AKAKA BEVOVANGA VO: “Wau vo Nzambi yandi oyalanga e nza, yandi kaka olenda twasa e sumbula. Nzambi nkwa nsoki kikilu.”

O NKAND’A NZAMBI ADIEYI KEVOVANGA: ‘E nza yawonso mu wisa kia ndiona wambi ilele.’ (1 Yoane 5:19) Nani ndioyu ‘wambi’ oyikwanga ovava? Nkand’a Nzambi ukunyikilanga vo Satana. (Matai 13:19; Maku 4:15) Nga diadi dialudi? Yindula edi: Wau vo Satana yandi oyalanga e nza, ovukumunanga wantu bakala akwa loko, keto yo kondwa kwa ngangu nze yandi kibeni. Nga diadi ka dilendi kutusadisa ko mu zaya ekuma wantu befwasilanga o ntoto una bezingilanga? Akwa ngangu ayingi bevovanga vo olembi lunga-lunganga o ntoto ditwasanga sumbula yo sia zingu kia wantu mu vonza.

Ozevo, ekuma Nzambi keyambulwilanga Satana kakala ye wisa kia vukumuna wantu? Muna zaya e mvutu, yambula twabadika ntete dina diabwa kuna lubantiku lwa lusansu lwa nza vava mase meto mantete bakolamena luyalu lwa Nzambi. Tuka kolo, o wantu betangininanga e mbandu au yambi. Wau vo babembola luyalu lwa Nzambi, o wantu bayisia vana moko ma Satana wa mbeni a Nzambi. O Yesu wayikila Satana vo ‘nyadi a nza yayi.’ (Yoane 14:30) Nga Satana oyala yakwele mvu? Ve kikilu.

Ozevo, Yave * keyangalelanga ko mona e mpasi kekutumwesanga o Satana. Kansi, Nzambi omonanga ntantu mu kuma kia mpasi za wantu. Muna bonga e nona, vava e zula kia Isaele bakalanga mu mpasi o Nkand’a Nzambi uvovanga mu kuma kia Nzambi vo: “Muna mpasi zau zawonso i kamwene mpasi.” (Yesaya 63:9) Ke kolo ko, Nzambi a nkenda, ofwasa luyalu lwa nsoki lwa Satana. Wasola Mwan’andi Yesu Kristu mu yala se Ntinu ansongi yakwele mvu.

AWEYI UNINA MU DIAMBU DIADI: Kana una vo luyalu lwa Satana ke lulendanga tanina wantu muna sumbula ko, o luyalu lwa Yesu luvanga wo. Yesu watanina alongoki andi vava tembwa kiangolo kiabwa muna mbu. Muna Nkand’a Nzambi tutanganga vo: “Otumbidi e tembwa, yo voves’o mbu vo: Dingalala, kal’e pi-i. E tembwa kidingalele, vakedi kikilu e pi-i.” Alongoki bavovele vo: ‘Ondioyu ozevo nani, wina vo, e tembwa yo mbu unwididi?’ (Maku 4:37-41) E diambu diadi i ziku kikutusonganga vo o Yesu otanina awonso bekunlemvokelanga vava keyala se Ntinu.—Daniele 7:13, 14.