E KOLO KO, lufimpu lumosi lwavangwa kwa vioka 800 za aleke mu vioka 12 dia mabundu. Aleke awaya bayuvulwa kana vo bekwikilanga vo Yesu yandi ovananga mvutu za sambu. Vioka 60 muna nkama (60%) bavutula vo Yesu yandi ovananga mvutu za sambu yeto. Kansi, mosi muna aleke awaya wavunzuna nkumbu a Yesu yo soneka vo “Nzambi.”

Adieyi obenze? Nga tufwete fila sambu yeto kwa Yesu yovo kwa Nzambi? a Muna zaya e mvutu, yambula twabadika dina Yesu kalonga kwa alongoki andi mu kuma kia samba.

Yesu walonga yo kutusonga kwa nani tufwete filanga e sambu yeto.

MALONGI MANDI: Vava mosi muna alongoki andi kalomba vo “E Mfumu, utulong’o samba” Yesu wavutula vo: “Ovo se nusamba nuvova vo, e Tata.” (Luka 11:1, 2) Kuna kwalanda, muna Longi diandi vana Mongo Yesu wavovesa ana banwanga vo basambanga. Wavova vo: ‘Samba kwa S’aku.’ Wabavovesa mpe vo: “O S’eno ozeye eki nukondelo, una ke nwanlombele ko.” (Matai 6:6, 8) Muna fuku wandi wa nsuka, Yesu wavovesa alongoki andi vo: ‘Konso dina nulomba kwa Se, okunuvana dio muna nkumbu ame.’ (Yoane 16:23) Ozevo, Yesu watulonga vo tufwete filanga sambu yeto kwa Se diandi wa Se dieto, i sia vo kwa Yave wa Nzambi.​—Yoane 20:17.

MBANDU ANDI: Muna songa e ziku kia mana kalonga kwa ankaka, Yesu yandi kibeni wasamba vo: “Itondele, e Tata, e Mfumu ezulu ye nza.” (Luka 10:21) Lumbu kimosi, ‘Yesu wasengola o meso kuna zulu, oku vo, e Tata, mfiaukidi wau ungwidi.’ (Yoane 11:41) Vava mpe kafinama o fwa Yesu wasamba vo: “E Tata, muna moko maku i ngyekwele moyo ame.” (Luka 23:46) Muna samba kwa S’andi e zulu wa “Mfumu ezulu ye nza,” Yesu watusisila mbandu eyi tufwete landa. (Matai 11:25; 26:41, 42; 1 Yoane 2:6) Nga i wau alongoki a Yesu babakulwila luludiku lwandi?

Vava Yesu kavutuka kuna zulu vioka tumingu twakete, alongoki andi babangikwa yo vumiswa kwa mbeni zau. (Mavangu 4:18) Ka lukatikisu ko vo alongoki awaya balomba lusadisu muna sambu. Kansi, kwa nani basamba? “Batumbwidi e ndinga kumosi kwa Nzambi” ye vuvu vo okubasadisa muna ‘nkumbu a Yesu wa selo [kiandi] kiavelela.’ (Mavangu 4:24, 30) Ozevo, alongoki balanda luludiku lwa Yesu mu kuma kia sambu. Basamba kwa Nzambi ke kwa Yesu ko.

Vioka mvu miayingi, Paulu wa ntumwa wayika una yandi kibeni ye akundi andi basambilanga. Vava kasonekena akwandi Akristu wavova vo: ‘Ntangwa zawonso tuvutulanga matondo kwa Nzambi wa Se dia Mfumu eto Yesu Kristu, vava tukunusambidilanga.’ (Kolosai 1:3) Paulu wasonekena akwandi minkwikizi vo, ‘ntangwa zawonso tutondanga Nzambi eto ye Se  muna mambu mawonso, muna nkumbu a Mfumu eto Yesu Kristu.’ (Efeso 5:20) Muna mvovo miami, tumwene vo Paulu wakasakesa akaka kimana basambanga “ntangwa zawonso” kwa “Nzambi wa Se muna mambu mawonso”​—muna nkumbu a Yesu.​—Kolosai 3:17.

Nze Akristu a tandu kiantete, tulenda songa zola kweto muna Yesu muna lemvokelanga luludiku lwandi mu kuma kia sambu. (Yoane 14:15) Avo tusambidi kaka S’eto e zulu​—tumona e ziku kia mvovo mina—​muna sono kia Nkunga 116:1, 2 kivovanga vo: “Yave nzolele, kadi owidi e nding’ame . . . Ikumbokela e lumbu yame yawonso.” b