Nkand’a Nzambi Zingu kia Wantu Usobanga

NKI kiafila mwan’a ndumba mosi mu vutukila dibundu kasansukila? Tanga dina kevova.

Owau ngina y’ekani diasikila muna zingu.”​—LISA ANDRÉ

MVU KAWUTUKA: 1986

NSI: LUXEMBOURG

LUSANSU: MWAN’ANKOLAMI

ZINGU KIAME: Kuna Bertrange yasansukila, mbanza yazala ye mavwa, yatoma velela, yaluvuvamu, ina lukufi ye mbanz’a Luxembourg. Ntanu twawutuka, mono i mwan’ansuka. Mase mame Mbangi za Yave, bavanganga mawonso muna kutulonga e nkanikinu mia Nzambi.

Vava yakituka se dumbelele, yayantika katikisa mana Mbangi za Yave belonganga. Entete kiasianga diambu diadi sungididi ko, kansi malembe-malembe lukwikilu lwame lwayantika yoya. Mase mame bavanganga mawonso muna kunsadisa yasikila muna ludi, kansi yavezanga lusadisu lwau. Kuna kinsweki, yayantika vanga kikundi y’aleke ana bakala vo yimpumbulu. Yayangalelanga e mpil’a zingu bakala kiau. Nkinzi, vukana e nitu, nua diamba ye malavu, i zingu twakala kiau. Kuna lubantiku yayangalelanga kala vamosi ye wantu yamonanga vo zingu kiambote bakala kiau.

Kana una vo i wau, kiakala ye kiese ko. E zingu kiame ke kiakala ye nsasa ko vava yakangalanga y’akundi awaya. Kansi, yatokananga mu kuma kia kondwa unsongi umonekanga ova nza. Ekolo mvu miaviokanga, e ngindu zame zatokananga kikilu.

UNA NKAND’A NZAMBI WASOBELA ZINGU KIAME: Lumbu kimosi vava yalungisa mvu 17, e ngindu zame zatoma tokana kikilu. Ngudi ame wabakula vo kiakala ye kiese ko, wamvovesa mu longoka diaka Nkand’a Nzambi. Wankasakesa mu fimpa malongi ma Nkand’a Nzambi yo bak’e nzengo za lemvokela mo yovo ve. E moko kiaki kialukasakeso, kiansadisa kikilu. Yatambulwila longoka Nkand’a Nzambi ye nsang’ame Caroline yo Akif wa nkaz’andi. Akif kasanswa kwa Mbangi za Yave ko, kansi mu kimbuta kakitukila Mbangi a Yave. Muna kuma kia mpil’a zingu kakala kiau, yamonanga vo ndenda vova mawonso kwa Akif. Diamfunu kikilu diakala kwa mono.

Yazaya wo vo, mu kuma kia mpil’a zingu yakala kiau, kiafwana yikilwa Mbangi a Yave ko. Kansi kuna lubantiku, yayindulanga vo mana yavanganga muna zingu kiame mono kaka matadidi. Muna longoka o Nkand’a Nzambi, yabakula vo mavangu mame Yave makendelekanga. (Nkunga 78:​40, 41; Ngana 27:​11) ­Yabakula vo wantu akaka mpe makendelekanga.

Vava yakwamanana longoka Nkand’a Nzambi, yasolola ziku yasikididi mu kwikila vo ediadi Diambu dia Nzambi kikilu. Kasikil’owu, yalongoka ungunza wayingi wa Nkand’a Nzambi walungana mu mpil’esivi. O zayi wau wansadisa mu fokola lukatikisu yakala lwau.

Vava yalungisa mvu mosi tuka yayantikila longoka Nkand’a Nzambi, mono ye mase mame twayenda kingula mpangi ame eyakala wasadilanga kuna vula dia Mbangi za Yave kuna Alemanha. Vava yamona kiese kakala kiau, ediadi diankasakesa kikilu. Kiese nkia mpila yayi mpe yavavanga. Yatoma yangalela mpe zingu kia mpangi zakaka basadilanga kuna vula. Baswaswana kikilu bakala yo wantu yavanga yau kikundi, ana bakondwa unsongi ye azodi a nkembo. Ke vavioka kolo ko, yasamba kwa Yave ye nsi a ntima wawonso, yasia nsilu a kunsadila muna zingu kiame kiawonso. Vava yalungisa mvu 19, yavubwa mu songa vo yakiyekola kwa Yave.

MPILA YABAKILA E NLUTA: Owau ngina y’ekani diasikila muna zingu. Imonanga kiese kia longa oma ma Nkand’a Nzambi kw’akaka yo kubasadisa bazaya Yave ye nsilu miandi mu kuma kia kusentu. E yitu yame mpe bevwanga e nluta, kadi ke betokananga diaka ko mu kuma kiame.

Nzeye wo vo mambu mayingi mambi yavanga, kansi kizolanga mo yindula ko. Isianga e sungididi muna nkenda za Yave yo zola kwandi kesonganga kwa mono. Kieleka, ikwikilanga muna sono kia Ngana 10:​22, kivovanga vo: “O lusambulu lua Yave luvwamisanga: ketensekanga ko mpasi ko.”

 [Mvovo mia Sina muna lukaya lwa 12]

“Nkinzi, vukana e nitu, nua diamba ye malavu, i zingu twakala kiau”

[Mvovo mia Sina muna lukaya lwa 13]

“Nzeye wo vo mambu mayingi mambi yavanga, kansi kizolanga mo yindula ko”