu kuma kiaku?—Kolosai 2:6, 7.

4, 5. Nkia mambu mekalanga maswaswana vana vena Akristu azikuka? Nkia diambu dina betela muna yau awonso? (Tala fwaniswa kuna lubantiku lwa longi.)

⁴ Vava otalanga e bundu yabwaka itekwanga vana zandu, omonanga vo e bundu yayi ke ikalanga yafwanana ko. Kansi, vena ye mambu muna bundu yayi mesonganga vo yabwaka. Diau dimosi mpe ye Akristu azikuka. Ke bekalanga bafwanana ko mu mawonso. Mu nsi zaswaswana batuka, e mpila basansukila mpe yaswaswana. Ke bena ye kimbuta kimosi ko, konso muntu una ye mana kezolanga ye mana ke zolanga ko. Kana una vo i wau, Akristu awonso azikuka bena ye fu isonganga vo bazikuka kikilu muna mwanda. Ayeyi i yaka fu yayi?

⁵ O Nkristu azikuka otangininanga Yesu yo landa ‘ntambi zandi una ufwene.’ (1 Petelo 2:21) Yesu wavova vo diamfunu kikilu o muntu kazola Yave muna nsi a ntim’andi wawonso, muna fulumwinu yo nyindu andi wawonso. Kafwete mpe zola mfinangani andi nze una kekuyizolelanga. (Matai 22:37-39) O Nkristu azikuka osianga ngolo za lemvokela nkanikinu wau. E mpil’a zingu kiandi kisonganga vo zola kwandi muna Yave ye akaka i diambu disundidi o mfunu kwa yandi.

6, 7. (a) Nkia fu yankaka kesonganga o Nkristu azikuka? (b) Nkia yuvu tufwete kiyuvula?

⁶ O zola kimosi muna fu ina Nkristu azikuka kesonganga. (Ngalatia 5:22, 23) Osonganga mpe lulembamu, volo ye luzindalalu. E fu yayi ilenda kunsadisa mu zizidila e mpasi lembi funga makasi yo zizidila  lukendalalu lembi dimbula e vuvu. Muna longi dia yandi kibeni, o Nkristu azikuka ovavanga nkanikinu mia Nkand’a Nzambi mikunsadisa mu zaya edi diambote y’edi diambi. I bosi, vava kesadilanga e ntona zandi zalongwa, olendanga baka nzengo zambote. O Nkristu azikuka i ndiona okalanga walembama, okwikilanga vo luludiku ye nkanikinu mia Yave misundidi ke mu ngangu za yandi kibeni ko. * Osamunanga e nsangu zambote kuna vema kwawonso yo vanga mawonso kalenda mu siamisa ungudi muna nkutakani.

⁷ Kiakala vo se mvu miayingi tusadilanga Yave, konso muntu mu yeto olenda kiyuvula: ‘Nga vena ye nsobani mfwete vanga muna tanginina Yesu una ufwene? Nga vena ye diambu mfwete tomesa?’

8. Adieyi disonganga vo Yesu watoma zaya Nkand’a Nzambi yo bakula wo?

⁸ Yesu Kristu watoma zaya Diambu dia Nzambi ye watoma dio bakulanga. Kana nkutu vava kakala ye kimbuta kia mvu 12, wasadila sono ya Nkand’a Nzambi vava kamokenanga ye alongi muna tempelo. “Awonso banwidi, basivikidi muna zayi  wandi ye mvutu zandi.” (Luka 2:46, 47) Kuna kwalanda, vava kasamunanga e nsangu zambote, watoma sadila Diambu dia Nzambi muna sukisa mbeni zandi.—Matai 22:41-46.

9. (a) Nkia nkubika kekalanga zau Nkristu azikuka? (b) Ekuma tulongokelanga Nkand’a Nzambi?

⁹ Ndiona ozolele kituka Nkristu azikuka otangininanga e mbandu a Yesu yo sianga ngolo za bakula Nkand’a Nzambi. Ovavanga bakula mambu masina mena muna Diambu dia Nzambi, kadi ozeye wo vo e ‘madia mangolo i m’awana bazikuka.’ (Ayibere 5:14) O Nkristu ozolanga vua ‘zayi wa ludi’ wa Nkand’a Nzambi. (Efeso 4:13) Muna kuma kiaki, ukiyuvula: ‘Nga itanganga Nkand’a Nzambi lumbu yawonso? Nga ikalanga ye nkubika za longi dia mono kibeni? Nga ikalanga ye nsambila ya esi nzo konso lumingu?’ Vava olongokanga Nkand’a Nzambi, ofwete vavanga nkanikinu milenda kusadisa mu zaya e ngindu za Yave. I bosi, sadila nkanikinu miami vava obakanga e nzengo. O vanga wo dikusadisa mu wokesa ngwizani aku yo Yave.

