E sono kiaki kitomene zayakana ye kitoma vovelwanga kwa wantu. Wantu bevovanga vo ke vena sono kiakaka ko kia Nkand’a Nzambi “kivovelanga ngwizani a Nzambi yo wantu ye nzila luvuluku” avo ke kiaki ko. Muna kuma kiaki, e sono kia “Yoane 3:16” kitoma vovelwanga muna nkinzi, bamikwa muna makalu, muna yaka ye fulu yakaka.

Nanga, awana bevanganga wo beyindulanga vo zola kwa Nzambi i ziku kisonganga vo besinga vuluzwa. Adieyi tuvova mu kuma kiaku? O zola kwa Nzambi nkia nsasa kuna kwa ngeye? Nkia diambu kevanganga o Nzambi muna songa zola kwandi kwa ngeye?

Ayingi bekwikilanga vo Nzambi i Mvangi a lekwa yawonso yo wantu. E mpil’esivi yavangilwa e lekwa yamoyo isonganga e ziku vo vena yo Mvangi wa nkwa ngangu wavanga yo. Wantu ayingi bevutulanga matondo kwa Nzambi lumbu yawonso mu kuma kia lukau lwa moyo. Bebakulanga vo mawonso bavwidi o mfunu muna zingu nze fulumwinu, maza ye madia, Nzambi ovananga mo.

Diambote twavutulanga matondo kwa Nzambi muna mawonso mama wau vo yandi i Mvangi eto ye okutulunga-lunganga. (Nkunga 104:10-28; 145:15, 16; Mavangu 4:24) Tulenda songa luyangalalu muna zola kwa  Nzambi muna yindulanga mawonso kevanganga kimana twakala moyo. Paulu wa ntumwa wavova vo: ‘Nzambi wavana moyo ye fulumwinu kw’awonso ye lekwa yawonso. Kadi muna yandi i twinina o moyo, diata yo zinga.’—Mavangu 17:25, 28.

O kutulunga-lunga muna nitu ke yau kaka ko i mpila ina Nzambi kesongelanga zola kwandi muna yeto. Nswaswani ye bulu, Nzambi watuvanga ye nsatu za mwanda ye okutusadisanga muna lungisa zo. (Matai 5:3) Muna mpila yayi, ana belemvokelanga Nzambi balenda kota muna kanda diandi yo kituka se “wan’a Nzambi.”—Roma 8:19-21.

E sono kia Yoane 3:16 kivovanga mpe vo, Nzambi wasonga zola kwandi muna fila mwan’andi Yesu ova ntoto muna kutulonga oma ma Nzambi w’eSe yo fwa mu kuma kieto. Kansi, ayingi balenda vova vo ke bebakulanga ko e kuma diavavilanga vo Yesu kafwa mu kuma kia wantu ye una lufwa lwandi lusongelanga zola kwa Nzambi muna yeto. Owau, yambula twabadika una Nkand’a Nzambi usasilanga e kuma kia lufwa lwa Yesu yo mfunu andi.

Wantu awonso beyelanga, nuna (lumbila) yo fwa. Kansi, ediadi ke diau ko i kani dia Nzambi tuka kuna lubantiku. Nzambi wavana kwa yakala yo nkento antete elau dia zinga yakwele mvu mu paradiso ova ntoto. Kansi, diavavanga vo balemvokela Nzambi. Avo ke wau ko fwa badi fwa. (Etuku 2:17) Kansi, Adami wakolamena wisa kia Nzambi yo twasa lufwa kwa yandi kibeni yo wan’andi. Paulu wa ntumwa wavova vo: “Muna muntu mosi i mwakotel’esumu muna nza, o lufwa mpe mun’esumu; i ngyandangiana luayandangian’o lufwa muna wantu awonso, wau yawonso basumuka.”—Roma 5:12.

