Nkanda umosi Encyclopædia Britannica uvovanga vo Nduta “i nkinzi wa dibundu dia Kikristu usundidi mfunu owu ukembelelanga Lufuluku lwa Yesu Kristu.” Kansi, nga Nduta nkinzi a Kikristu?

Muna vova ye sikididi vo diambu kingandi dia ziku, muntu kafwete zaya mayingi mu kuma kia diambu diodio. Diau dimosi mpe, muna zaya kana vo Nduta nkinzi a Kikristu yovo ve, diambote twateka fimpa mambu mevangamanga muna nkinzi wau.

Entete, Yesu wakanikina alandi andi vo bayindulanga lufwa lwandi, ke lufuluku lwandi ko. Paulu wa ntumwa wayikila luyindulu lwalu vo “Nlekelo a Mfumu.”​—1 Korinto 11:20; Luka 22:19, 20.

O nkanda uyikilu kala va ntandu uvovanga mpe vo mambu mayingi mevangamanga muna nkinzi a Nduta “ke mena ngwizani ko” yo lufuluku lwa Yesu, kadi “mu fu ya kisi nsi matuka.” Muna bonga e nona, o nkanda Enciclopédia de Religião e Ética uvovanga mu kuma kia nlumba ye maki mesadilwanga muna nkinzi a Nduta vo, “e diaki sinsu kia luwutuku lwampa. O nlumba wazayakana vo bulu kiwutanga kwayingi, muna kuma kiaki obadikilwanga vo sinsu kia ngiz’a nsungi a masanza.”

Nlongi mosi oyikilwanga vo Philippe Walter wasasila una e lekwa yayi yakoteselwa muna nkinzi a Nduta. Wasoneka vo “muna kotesa wantu a nsambila zankaka muna mabundu ma Kikristu,” Akristu basangisa lufuluku lwa Yesu yo nkinzi bavanganga wantu a nsambila zazi mu kuma kia “mfoko a nsungi a sivu yo lubantiku lwa nsungi a masanza.” Philippe wavova mpe vo e yayi i mpila bayantikila kotesela fu ya kisi nsi muna “Nkinzi mia Kikristu” yo fila wantu ayingi bakota mu dibundu dia Kikristu.

E kolo antumwa bakala moyo, e diambu diadi ke diavangama ko kadi bakala nze ‘nkaku’ mu kuma kia mambu mama. (2 Tesalonika 2:7) Paulu wa ntumwa wavova vo avo nkatukidi, “vetelama wantu, ana bevova mambu mabendomoka, bavol’alongoki bend’abalandi.” (Mavangu 20:29, 30) Kuna mfoko a tandu kiantete, Yoane wa ntumwa wasoneka vo akaka muna Akristu bavukumunwa. (1 Yoane 2:18, 26) Ozevo, e nzila yaziuka muna kotesa fu ya kisi nsi muna dibundu dia Kikristu.

Wantu akaka balenda vova vo okotesa lekwa yayi muna nkinzi a Nduta ke diambi ko, kadi diasadisa wantu bakala muna nsambila zankaka mu bakula e nsas’a lufuluku lwa Yesu. Kansi, Paulu wa ntumwa katambulwila diambu diadi ko. Kana una vo wakangala yo sila umbangi muna mbanza za Roma ezi zakala ye nsambila zayingi za kisi nsi, Paulu kasidi tanginina fu yayi ko kimana kasadisa wantu babakula e ludi mu kuma kia Yesu. Kansi, walukisa Akristu vo: “Ke nukadi kintwadi ye mindembi-kwikila ko. Kadi nkia ngwizani ina vana vena unsongi ye umpumbulu? ‘Nga ntemo ulenda kala e ntwadi ye tombe? Dianu vo, nukatuka vana bena, nubavambuka, u kavovele Yave, ke nusimbi má kiafunzuka ko, ikunutambula.’”​—2 Korinto 6:14, 17.

Nkia diambu diamfunu tulongokele muna lufimpu lwalu lwankufi? Lufimpu lwalu lusongele vo Nduta ka nkinzi a Kikristu ko.