Wantete wa Samuele 1:1-28
1 Muna zunga kia miongo mia Eferaime,+ mwakala muntu wa musi Ramataime-sofime,*+ nkumbu andi Elekana,+ wa mwan’a Yerokame, wa mwan’a Eleyu, wa mwan’a Toku wa mwan’a Sufi, musi Eferate.
2 Akento wole kakala yau; mosi nkumbu andi Ana, wankaka nkumbu andi Penina. O Penina wakala yo wana, kansi Ana kakala yo wana ko.
3 Muntu ndioyo watukanga kuna mbanz’andi mvu ke mvu yo tomboka kuna Silo,+ mu sambila yo kela kimenga kwa Yave a vu. O wana wole a Ele, Kofene yo Finekase,+ i kûna basadilanga se nganga za Yave.+
4 Lumbu kimosi vava Elekana kakela kimenga, ovene kunku kwa nkaz’andi Penina yo kwa wan’andi awonso amakala ye amakento,+
5 kansi ovene kwa Ana e kunku kisundidi, kadi yandi katoma zolanga; kansi Yave kamvana wana ko.*
6 Mband’andi wamvezanga muna kunkendeleka, kadi o Yave kamvana wana ko.
7 I wau kavanganga mvu ke mvu; konso ntangwa Ana katombokanga kuna nzo a Yave,+ o mband’andi wantontanga yamu tezo kia kundidisa, kadianga ko.
8 Nkaz’andi Elekana unyuvuidi vo: “E Ana, ekuma odidilanga yo lembi dia? Ekuma okendalele?* Nga mono kisundidi wana kumi ko kwa ngeye?”
9 Vava bamene dia yo nua kuna Silo, Ana otelamene. Ele wa nganga wavuanda kakala vana kunda, vana ndambu* a mwelo a tempelo*+ a Yave.
10 Ana omwene kikilu ntantu, osambidi kwa Yave+ yo sikumuka ye dilu.
11 Osidi nsilu owu: “E Yave a vu, avo otadidi e mpasi za ntaudi aku, wangindula, yo lembi vilakana ntaudi aku, wavana mwan’a yakala+ kwa ntaudi aku, ozevo ikumvana kwa Yave e lumbu yawonso ya zingu kiandi, e nsuki za ntu andi ke zisinga zengwa ko.”+
12 Wau kasambidinge mu kolo kiandá vana ndose a Yave, Ele watalanga nu’andi.
13 Ana mu nsi a ntima kavovelanga, befo yandi kaka yanikukanga, e nding’andi ke yawakananga ko. I kuma Ele kabanzila vo wakolwa kakala.
14 Ele umvovese vo: “Yamu nkia ntangwa okolwa? Yambula nua vinyu.”
15 Ana ovutwidi vo: “Ve, e mfumu ame! Mono i nkento wakendalala; kinuini kwame vinyu ko ngatu konso lekwa kia nkolwa, kansi nziwidi ntim’ame vana vena Yave.+
16 Kubadikila ntaudi aku nze nkento wakondwa mfunu ko, kadi muna ulolo wa ntantu yo lukendalalu lwame ivovelanga yamu wau.”
17 Ele ovutwidi vo: “Wendela muna luvuvamu, yambula Nzambi a Isaele kavana mana olombele.”+
18 Ovovele vo: “Yambula ntaudi aku kakala ye dienga ova ndose aku.” O nkento wele kwandi, odidi, e ndose andi ke yakendalala diaka ko.
19 Basikamene muna mene-mene, bavumbamene vana vena Yave, i bosi bavutukidi kuna nzo au kuna Rama.+ Elekana ovukane yo Ana wa nkaz’andi, Yave unsidi e sungididi.*+
20 Muna kolo kia mvu mosi,* Ana oyimiti, owutidi mwan’a yakala; umvene nkumbu+ a Samuele,* kadi ovovele vo, “kwa Yave yanlomba.”
21 Kuna kwalanda, Elekana ye nzo andi yawonso batombokele mu kelela Yave+ e kimenga kia mvu yo tambika lukau lwandi lwa nsilu una kasia.
22 Kansi, Ana katombokele yandi ko,+ kadi wavovesa nkaz’andi vo: “Vava mwana ketauka, ikuntwasa; kamoneka vana vena Yave, kakala kûna yakwele mvu.”+
23 Elekana wa nkaz’andi umvovese vo: “Vanga dina omwene vo diambote.* Sala mu nzo yavana okuntaula. Yambula Yave kalungisa mana ovovele.” O nkento osidi kuna nzo yo yemeka mwan’andi yavana kantaula.
24 Vava kataukidi, otombokele yandi kuna Silo ye ngombe a koko ya mvu ntatu ye efa mosi* a mfumfu ye nkalu a vinyu,+ olweke kuna nzo a Yave kuna Silo+ yo mwan’andi.
25 Bavondele ngombe yo nata mwana kwa Ele.
26 Ana ovovele vo: “Unsila nlemvo e mfumu ame, e nkal’aku kaka* e mfumu, mono i nkento ona watelama yaku va fulu kiaki mu samba kwa Yave.+
27 Ndioyo i mwana yalomba muna sambu, Yave wampene kina yanlomba.+
28 Owau imvene kwa Yave. Kadi wa Yave kekala muna zingu kiandi kiawonso.”
Ovumbamene* Yave vavana.
Mvovo vana yand'a lukaya
^ Yovo “musi Rama, Nsufi.”
^ Mvovo wa sina: “wankanga mawuta.”
^ Yovo “O ntim’aku adieyi utelamene?”
^ Yovo “tungwa kia.”
^ I sia vo, saba.
^ Yovo “unyindwidi.”
^ Nanga, “Vava kiafwan’e ntangwa.”
^ Ina ye nsasa vo: “Nkumbu a Nzambi.”
^ Mvovo wa sina: “vanga edi diambote vana meso maku.”
^ Yovo “Muna zingu kia moyo aku.”
^ Nanga Elekana oyikilu vava.
