E kiuvu kiaki kiyuvulwanga mu kuma kia nsilu kasila Yesu kwa kimpumbulu wavondwa kumosi yo yandi vo ozingila muna Paradiso. Yesu wavova vo: ‘Kieleka isamunwini o unu vo, okala yame muna Paradiso.’ (Luka 23:43) Ng’omwene? Yesu kayika fulu ko kikala e Paradiso yayina. Nga Yesu wavova vo kimpumbulu kiakina ozinga kumosi yo yandi kun’ezulu?

Entete, yambula twabadika kana vo kimpumbulu kiakina wakala ye vuvu kia kwenda kun’ezulu. Divavwanga vo awana bena ye vuvu kia vwila moyo kun’ezulu bavubwa muna maza ye muna mwand’avelela yo kituka s’alongoki a Yesu akuswa yo mwand’avelela. (Yoane 3:3, 5) Bafwete zingila ngwizani ye nsiku mia nkal’ambote mia Nzambi yo yima e fu nze unsongi, kwikizi ye nkenda. (1 Korinto 6:9-11) Divavwanga mpe vo basikila ye kwikizi kwa Nzambi ye kwa Kristu yakuna mfoko a zingu kiau ova ntoto. (Luka 22:28-30; 2 Timoteo 2:12) Muna lungisa kaka e nsiku miami i bekuyifwanisa mu fulwa yo tambula mbebe ampwena yikubavingilanga kun’ezulu, i sia vo, sala se nganga yo yala e nza kumosi yo Kristu mun’efunda dia mvu.—Lusengomono 20:6.

Nswaswani ye wantu awaya, o mumpanga-mayi wakala vana ndambu a Yesu wazinga nze kimpumbulu yo fwila wowo. (Luka 23:32, 39-41) Kansi, wasonga luzitu vava kavovesa Yesu vo: “Ungindula vav’oluaka muna kintinu kiaku.” (Luka 23:42) Kavubwa ko yovo kala nlongoki akuswa a Yesu yo mwand’avelela ngatu songa kwikizi muna zingu kiandi kiawonso. Nga diadi kala diansongi kwa Yesu mu kunsila nsilu wayala muna kintinu ki’ezulu kumosi ye selo ana bazizidila ye kwikizi muna zingu kiau kiawonso?—Roma 2:6, 7.

Muna bong’e nona: Avo muntu ulombele ndoloki mu kuma kia nzimbu kayiyidi, nanga olenda kunloloka yo lembi zo kumfutisa. Kansi, nga olenda kumbunda e vuvu yo kumvana e mbebe ya lunga-lunga kinkita kiaku yovo esi nzo aku? Ve kikilu. Ovana kaka e mbebe yayi kw’awana otoma bundanga vuvu. Diau adimosi mpe, awana bena ye vuvu kia zingila kun’ezulu bafwete songa e ziku vo bafwana bundwa vuvu yo tatidila nkanikinu miansongi mia Nzambi vava beyala e nza. (Lusengomono 2:10) Kana una vo o kimpumbulu ndiona waviluka ntima muna miniti miansuka mia zingu kiandi, kansi kasonga kwikizi ko.

Nga Yesu wavovesa kimpumbulu ndiona vo okwenda yandi kun’ezulu muna lumbu kiakina? Ediadi ke dialudi ko, wau vo Yesu kayenda kun’ezulu ko muna lumbu kiakina. Kansi, wakala “muna ngudi a ntoto,” i sia vo muna ziami mu lumbu tatu. (Matai 12:40; Maku 10:34) Kana nkutu kunima lufuluku lwandi, wakwamanana ova ntoto muna lumbu 40 una katombokele ko kun’ezulu. (Mavangu 1:3, 9) Muna kuma kiaki, e kimpumbulu, kayenda kun’ezulu ko yo Yesu muna lumbu kiakina.

Nkia Paradiso kekota e kimpumbulu kiakina? Vava kefulwa, e kimpumbulu kiakina ozingila ova ntoto muna Paradiso keyala o Yesu. (Mavangu 24:15; Lusengomono 21:3, 4) Muna zaya diaka mambu makaka mu kuma kia Paradiso ye dina kevavanga o Nzambi, mokena ye mosi muna Mbangi za Yave.