Longoka Muna Nkand’a Nzambi

Nga Vena ye Vuvu mu Kuma kia Mafwa?

Elongi diadi dina ye yuvu ikutokanesanga ye disonga vana olenda tangila e mvutu za yuvu yayi muna Nkand’aku a Nzambi. Mbangi za Yave bena ye kiese kia kusasila e mvutu zazi.

1. Nkia vuvu bena kiau amafwa?

Vava Yesu kalwaka kuna Betania yakala lukufi ye Yerusaleme, o nkundi andi Lazaro wafwa se vioka lumbu yá. Yesu, Mareta ye Maria bayenda vana fulu kiaziamina Lazaro. Vana vau o nkangu ubalende. Nga olenda yindula e kiese kina Mareta yo Maria bamona vava Yesu kafula e Lazaro?—Tanga Yoane 11:20-24, 38-44.

Mareta wakwikilanga vo amafwa befuluka. Selo yakwikizi ya Yave bazaya wo vo kuna sentu Nzambi ofula amafwa kimana bazinga diaka ovo ntoto.—Tanga Yobi 14:14, 15.

2. Ayeyi i nkala amafwa?

Kana una vo e ngolo za moyo ziyikilwanga vo “mwanda” zisadisanga wantu yo bulu mu zinga, ke tuna ye mwanda ko usisanga e nitu yo zingila va fulu kiakaka. (Kimpovi 3:19; Etuku 7:21, 22) Muna ntoto twavangilwa. (Etuku 2:7; 3:19) Vava tomfo tweto tufwanga e ngindu zeto mpe zifwanga. Muna kuma kiaki, vava Lazaro kafuluka kavova kana diambu dimosi ko mu kuma kia lufwa lwandi, kadi amafwa ke bazeye diambu ko.—Tanga Nkunga 146:4; Kimpovi 9:5, 10.

Dialudi vo amafwa ke bemonanga mpasi ko. Muna kuma kiaki, elongi dia sia vo Nzambi obangikanga wantu vava befwanga, ke dialudi ko. Luvunu dilonganga mu kuma kia Nzambi. Nzambi omenganga e ngindu za sia vo wantu ku bilungi bekwendanga.—Tanga Yeremiya 7:31.

  3. Nga tulenda mokena ye mafwa?

Amafwa ke balendi vova ko. (Nkunga 115:17) Kansi, mbasi zambi bevovananga yo wantu muna kubavunginika vo mianda mia mafwa bevovananga yau. (2 Petelo 2:4) Yave wasima wantu balembi mokena ye mafwa.—Tanga Nsiku 18:10, 11.

4. Nani ofuluka?

Muna nz’ampa ulolo wa wantu bena muna ziami bevutuka zinga diaka. Kana nkutu awana bavanganga o bi wau vo ke bakala yo zayi wa Yave ko, befuluka.—Tanga Luka 23:43; Mavangu 24:15.

Awana befuluka belongoka e ludi mu kuma kia Nzambi yo songa lukwikilu lwau muna Yesu yo kulemvokela. (Lusengomono 20:11-13) Vo i awana befuluka yo vanga oma mambote, bevwa o moyo a mvu ya mvu ova ntoto. Kansi vekala y’awana befuluka bekwamanana vanga oma mambi. Wau vo befundiswa mun’owu wa mavangu mau, o lufuluku lwau luyikilwanga vo “lufuluku lua mfundu.”—Tanga Yoane 5:28, 29.

5. O lufuluku adieyi lukutulonganga mu kuma kia Yave?

O lufuluku lukala kikilu kadi Nzambi wafila Mwan’andi kavana moyo andi mu kuma kieto. O lufuluku lusonganga o zola kwa Yave yo wete wandi kuna kwa yeto.—Tanga Yoane 3:16; Roma 6:23.

Muna zaya diaka mambu makaka, tala e kapu kia 6 ye 7 kia nkanda wau wavaikiswa kwa Mbangi za Yave. O Nkand’a Nzambi Adieyi Kieleka Kelonganga?

[Foto ina muna lukaya lwa 26]

Adami muna mbundukutu a ntoto kasemenwa