Kansi, Nzambi ‘unsongi kezolanga.’ (Nkunga 37:28) Kana una vo Nzambi watumba Adami mun’esumu diandi, kansi, ke yambula ko vo wantu bakwamanana mona e mpasi yo fwa mu kuma kia ukolami wa muntu mosi. Muna sadila nkanikinu wa “moyo mu moyo,” Nzambi wasikidisa balanza ya unsongi yo vana elau dia zinga yakwele mvu kw‘awana bekunlemvokelanga. (Luvaiku 21:23) Kansi, e kiuvu i kiaki: Aweyi wantu badi vwila diaka moyo alunga una Adami kavidisa? Mvutu: Moyo a muntu alunga wafwanana ye una wavila wavavwanga.

Ke vakala muntu alunga ko muna mbongo Adami wadi futa e ntalu yayi. (Nkunga 49:6-9) Yesu kaka wadi yo futa. Yesu kawutuka ye sumu dia Adami ko, muntu alunga kakala. Muna tambika moyo andi se kimenga, Yesu wavuluza wantu muna ubundu w’esumu. Muna vanga ediadi, Yesu wavana kwa wana Adami yo Eva  elau dia vwa moyo alunga una bavidisa. (Roma 3:23, 24; 6:23) Nga vena ye diambu tufwete vanga muna vwa nluta mun’evangu diadi dia nzolwa?

E sono kia Yoane 3:16 kivovanga mpe vo: ‘Konso on’okwikilanga muna [Yesu] ke fwaswa ko, moyo a mvu ya mvu kevwa.’ Ediadi disongele vo lukau lwa moyo a mvu ya mvu ke lwa ngovo ko. Avo tuzolele vwa “moyo a mvu ya mvu,” tufwete kwikila muna Yesu yo kunlemvokela.

Nanga olenda kukiyuvula vo: ‘Adieyi divavwanga muna kunlemvokela? Nga Yesu kavova ko vo “konso on’okwikilanga muna yandi” o vwa moyo a mvu ya mvu?’ Dialudi vo lukwikilu mfunu lwina. Kansi, Nkand’a Nzambi usonganga vo lukwikilu ke lwau kaka ko luvwilu o mfunu. Muna vwa dienga dia Nzambi, tufwete kwikila vo Yesu i Mvuluzi yo sia ngolo za sadila malongi mandi. Avo ke wau ko, lukwikilu lweto ke lukala mfunu ko. Nkand’a Nzambi uvovanga vo “lukwikilu luakondwa mavangu, luafwa.” (Yakobo 2:26) Muna mvovo miankufi, o muntu una yo lukwikilu muna Yesu kafwete zingila ngwizani ye malongi mandi.

Paulu wavovela diambu diadi mu mpila eyi: ‘O zola kwa Kristu kukutufilanga; i mbadika tubadika, ovo mosi wafwila mun’awonso . . . Mun’awonso kafwila, kimana awana bena moyo, ke bazingila diaka mun’owu wa luzolo lwau ko, kansi muna luzolo lwa ndiona wabafwila yo fuluka.’ (2 Korinto 5:14, 15) O luyangalalu lweto muna kimenga kia lukûlu lwa Yesu, lufwete kutufila mu vanga konso nsobani muna zingu yo zingila mun’owu wa luzolo lwa ndiona wafwa mu kuma kieto. Disongele vo tufwete zingila ngwizani ye malongi ma Yesu. E nsobani tuvanga zikutusadisa mu singika fu yeto, nsola zeto ye mawonso tuvanganga muna zingu. Nkia nsendo bevwa awana bekwikilanga muna Yesu?

E tini kiansuka kia Yoane 3:16 kiyikanga nsilu a Nzambi kw’awana bekwikilanga muna kimenga kia lukûlu yo zingila e ngwizani ye nkanikinu mia Nzambi. Nzambi kazolele ko vo awana bena yo “lukwikilu” bafwaswa, kansi ozolele vo bavwa moyo a mvu ya mvu. Awana bevwanga nluta mu zola kwa Nzambi, vuvu kiaswaswana bena kiau.

