WANTU ayingi babwilwa kala diambu diabatokanesa yo vava lusadisu. Landila diambu dibwidi, tulenda vava nkundi una vo nkwa nkenda ye ovwidi ndekwa zafwana muna singika e diambu tunwananga diau. E fu kia songa nkenda yo kala ye ndekwa, kilenda kitula muntu se nkundi akieleka.

Akaka nanga balenda mona diau adimosi mu kuma kia sambu. Vana fulu kia finama Nzambi una vo osundidi wantu awonso, oyau besambilanga asantu. Beyindulanga vo, asantu balenda kubafwila e nkenda wau vo yau babangikwa kala yo nwana ye mpasi zina benwananga zau o wantu. Muna bong’e nona, vava wantu bevidisanga lekwa, besambanga kwa António Pádua wa “Mveledi” una vo i nzambi a lekwa yavila yovo yayiwa. Muna lomba lusadisu mu kuma kia bulu kiyelanga, wantu besambanga kwa Francisco de Assis, vava bevidisanga e lekwa yovo bekendalalanga besambanga kwa Judas Tadeu.

Mun’owu wa Nkand’a Nzambi, nga diambote mu samba kwa asantu? Wau vo vava tusambanga, Nzambi tumokenanga yandi, tufwete vav’o zaya e diambu edi: Nga Nzambi owanga e sambu yeto? Tufwete kukiyuvula mpe: Aweyi Nzambi kebadikilanga e fu kia sambila asantu?

E fu kia sambila asantu, mun’elongi dia lomba lusadisu muna asantu kiatuka, dilongwanga muna dibundu dia Katolika. O nkanda Nova Enciclopédia Católica, usasilanga e fu kiaki vo: “Lwakisa e ndomba za muntu kwa Nzambi muna lusadisu lwa asantu.” Ozevo, ndiona osambanga kwa asantu nanga okwikilanga vo otambula edienga dia Nzambi, kadi oyindulanga vo asantu basambulwa vana ndose a Nzambi.

Nga i diau ulonganga o Nkand’a Nzambi? Akaka bevovanga vo Paulu wa ntumwa yandi wayantika evangu dia sambila asantu. Muna bonga e nona, vava kasonekena esi Roma wavova vo: “Inudodokelele, abunzi, muna Mfumu eto Yesu Kristu, yo muna zola kwa mwanda, nwansiamanena yame muna sambu kwa Nzambi.” (Roma 15:30) Nga Paulu walomba kwa mpangi zandi z’Akristu vo bansambidila? Ve. Kele vo i wau, konso lekwa bavwanga o mfunu badi kio lombela muna nkumbu a Paulu wa ntumwa a Kristu. Paulu wasonga vo diamfunu mu lomba kwa mpangi za Akristu mu samba kwa Nzambi muna wete dieto. Ediadi, diaswaswana yo samba kwa muntu ona tukwikilanga vo una ­kun’ezulu ye olenda lwakisa e ndomba zeto kwa Nzambi. Ekuma?

Muna nsangu zambote kasoneka Yoane, Yesu wavova vo: “Mono kwame i nzila, i ludi, i moyo mpe: Ke vena on’okwiza kwa Se ko, ovo ke mu mono ko.” (Yoane 14:6) Yesu wavova diaka vo: ‘Konso kina nulomba kwa Se muna nkumbu ame, o kunuvana kio.’ (Yoane 15:16) Yesu kavova ko vo tufwete fila sambu yeto kwa yandi, i bosi kelwakisa yo kwa Nzambi muna wete dieto. Kansi, Yesu wasonga vo e sambu yeto muna yo wakana, tufwete samba kwa Nzambi muna Yesu ke kwa muntu akaka ko.

Vava alongoki a Yesu banlomba vo kabalonga o samba, Yesu wavutula vo: “Ovo se nusamba nuvova vo, e Tata yambula nkumbu aku yazitiswa.” (Luka 11:2) Ozevo, konso ntangwa tusamba, tufwete fila sambu yeto kwa Nzambi ke kwa Yesu ko ngatu kwa muntu akaka. Wau vo Yesu wakiesesa e diambu diadi muna malongi mandi, diambote twafilanga e sambu yeto kwa Nzambi ke kwa Yesu ko ngatu kwa “asantu.”

O samba diambu diamfunu muna nsambil’eto, kansi osambila muntu akaka ke mu Nzambi ko, ke dina ngwizani ko ye malongi ma Nkand’a Nzambi. (Yoane 4:23, 24; Lusengomono 19:9, 10) Muna kuma kiaki tufwete fila kaka e sambu yeto kwa Nzambi.

Muna Elongi diandi vana Mongo, Yesu wayika e nona kia mwana olombanga s’andi má kia dia. Nga o se olenda kumvana e tadi vana fulu kia kumvana e mbolo? Yovo nioka vana fulu kia kumvana mbizi a maza? (Matai 7:9, 10) O se dianzodi kalendi vanga diambu diadi ko.

Badika e nona eki: Yindula vo mwan’aku lekwa kazolele kulomba. Ongeye, otoma mokenanga yo mwan’aku, nutoma wizananga. Kansi, vana fulu kia lomba yandi kibeni dina kazolele, otumini muntu akaka kanlombela kina kavwidi o mfunu. Aweyi omona? Adieyi ovanga kele vo mwan’aku okwamanene ye fu kiaki? Nga oyangalela e fu kiaki? Kieleka vo, ve. Mase ma nzolwa bezolanga vo wan’au babafinamanga yo lomba konso kina bazolele.

Vava kayika e nona kia mwana olombanga madia kwa s’andi, Yesu wavova vo: “Dianu vo, oyeno, nuna yo bi, ovo nuzeye o vana tukau twambote kwa wan’eno, o S’eno wina kun’ezulu, nkia nduta keluta vana lekwa yambote kw’awana bekunlomba.” (Matai 7:11) Ka lukatikisu ko vo mase bezolanga vana lekwa yambote kwa wan’au. Kansi, o luzolo lwa S’eto ezulu lwa wá yo vana e mvutu za sambu yeto lusundidi kikilu.

Nzambi ozolele vo twamfinama muna sambu kana una vo tunwananga ye mazitu ma masumu meto. Ke vananga mbebe kwa wantu akaka ko muna wá e sambu yeto. Nkand’a Nzambi ukutuwondelelanga vo: “Yekek’ezitu diaku kwa Yave, yandi okusikina.” (Nkunga 55:22) Vana fulu kia sadila asantu yovo akaka muna lwakisa sambu yeto kwa Nzambi, diambote twazaya dina Yave wa Nzambi kazolele muna yeto.

O S’eto ezulu ovwanga konso muntu muna yeto o mfunu. Ozolele vo twamfinama ye una y’etima dia kutusadisa. (Yakobo 4:8) Ekwe nsambu za kala ye lau dia finama Nzambi wa Se dieto, ona “owanga sambu!”—Nkunga 65:2.