Longoka Muna Nkand’a Nzambi

Adieyi Dibwa Muna Lumbu kia Lufundisu?

Elongi diadi dina ye yuvu olenda kiyuvula ye disonga vana olenda sololwela e mvutu za yuvu yayi muna Nkand’a Nzambi. Mbangi za Yave bena ye kiese kia kusasila e mvutu zazi.

1. Lumbu kia Lufundisu i Nki?

Nze una tumwene muna fwaniswa va koko kwalunene, ndonga beyindulanga vo muna lumbu kia lufundisu o wantu betelama vana ndose a kunda kia Nzambi yo fundiswa mun’owu wa mavangu mau. Akaka besendwa yo moyo kun’ezulu, vo i akaka betubwa kuna bilungi bia tiya. Kansi, mun’owu wa Nkand’a Nzambi, ekani dia lumbu kia lufundisu i vevola wantu muna mpasi. (Nkunga 96:​13) Nzambi watumba Yesu se mfundisi. Oyandi ovutulwisa unsongi kwa wantu.​—Tanga Yesaya 11:​1-5; Mavangu 17:31.

2. E Lumbu kia Lufundisu Aweyi Kivutulwisila Unsongi?

Vava Adami wa muntu antete kakolamena Nzambi kuna lukanu, wasambukisa esumu, mpasi yo lufwa kwa mbongo andi yawonso. (Roma 5:​12) Muna singika e mbi yayi, Yesu osinga futumuna wantu muna lufwa. Nkanda Lusengomono usonganga vo ediadi divangama muna luyalu lwa Kristu Yesu lwa funda dia mvu.​—Tanga Lusengomono 20:​4, 11, 12.

Awana befulwa ke befundiswa mu kuma kia mana bavanga vitila lufwa lwau ko, kansi mu mana bevanga vava mivaikiswa e “nkanda” miyikwanga muna Lusengomono kapu kia 20. (Roma 6:7) O Paulu wa ntumwa wavova vo muna buka ki’awana befulwa yo vewa elau dia longoka mu kuma kia Nzambi, mukala ‘ansongi y’ana balembi songa.’​—Mavangu 24:15.

3. Nkia mambu mevangama muna Lumbu kia Lufundisu?

Awana bafwa lembi zaya Yave wa Nzambi yo kunsadila, bekala y’elau diasoba zingu kiau yo vanga edi diambote. Avo bavangidi wo, o lufuluku lwau lukala se “lufuluku lua moyo.” Kansi, akaka befuluka, ke betambulwila longoka nkanikinu mia Yave ko. Muna kuma kiaki, lufuluku lwau lukala se “lufuluku lua mfundu.”​—Tanga Yoane 5:​28, 29; Yesaya 26:10; 65:20.

Kuna mfoko a lumbu kia lufundisu kia funda dia mvu, Yave okitula wantu awonso alemvoka se alunga. (1 Korinto 15:​24-​28) Ekwe nsambu bevwa wantu awaya! Vava wantu alunga betontwa lutonto lwansuka, Nzambi ovaikisa Satana wa Nkadi Ampemba muna mbilu kakala mu funda dia mvu. Satana ovukumuna diaka wantu kimana bayambula sadila Yave, kansi awana bebembola Satana bezinga ye kiese ova ntoto yakwele mvu.​—Tanga Yesaya 25:8; Lusengomono 20:​7-9.

4. Nkia lumbu kiakaka kia lufundisu kitwasa nsambu kwa wantu?

Nkand’a Nzambi usadilanga mpe e mvovo “lumbu kia lufundisu” mu yika lufwasu lwa nza yayi. E lumbu kiaki kia lufundisu mu kinsalukisa kikwizila, nze una kiayizila Kizalu muna lumbu ya Noa yo fwasa yimpumbulu yawonso. Diakiese kikilu vo o lufwasu lwa “akwa luvezo” lufinamanga, luziula e nzila kimana wantu ansongi bazinga mu nz’ampa eyi ‘ikalwa kwa ndungidi.’​—Tanga 2 Petelo 3:​6, 7, 13.

Muna zaya diaka mambu makaka, tala muna lukaya lwa 213-​215 lwa nkanda wau wavaikiswa kwa Mbangi za Yave. O Nkand’a Nzambi Adieyi Kieleka Kelonganga?

[Foto ina muna lukaya lwa 16]

“LUFUNDISU LWANSUKA,” KIA GUSTAVE DORÉ, 1832-​1883

[Avwe a Foto]

Fwaniswa kia Doré