Ku zunga kia Bilbao, kuna node ya Espanha yawutukila. Mono i mwan’anzole muna wana yá twawutuka. Yeto awonso muna nzo, mu dibundu dia Katolika twasambilanga. Vava yakala ye mvu 23 yakituka se nlongi, yakwamanana sala salu kiaki mu mvu 40. Kiese kiayingi yamonanga mu kala nlongi a dibundu dia Katolika, muna fuku yalonganga dumbelele muna kubakubika kimana bavubwa.

Vioka mvu 12 mia lukazalu lwakiese, yakala diame wafwa yo kunsisila wana yá. Vava nkaz’ame kafwa, mvu 33 kaka yakala miau. Yavava lufiaulwisu muna dibundu diame, kansi yuvu yayingi yakala yau nze: ‘Avo Kristu wafwa muna kutukûla, ekuma tufwilanga? Avo wantu awonso ambote kuzulu bekwendanga, ekuma tulombelanga vo Kintinu kia Nzambi kiza?’ Vana ntandu, yakiyuvulanga mpe: ‘Avo Nzambi okutufundisanga vava tufwanga, ekuma tusisila diaka e zulu, purgatório ye bilungi yo fundiswa muna mfundis’ansuka?’

Yavanga yuvu yayi kwa zimpelo. Mosi muna yau wamvutula vo “Kizeye ko, yuvula kwa bispo. Ekuma otokanenanga diambu diadi? Kwikila kaka muna Nzambi!” Kansi, yakwamanana vava mvutu za yuvu yame. Kuna kwalanda, yayantika kwenda wá malongi ma dibundu dia Jesuíta, Pentecostal ye Gnóstico. Kansi, malongi mama ke mavana mvutu za yuvu yame ko.

Vava yakala ye tezo kia mvu 70, nleke mosi wakala ye kimbuta kia mvu 7 wambokela kimana ngienda muna lukutakanu lwa Mbangi za Yave. Kana una vo yayangalala muna mana yawá, kiavutuka ko diaka ko mu kuma kia salu yayingi yakala yau. Vioka mvu miole, Juan yo nkaz’andi Maite badodela kielo kiame. Twakala ye moko kia yuvu ye mvutu za Nkand’a Nzambi mu ngonde tatu, i bosi yatambulwila longoka yau o Nkand’a Nzambi.

 Yatoma yangalelanga konso longi. Nsekola zitatu za Nkand’a Nzambi yasadilanga muna fimpa kana vo mana Mbangi za Yave bandonganga maludi. Ke kolo ko, yabakula vo mvu miayingi yakala muna bubu. Yayantika tokana mu kuma kia nswaswani ya malongi yalongwa muna dibundu diame ye mana yalongokanga muna Nkand’a Nzambi. Yakendalala kikilu, kadi lukwikilu lwame lwakituka nze nti wa mianzi miangolo wavuzwanga.

I bosi, nkaz’ame wanzole wabakama kimbevo kiangolo yo fwa. Muna kolo kiakina, yayambula salu kiame yo yaluka muna mbanz’a Bilbao mu fikolo. Juan yo Maite mpe bayaluka. Diankenda kikilu wau vo yayambula longoka Nkand’a Nzambi. Kansi, muna nsi a ntima, yazaya wo vo lusalu lwantalu yasolola. Kiavilakana dio ko.

Vioka mvu 20, vava yalungisa mvu 82, Juan yo Maite bavutuka ku mbanz’a Bilbao yo kunkingula. Ekwe kiese yamona wau twawanana diaka! Yabakula vo Yave kampilakana ko ye yavutukila elongi diame dia Nkand’a Nzambi. Juan yo Maite basonga luzindalalu kadi nkumbu miayingi yavutukilanga yuvula yuvu yau imosi. Yakala y’etima diakotesa malongi mama muna ntim’ame kimana makatula malongi maluvunu yakwikilanga. Yavava mpe toma kubama muna longa ludi kia Nkand’a Nzambi kw’akundi ye yitu yame.

Vava yalungisa e mvu 87 yavubwa, kiese kiayingi yamona muna lumbu kiakina. Ku lukutakanu lwa zunga lwa Mbangi za Yave yavubilwa. Nkuluntu mosi wafila elongi dia Nkand’a Nzambi mu kuma ki’awana bavubwa. Yadila mu kuma kia longi diadina. Yamona nze mono yamokenanga yo Yave. Vava yavubwa, Mbangi za Yave zayingi bayiza kunkaisa, ayingi muna yau ke banzaya nkutu ko.

Yazaya wo vo Yesu “i nzila.” (Yoane 14:6) Kansi, elongi dia Nkand’a Nzambi diansadisa mu zaya kuna Yesu kekumfilanga, i sia vo kwa Yave. Owau, ndenda samba kwa Nzambi nze Se diame yovo Nkundi ame anzolwa. O tanga nkanda Finama Yave * diasimba o ntim’ame. Yatanga wo mu fuku umosi! Yayangalala mu zaya vo Yave nkwa nkenda.

Vava isungamenanga e ngolo yavanga zavava e ludi, dikunsungamesanga e mvovo mia Yesu vo: “Nulomba, ozevo nuvewa; nuvava, ozevo nusolola; nudoda, ozevo nuziulwilwa.” (Matai 7:7) Owau yabaka e mvutu za yuvu yame, ediadi dikumpananga kiese kia zayisa mo mpe kw’akaka.

Kana una vo mvu 90 ngina miau, ikuyimwenga nze nleke muna kimwanda. Malongi mamfunu itambulanga muna konso lukutakanu muna Seka dia Kintinu. O lungana vamosi ye mpangi zame kiese kiayingi dikuntwasilanga. Ngina yo luzolo lwavutukila salu kia longa muna Paradiso ova ntoto. (Lusengomono 21:3, 4) Ngina y’etima dia mona azolw’ame vava befulwa yo kala y’elau dia kubalonga e ludi kia Nkand’a Nzambi. (Mavangu 24:15) Ilakukilanga lumbu kiakina moyo muna kubazayisa lukau lwamfunu luna Yave kampana muna kinunu kiame!