‘Okala Y’etima’
Finama Nzambi
‘Okala Y’etima’
NTANTU zayingi ditwasanga mu mona nzolw’eto mu mpasi yo fwa. Ka lukatikisu ko, tukendalalanga mu kuma kia lufwa lwa azolwa eto. Kansi, dia lufiaulwisu mu zaya vo Yave wa Nzambi wa Mvangi eto, ozeye ntantu zeto. Vana ntandu, Yave una y’etima dia sadila nkum’andi muna vutula moyo kwa mafwa. Tala vuvu kayika Yobi muna mvovo miandi miasonama muna Yobi 14:13-15.
Badika lusansu lwandi. Yobi wa nkwa ziku yo lukwikilu wabwilwa mpasi za mpila mu mpila, wavidisa mavwa mandi mawonso, wan’andi anzolwa bafwa, i bosi wabakama kimbevo kiangolo. Muna mpasi zandi, wadodokela kwa Nzambi vo: “Kele vo wadi kunsweka muna nsi a fwa [ziami kia wantu awonso].” (Tini kia 13) Yobi wabadikila lufwa nze mbaninu a mpasi zandi zawonso. Muna lufwa, okala nze lusalu lwantalu kasweka o Nzambi, ovevolwa muna mpasi ye ntantu. *
Nga nsi a fwa yikala se swekameno diakwele mvu dia Yobi? Ke wau ko kakwikilanga Yobi. Wavova diaka muna sambu vo: “Kele vo wadi kunsi’e kolo, yo kungindula!” Yobi wakala ye vuvu vo ke kala muna nsi afwa yakwele mvu ko, Yave kesinga kumvilakana ko. Yobi watezanesa e kolo kekala muna nsi a fwa nze “mbeka” i sia vo kolo kina muntu kevingilanga luvevoko muna salu kia ngolo. Nkia kolo? Wavova vo, “yavana iluaka mpevok’ame.” (Tini kia 14) Luvevoko lwalu i vaikiswa muna nsi afwa, i sia vo fulwa muna mafwa.
Ekuma Yobi kakadila ye ziku vo luvevoko lwandi lusinga lwaka? Ekuma kadi wazaya una Mvangi eto anzolwa kemonanga mu kuma kia asambidi Andi akwikizi afwa. Yobi wavova vo: “Wadi bokela yatambulwila: Wadi si’etima mun’evangu dia moko maku.” (Tini kia 15) Yobi wazaya wo vo vangwa kia moko ma Nzambi. Ka lukatikisu ko, o Mvani a Moyo ona walunga-lunga Yobi vava kakala muna vumu, ovutula moyo andi muna lufuluku.—Yobi 10:8, 9; 31:15.
E mvovo mia Yobi mikutulonganga vo: Nze una Yobi kavanga, Yave muna nkenda zandi otoma finamanga awana beyekekanga mioyo miau vana moko mandi yo yambula vo bawumbwa yo kitulwa nze nkangu wa zolakana vana meso mandi. (Yesaya 64:8) Yave otoma vwanga asambidi andi akwikizi o mfunu. Una ‘y’etima’ dia akwikidi ana befwanga. Nkwa ngangu mosi wavova vo, e mvovo wa Kiyibere wasekolwa vo ‘etima,’ utoma songanga luzolo lwa muntu olakukilanga nkw’andi moyo. Elo, Yave ke sungamenanga kaka asambidi andi ko kansi ovwidi etima dia kubavutula moyo.
Dia matondo mu zaya vo muna nkanda Yobi una vo, umosi muna nkanda miantete mia Nkand’a Nzambi, Yave wasengomona ekani diandi dia fula amafwa. * Yave ozolele vo wazinga diaka ye azolwa aku ana bafwa. E vuvu kiaki kilenda kusadisa mu zizidila ntantu za fwilwa azolw’aku. Ekuma olembi longokela mayingi mu kuma kia Nzambi ndioyo anzolwa? Aweyi lenda yambulwila vo kawumba kimana wakituka se mosi muna awana bemona e ndungana ekani Diandi?
[Mvovo Vana Yand’a lukaya]
^ tini. 4 Nkanda umosi usonganga vo vava Yobi kavova vo ‘unsweka,’ edi kavova, “undunda va fulu kiasikila nze lusalu lwantalu.” Nkanda wakaka usekolanga mvovo wau vo “unsweka nze lusalu lwantalu.”
^ tini. 8 Muna zaya diaka mayingi mu kuma kia nsilu a Nkand’a Nzambi wa lufuluku lwa mafwa muna nz’ampa yansongi, tala kapu kia 7 kia O Nkand’a Nzambi Adieyi Kieleka Kelonganga? wavaikiswa kwa Mbangi za Yave.
