Nga Ozeye?

WINIKINA MU

Nga Ozeye?

Ayuda a tandu kiantete aweyi bakubikilanga evimbu muna zikwa?

Ayuda mu nzaki bazikilanga mafwa mau, nanga muna lumbu kina kafwanga o muntu. Mu kuma yole bavangilanga e diambu diadi. Kiantete, muna nsungi a mbangazi evimbu diawolanga mu nzaki. Kiazole, mu tandu kiakina, wantu bayindulanga vo olunda evimbu mu lumbu yayingi i kondwa luzitu kwa mvumbi ye esi nzo andi.

E Nsangu Zambote basoneka antumwa ye mu nkanda Mavangu uyikanga tezo kia mvumbi yá zazikwa muna lumbu kina bafwa. (Matai 27:57-60; Mavangu 5:5-10; 7:60–8:2) Kuna nz’ankulu, Rakele wa nkaz’a nzolwa a Yakobo wafwa vava Yakobo y’esi nzo andi bakala mu nkangalu. Vana fulu kia nata evimbu diandi kuna ziami kiau, Yakobo wanzika muna “nzil’a . . . Beteleme.”—Etuku 35:19, 20, 27-29.

O lusansu lwa Nkand’a Nzambi lusonganga vo Ayuda, mayingi bavanganga muna kubika yo zika evimbu. E yitu ye akundi bayolesanga o mvumbi, bankusanga makaya ye mafuta mansunga yo kunzinga va nlele. (Yoane 19:39, 40; Mavangu 9:36-41) Mfinangani yo wantu akaka bayizanga mu songa nkenda zau yo fiaulwisa ana bafwidilu.—Maku 5:38, 39.

Nga Yesu wazikwa nze una Ayuda bazikilanga mvumbi zau?

Ayuda ayingi bazikanga mvumbi zau muna nduku zatimwangwa muna matadi makala kuna nsi a Isaele. Muna vanganga wo, batangininanga akulu au. Abarayama, Sara, Isaki yo Yakobo bazikwa muna nduku ya via dia Makepela edi diakala mfinangani yo Keberone.—Etuku 23:19; 25:8, 9; 49:29-31; 50:13.

Yesu wazikwa muna nduku yatimwa muna nsenzele. (Maku 15:46) E nduku yayina yakala ye mwelo akete. Muna kati kwa nduku mwavaulwanga fulu ina yasiwanga mavimbu makaka ma esi nzo. Vava evimbu diawolanga, visi yayuma yasiwanga mu mbungwa yalundilwanga e visi nze una wantu bavanganga muna lumbu ya Yesu. E diadi diasadisanga mu sisa e fulu muna luziku lwa wantu akaka.

O Nsiku wa Mose wakanikina vo wantu ke balendi vanga nkubika za luziku ko muna Lumbu kia Vundu. Wau vo Yesu wafwa vitila ola tatu una Lumbu kia Vundu ke kiayantikidi ko, Yosefe mwisi Arimataya y’akaka banzika lembi kubika evimbu diandi una ufwene. (Luka 23:50-56) Muna kuma kiaki, akundi a Yesu bayenda kuna nduku kazikilwa vava Lumbu kia Vundu kiavioka muna toma kubika evimbu diandi.—Maku 16:1; Luka 24:1.