10. Aweyi Nkristu azikuka kebadikilanga luludiku ye nkanikinu mia Nzambi?

¹⁰ O Nkristu azikuka mayingi kafwete vanga ke zaya kaka ko oma masonama muna Nkand’a Nzambi. Kafwete zolanga luludiku ye nkanikinu mia Nzambi. Kafwete songela zola kwaku muna tima kekalanga diau dia vanga luzolo lwa Yave, ke mu luzolo lwa yandi kibeni ko. Osobanga nkutu e mpil’a zingu kiandi, ngindu ye mavangu mandi. Kasikil’owu, otangininanga Yesu yo vuata kiwuntu kiampa, kina ‘kiavangilwa mun’owu wa luzolo lwa Nzambi muna ndungidi ye kwikizi.’ (Tanga Efeso 4:22-24.) Diamfunu mu sungamena vo Nzambi wasadila mwand’andi avelela mu fila awana basoneka Nkand’a Nzambi. Muna kuma kiaki, vava Nkristu kelongokanga Nkand’a Nzambi, mwand’a Nzambi ukunsadisanga mu wokesa zayi yo zola yo siamisa ngwizani andi yo Yave.

11. Nkia diambu kamona o Yesu vava kakala ova ntoto?

¹¹ Yesu muntu alunga kakala. Kansi vava kakala ova ntoto, Yesu wazinganga vamosi yo wantu alembi lunga. Mase ye mpangi zandi wantu alembi lunga mpe bakala. Kana nkutu alandi a Yesu basonganga e fu nze lulendo ye loko. Kasikil’owu, muna fuku wavitila lufwa lwandi, alongoki andi batantana kana nani muna yau wasunda o nene. (Luka 22:24) Kana una vo wantu alembi lunga, Yesu wazaya wo vo ke kolo ko alongoki andi bekituka Akristu azikuka yo sikidisa nkutakani. Muna fuku wauna, Yesu wasamba kimana bakala mu kintwadi. Walomba kwa Se diandi dia zulu vo yau awonso bakala mosi yo vova vo: “Nze ngeye Tata omu mono, omono mpe omu ngeye.” Wakudikila vo: “Bakal’amosi, nze yeto tumosi.”—Yoane 17:21, 22.

12, 13. (a) Wau vo tu Akristu, adieyi i kani dieto? (b) Aweyi mpangi mosi kalongokela o mfunu wa siamisa ungudi muna nkutakani?

¹² O Nkristu azikuka osiamisanga ungudi  muna nkutakani. (Tanga Efeso 4:1-6, 15, 16.) E kani dieto yeto Akristu i kala ‘twayikakiana,’ i sia vo, salanga entwadi. Muna kala twayikakiana, o Nkristu kafwete songanga lulembamu. Muna kuma kiaki, o Nkristu azikuka osianga e ngolo za siamisa ungudi muna nkutakani kana nkutu vava akaka bevanganga vilwa. Ukiyuvula: ‘Adieyi ivanganga avo mpangi ovangidi vilwa? Aweyi imonanga avo muntu umpangidi e mbi? Nga iyambulanga vovana yandi? Yovo isianga ngolo za vutulwisa luvuvamu?’ O Nkristu azikuka ovanganga mawonso muna venga e mambu, vana fulu kia kala nsoki a mambu.

