Longa Wan’aku

Timoteo​—Wakubama ye Luzolo lwa Sala

“NGA wakubama?” Nga wayuvulwa kala kiuvu kiaki?​—⁠O muntu wayuvula wazola zaya kana vo wakubama. Kasikil’owu, nanga edi kayuvula: ‘Nga una ye nkand’aku walongokela? Nga tangidi kala elongi diaku?’ Nze una tumona, Timoteo wakubama kakala.

Timoteo wakala mpe ye luzolo lwa sala. Nga zeye nsasa diambu diadi?​—⁠Vava Timoteo kabokelwa kasadila Nzambi, wavutula nze una wavova selo kiakaka kia Nzambi: “Mono oyu; untuma.” (Yesaya 6:⁠8) Wau vo wakubama yo kala ye luzolo lwa sala, Timoteo wakala ye zingu kiakiese. Nga zolele zaya una wakala e zingu kiandi?​—⁠

E mbanza Luseta kawutukila Timoteo, kwanda yakala ye Yerusaleme. Loi wa nkak’andi ye Yuniki wa ngudi andi, alongoki ambote a Sono bakala. Bayantika longa e Diambu dia Nzambi kwa Timoteo tuka muna kinsedia.​—⁠2 Timoteo 1:5; 3:15.

Nanga vava Timoteo kakala nleke, Paulu wantumwa yo Banaba bakingula Luseta muna nkangalu au antete mu salu kia samuna nsangu zambote. Nanga ngudi a Timoteo ye nkak’andi i ntangwa yayina bakituka se Akristu. Nga zolele wa e mpasi zabwila Paulu ye Banaba?​—⁠O wantu ana ke bazolanga Akristu ko, batuba Paulu matadi, vava kafwa e kiambu bankoka kuna mbazi a mbanza. Bayindula vo wafwa.

Awana bakwikila malongi ma Paulu banzunga, otelamene. Muna lumbu kialanda, Paulu ye Banaba bavaika muna Luseta, kansi kolo kiandwelo kiavioka, bavutuka diaka. Vava bavutuka, Paulu wavovesa alongoki vo: “Muna mpasi zayingi i tufwete kotela muna kintinu kia Nzambi.” (Mavangu 14:​8-​22) Nga zeye dina kazola vova Paulu?​—⁠Wasonga vo akaka bebangika awana besadilanga Nzambi. I bosi, Paulu wasoneka kwa Timoteo vo: ‘Awonso ana bazolele vumina Nzambi, bebangikwa.’​—⁠2 Timoteo 3:12; Yoane 15:20.

 Vava Paulu yo Banaba bakatuka muna Luseta, bavutuka kuna nzo zau. Vioka ngonde zakete, Paulu wanata Sila yo kwenda kasakesa alongoki ampa muna zunga ina kakingula. Vava balwaka muna Luseta, Timoteo kiese kiayingi kamona mu wanana diaka ye Paulu! Timoteo watoma yangalala vava kabokelwa mu kangala kumosi ye Paulu ye Sila. Timoteo watambulwila e mboka. Wakubama yo kala ye luzolo lwa kwenda.​—⁠Mavangu 15:40–16:⁠5.

Yau atatu kilometa zayingi bakangala mu malu, i bosi bakota mun’ekumbi dia maza. Vava bakulumuka, bayenda kuna Tesalonika kuna Ngerekia. Ndonga bakituka Akristu muna mbanza yayi. Kansi akaka bafunga makasi bakubika buka kia abangiki. E zingu kia Paulu, Sila ye Timoteo mu vonza kiakala, muna kuma kiaki bayenda kuna Beroya.​—⁠Mavangu 17:​1-10.

Paulu watokana mu kuma ki’akwikidi ampa muna Tesalonika, muna kuma kiaki watuma Timoteo, kavutuka kwakuna. Nga zeye ekuma?​—⁠Nkand’a Paulu kw’Akristu kuna Tesalonika uvovanga vo: ‘Kanusikidisa yo kunufiaulwisa.’ Nga zeye ekuma Paulu katumina nleke Timoteo muna zunga kiaki kia vonza?​—⁠Timoteo katoma zayakana ko kw’atantu, wakala ye luzolo lwa kwenda. Ediadi unkabu wayingi diavavanga! E nkingula yayi nkia nluta yatwasa? Vava Timoteo kavutuka kwa Paulu, wanzayisa lukwikilu lwasikila bakala lwau esi Tesalonika. Muna kuma kiaki, Paulu wabasonekena vo: “Twanufiaukidila.”​—⁠1 Tesalonika 3:​2-7.

Timoteo wasala kumosi ye Paulu muna mvu kumi mialanda. I bosi, Paulu wasiwa mu pelezo kuna Roma, e Timoteo kana una vo ke kolo ko mpe kavaikiswa mu pelezo, wayenda kakala yandi. Ekolo kakala muna pelezo, Paulu wasonekena esi Filipi nkanda, nanga Timoteo kasadila mu soneka wo. Paulu wavova vo: ‘Ngina ye vuvu kia tuma Timoteo kwa yeno, kadi kina yankwa ntima mosi nze yandi ko, on’osia kikilu o mambu meno o moyo.’​—⁠Filipi 2:​19-22; Ayibere 13:23.

Ekwe kiese miakala e mvovo miami kuna kwa Timoteo! Paulu watoma zolanga Timoteo kadi wakala ye luzolo lwa sala. Tuna ye vuvu vo ngeye mpe ovanga wo.

Yuvu:

○ E Timoteo akweyi kasansukila? Nkia diambu diabwa vava Paulu kakingula mbanza yayina e nkumbu antete?

○ Timoteo adieyi kavanga vava kabokelwa mu yikama Paulu ye Sila muna nkangalu au?

○ Timoteo aweyi kasongela unkabu? Ekuma Paulu katoma kunzolela?

[Mvovo mia Fwaniswa mina muna lukaya lwa 18]

Adieyi diabwa?