Yesu wasia nsilu vo vena yo wantu bevwa moyo a mvu ya mvu kun’ezulu. Wavovesa alongoki andi akwikizi vo okubakubikila fulu kuna zulu kimana bayala yandi muna nkembo andi. (Yoane 14:2, 3; Filipi 3:20, 21) Wantu ana befuluka yo kwenda kuna zulu “bekala se nganga za Nzambi yo Kristu, beyala yandi mun’efunda dia mvu.”—Lusengomono 20:6.

Alongoki akete kaka a Yesu bevwila moyo kuna zulu. Yesu wavova vo: “Ke numoni wonga ko, yeno finkambi-kambi, e kuma kadi, i luzolo lua Tata lulu, lua kunuvan’e kintinu.” (Luka 12:32) Wantu kwa bena muna buka kiaki? Nkanda Lusengomono 14:1, 4 uvovanga vo: “Mbwene o Mwan’ememe [Yesu Kristu ona wafuluka] otelamene vana mongo a Zione [zulu], aya bena yandi, 144.000, bena ye nkumbu andi, ye nkumbu Es’andi isonamene vana tuse twau . . . Awana basumbuka vana vena wantu, se ntomoni kuna kwa Nzambi, yo kuna kwa Mwan’ememe.” Avo tutezanese mafunda ye mafunda ma wantu ana bazinga kala, o lutangu lwa 144.000 ma wantu lwakete. Wantu awaya beyikilwanga vo ntinu, aki nani beyala?

Yesu wayika buka kia zole kia selo yakwikizi ana bevwa nluta mia Kintinu ki’ezulu. Muna Yoane 10:16, Yesu wavova vo: “Mameme makaka mpe ngina mau, mana ke ma mpaka yayi ko, mana ntwasa mewa nding’ame; mekal’ekambi dimosi, mvungudi mosi.” E “mameme” mama bena ye luzolo lwa vwa moyo a mvu ya mvu ova ntoto, i sia vo, vuvu kina Adami yo Eva bakala kiau.  Aweyi tuzayidi wo vo wantu awaya vuvu kia zingila va ntoto bena kiau?

Nkumbu miayingi Nkand’a Nzambi uvovanga vo ntoto ukituka se paradiso. Muna zaya e ziku kia diambu diadi, ziula Nkand’aku a Nzambi yo tanga e sono ilende: Nkunga 37:9-11; 46:8, 9; 72:7, 8, 16; Yesaya 35:5, 6; 65:21-23; Matai 5:5; Yoane 5:28, 29; Lusengomono 21:4. E sono yayi yasakula mfoko a vita, imbevo, nzala yo lufwa. Iyikanga mpe e ntangwa ina wantu ambote bezinga ye kiese yo tunga nzo zau, vata e mpatu yo sansa wan’au kuna luvuvamu. * Nga oyangalelanga e mpila zingu kiaki? Tuna ye ziku vo nsilu miami milungana kuna ntwala.

Avo ofimpidi mawonso mana Nzambi kevanganga mu kuma kiaku ye wantu awonso, obakula vo mayingi kevanganga. Okutuvananga moyo, ngangu, mavimpi ye lekwa tuvwidi o mfunu muna zinga. Vana ntandu, o lukau lwa lukûlu lwa Yesu luna Nzambi katuvana lulenda kututwasila nsambu zayingi nze una tulongokele muna sono kia Yoane 3:16.

Ozinga yakwele mvu muna luvuvamu, zingu kiambote, kondwa kwa mayela, vita, nzala yo lufwa, mawonso mama metwasa nsambu zilembi suka. Muna vwa nsambu zazi ofwete vanga diambu. Ozevo, e kiuvu i kiaki: Adieyi ovanganga mu kuma kia Nzambi?