¹³ Badika nona kia mpangi Uwe. Entete, wayambulanga vo usumuki wa mpangi wamfungisa makasi. I bosi, wabak’e nzengo za sadila Nkand’a Nzambi yo nkanda Estudo Perspicaz das Escrituras mu longoka lusansu lwa Davidi. Ekuma kasolela Davidi? Kadi Davidi mpe wamweswa e mpasi kwa selo yankaka ya Nzambi. Muna bong’e nona, Saulu wa ntinu wavavanga vonda Davidi, akaka muna nkangu bazola kuntuba matadi. Vakala mpe ye lumbu kasevua nkutu kwa nkaz’andi. (1 Samuele 19:9-11; 30:1-6; 2 Samuele 6:14-22) Kana una vo akaka bamvanganga oma mambi, Davidi wazolanga Yave yo kumbund’e vuvu. Davidi wafwilanga mpe akaka e nkenda. Mpangi Uwe wabakula vo diau dimosi kafwete vanga. Ekolo kalongokanga Nkand’a Nzambi, wamona vo kafwete soba e mpila kebadikilanga o vilwa wa mpangi zandi. Diavava vo kayambula yindula vilwa bamvanganga yo siamisa ungudi muna nkutakani. Nga diadi mpe i kani diaku?

14. Aweyi Yesu kasolelanga akundi?

¹⁴ Yesu Kristu wazolanga o wantu. Akala ye akento, aleke ye ambuta ye yingiana-ngiana nkutu bazolanga finama Yesu. Kansi, watoma solanga akundi andi. Wavovesa ntumwa zandi vo: “Oyeno nu [akundi ame], ovo nuvang’owu inukanikini.” (Yoane 15:14) Yesu wasola akundi andi vana vena alandi andi akwikizi ana bazolanga Yave yo kunsadila. Nga osolanga akundi ana bezolanga Yave ye nsi a ntima wawonso? Ekuma dinina diamfunu?

15. Nkia nluta bebakanga aleke vava bevanganga kikundi ye Akristu azikuka?

¹⁵ E bundu ina itelanga o mwini yau itoma bwakanga. Diau dimosi mpe, o zola kwa mpangi zeto kulenda kutusadisa mu kituka Akristu azikuka. Nga u nleke ona ovavanga bak’e nzengo mu kuma kia mpila ozolele sadila zingu kiaku? Avo i wau, diangangu mu sola akundi ana besadilanga Yave se vioka mvu miayingi, ana besiamisanga ungudi muna  nkutakani. Akundi awaya nanga bezizidilanga mambu mayingi mampasi ekolo besadilanga Yave. Balenda kusadisa mu sola e mpila yambote olenda sadila zingu kiaku. Vava okalanga yau vamosi, balenda kusadisa mu baka nzengo zambote yo kituka Nkristu azikuka.—Tanga Ayibere 5:14.

16. Aweyi ambuta muna nkutakani basadisila mpangi mosi ankento vava kakala nleke?

¹⁶ Mpangi Helga osungamenanga vo vava kafokola sikola, akwandi kuna sikola bamokenanga mu kuma kia makani mau ma kusentu. Ayingi muna yau bazola kwenda tanga diaka sikola zandá kimana babaka salu kifutanga nzimbu zayingi. Kansi, mpangi Helga wavava lusadisu lwa akundi azikuka muna nkutakani. Wavova vo: “Ayingi muna yau bansunda e kimbuta. Muna kuma kiaki, batoma kunsadisa. Bankasakesa yakota muna salu kia ntangwa ke ntangwa. Mvu ntanu yasala e salu kia kimviti a nzila. Se mvu miayingi miviokele kala, kansi ngina ye kiese wau yasadila mvu miayingi mia kileke kiame muna salu kia Yave. Kikuyibanzanga ko muna nzengo yabaka.”

17, 18. Adieyi dilenda kutusadisa mu sadila Yave una ufwene?

¹⁷ Avo tutanginini Yesu, tunungunuka muna mwanda yo kituka Akristu azikuka. Kikundi kieto yo Yave kiwokela, e tima dieto mpe dia kunsadila diwokela. O kala wazikuka muna mwanda disadisanga muntu mu sadila Yave una ufwene. Yesu wakasakesa alandi andi vo: “Nutemesa ntemo eno vana vena wantu, bamona mavangu meno mambote, bakembela S’eno wina kun’ezulu.”—Matai 5:16.

¹⁸ Tulongokele una Nkristu azikuka kalenda sadisila ampangi muna nkutakani. O Nkristu kafwete songanga mpe vo wazikuka muna mwanda mu mpila kesadilanga ntona zandi. Aweyi e ntona zeto zilenda kutusadisila mu baka nzengo zambote? Aweyi tulenda zitisila ntona za wantu ankaka? Tubak’e mvutu za yuvu yayi muna longi dilanda.