YINDULA vo una yo nkundi ona otoma zolanga, kansi ovenge diambu dina kubakwidi ko. Akaka batumbidi evangu y’ekani diandi yo vova vo nkundi aku nkwa nsoki. Nga okwikila muna mvovo miau mu nzaki zawonso yovo ovingila yavana yandi kibeni kekuzingulwila o lusansu? Avo kuwananene ko yo nkundi aku muna kuzayisa dina dibwidi, nga ozindalala yo lembi kuntumba vana vau?

Una kwavene e mvutu ko, nanga ovava zaya mambu makaka. Nanga olenda kiyuvula: ‘Nga ntomene zaya o nkundi ame? Ekuma itoma kunzolelanga?’ Ke diambi kwandi ko mu vanga wo. Owau se yindula: Nga katufwete vanga yuvu yayi ko mu kuma kia Nzambi?

Nanga dilenda kala diampasi kwa ngeye mu bakula mambu makaka kevanganga o Nzambi yovo katikisa e kuma kayambulwila vo mambu mama mavangama. Vena yo ulolo wa wantu balenda kuvovesa vo Nzambi nkwa nsoki yo kuvukumuna watumba ekani diandi. Nga ovingila yavana ozaya mayingi mu kuma kia diambu diadi? Olenda vana e mvutu za kiuvu kiaki avo otome zaya kikilu Nzambi. Ukiyuvula: ‘Nkia mpila nkundi kena o Nzambi kuna kwa mono?’

Avo zingu kiaku kiampasi, nanga olenda vova vo Nzambi ke nkundi ambote ko. Kansi, yindula edi: Nga Nzambi nkwa kuma muna mpasi zaku? Nze una tumwene kala, o Satana i ‘nyadi a nza yayi’ ke Yave ko. (Yoane 12:​31) Ozevo, Satana yandi otwasanga ulolo wa mpasi ye mavangu ma nsoki ova nza. Tumonanga mpe e mpasi mu kuma kia usumuki weto ye mambu makaka mekutubwilanga kuna kinsalukisa.

Ameyi i mavangu ma Nzambi? Badika dina kevovanga o Nkand’a Nzambi: Nzambi “wavang’ezulu ye nza,” lekwa yawonso kumosi ye nitu eto ‘yavangilwa mu mpil’esivi,’ Yave i “Nzambi ona wina yo mwand’aku vana koko.” (Nkunga 124:8; 139:14; Daniele 5:​23) Mawonso mama nki mesonganga?

Mesonganga vo muna Mvangi eto, i twinina o moyo ye tufulumwininanga. (Mavangu 17:​28) Disongele vo lukau lwa moyo, o vienga kwa lekwa yituzungidi ova nza, lau dia songa o zola yo vanga kikundi, mona o ntomo a madia, lau dia simba o nkw’aku, wá mazu ye wá nsunga ye nsudi, mawonso mama, lukau lwa Nzambi. (Yakobo 1:​17) Nga kukwikidi ko vo mawonso mama mekitulanga Nzambi se Nkundi ambote ona tulenda zola yo bunda e vuvu?

Nanga dilenda kala diampasi kwa ngeye mu bunda Nzambi e vuvu. Olenda yindula vo kulendi zaya Nzambi ko yamu tezo kia kumbunda e vuvu. Muna malongi mama makete, katulendi sasila ekuma yawonso ko ina wantu befundisilanga Nzambi yo kumbadikila vo nkwa nsoki. Kansi, nga ke diambote ko mu vanga ngolo kimana watoma zaya Nzambi? * Tuna ye vuvu vo avo ovangidi wo, ozaya e ludi mu kuma kia Nzambi. Nga Nzambi kwa nsoki? Ve kikilu, kadi “Nzambi i zola.”​—41 Yoane 4:8.