Longa Wan’aku

Samuele Wazindalala Vanga owu Wansongi

NGA wamona kala akaka bevanganga owu wambi?​—⁠ * Samuele wabamona. Wazinga yau va fulu kina olenda badikila vo e mambu mama ke malendi vangama ko. E fulu kiokio i saba kia Nzambi yovo sambilu diakala kuna Silo. Yambula twatala una Samuele kayenda kadila muna saba, vioka 3.000 ma mvu.

Una Samuele kawutukidi ko, o Kana wa ngw’andi wakala ye luzolo lwa wuta mwana. Lumbu kimosi vava kakala muna saba, Kana wasamba kwa Nzambi mu kuma kia diambu diadi. Ekolo kasambanga yo dodokela, befo kaka yanikukanga, lembi tumbula ndinga. Ele wa ngang’ambuta, wabanza vo Kana wakolwa kakala. Kansi, vava kabakula vo wakendalala kakala, Ele wansambula yo vova vo: “O Nzambi a Isaele okuvan’e ndomba unlombele.”​—⁠1 Samuele 1:⁠17.

I bosi, Samuele wawutuka, o Kana wayangalala, wavova kwa Elekana wa nkaz’andi vo: ‘Vava Samuele ketauka, ikunata kuna saba kimana kasadila Nzambi kwakuna.’ I una mpe kavanga! Muna kolo kiakina, Samuele nanga kimbuta kia mvu nyá yovo ntanu kakala.

Vava Ele kanunuva, wan’andi Kofene yo Finekase ke basadilanga Yave ko una ufwene. Batanga nkutu e zumba y’akento ana bayizanga mu sadila muna saba! Adieyi obenze kafwan’o vanga ese diau?​—⁠Wafwana kubatumba yo lembi kubayambula mu vanganga e mbi yayi.

Nleke ndiona Samuele, wau vo muna saba kasansukila, wamonanga e mbi ina bavanganga wan’a Ele. Nga Samuele walanda mbandu au ambi?​—⁠Ve, nze una kalongwa kwa mase mandi, wakwamanana vanga owu wansongi. Ka lukatikisu ko, Yave wafungila Ele makasi. Wafila ngunz’andi kazaisa  Ele una utumbilwa esi nzo andi, musungula yimpumbulu ya wan’andi.​—⁠1 Samuele. 2:​22-36.

Samuele wazindalala sala yo Ele muna saba. Fuku umosi vava Samuele kakala waleka, wawá ndinga yambokela. Samuele olundumukini kwa Ele, kansi Ele wamvovesa vo ke yandi ko wambokela. E diambu diadi diavangama diaka. Kansi, vava kabokelwa e nkumbu w’etatu, Ele wavovesa Samuele, ovo okubokela diaka, vova vo: “Vov’aka, e Yave, o nleke aku owa.” Vava Samuele kavova dio, Yave wamokena yandi. Ng’ozeye dina Yave kavova kwa Samuele?​—⁠

Nzambi wazayisa Samuele ekani Diandi dia tumba e nzo ya Ele. Oku mene-mene Samuele wakala ye wonga mu zayisa kwa Ele mana kavoveswa kwa Yave. Kansi Ele wadodokela Samuele vo: “Kunsweki dio ko.” I bosi, Samuele unsamunwini mawonso kavova Yave vo ma kevanga, nze una Ele kateka voveswa kwa ngunz’a Nzambi. Ele wavova vo: “Mbula [Yave] kavang’owu kamwene vo wambote.” Kuna kwalanda, Kofene yo Finekase bavondwa muna vita, Ele mpe wafwa.​—⁠1 Samuele 3:​1-18.

“Samuele okudidinge, o Yave kakala yandi.” Muna kolo kiakina, Samuele wakala se toko, ntela yambote muna zingu kia muntu. Ng’obenze vo diakete diakala kwa Samuele mu vangang’edi diansongi, wau vo akaka ke bavanganga wo ko?​—⁠Kana una vo diampasi diakala, Samuele wasadila Yave ye kwikizi muna zingu kiandi kiawonso.​—⁠1 Samuele 3:​19-21.

Aweyi tuvova mu kuma kiaku? Ng’olenda kala nze Samuele ekolo osansukanga? Ng’olenda sikila vanga edi diansongi? Ng’olenda simbinin’ekani dia lemvokela elongi dia Nkand’a Nzambi ye dina walongwa kwa mase maku? Avo i wau ovanga, oyangidika Yave ye mase maku.

[Mvovo Vana Yand’a lukaya]

Yuvu:

❍ O Samuele aweyi kayenda sadila muna saba kia Yave?

❍ Nkia fu yambi kazizidila Samuele?

❍ Samuele nkia mbandu ambote kasisa kw’aleke?