Wantete wa Paulu Kuna kwa Timoteo 5:1-25
5 Kukazidi mbut’a muntu ko.+ Kansi, unludika kaka nze se, matoko nze mpangi,
2 mbuta za makento nze ngudi, e ndumba nze nsanga, muna velela kwawonso.
3 Lunga-lunganga* akento bafwilwa akala ana bena vo asukami kikilu.*+
4 Kansi, avo nkento wafwilwa yakala una yo wana ye atekelo, yambula bateka longoka songa o vumi wa Nzambi muna nzo zau+ yo senda mase ye nkaka zau ina bafwanukini,+ kadi ediadi diansongi vana ndose a Nzambi.+
5 Nkento wafwilwa yakala, ona wina vo nsukami kikilu,* osianga e vuvu kiandi muna Nzambi,+ ododokelanga yo samba fuku yo mwini.+
6 Kansi ndiona ukivene muna lungisa e zolela yandi,* wafwa kala, kanele vo una o moyo.
7 Dianu vo, kwamanana kubavana e nkanikinu miami kimana bakondwa lusembo.
8 Kieleka, avo muntu ke toma lunga-lunganga awana kavuidi ko, musungula esi nzo andi, ovanini lukwikilu nkalu, oviokele mundembi-kwikila muna mbi.+
9 O nkento wafwilwa yakala, kafwete sonama muna nkanda avo olungisi mvu 60 yovo vioka, ona wakala nkento ayakala dimosi,
10 ozayakene muna mavangu mambote,+ nze sansa wana,+ nzodi a nzenza,+ malu ma avauki kasukulanga,+ wasadisanga awana bakala mu mpasi,+ wakivana emvimba muna mavangu mawonso mambote.
11 Kuna diaka e sambu, kusoneki ndumba zafwilwa akala ko, kadi vava luzolo lwau lwavukana lukitukanga se nkaku muna salu kia Kristu, bevavanga sompa.
12 Tumbu bevewa, e kuma kadi babembola lukwikilu lwau lwantete.
13 Vana ntandu, bekitukanga mpe se miolo, bekwenda vumvula muna nzo ye nzo; ke miolo kaka ko kansi akumbi ye ayakami a mambu mangani mpe,+ bemokenanga mambu mana ke bafwete mokenena ko.
14 Dianu nzolele vo e ndumba zafwilwa akala, basompa,+ bawuta wana,+ balunga-lunga esi nzo zau, balembi vana mbeni e lau dia kutuveza.
15 Kieleka, ankaka bavengomokene kala muna landa Satana.
16 Avo nkento una vo munkwikizi una ye yitu yafwilwa akala, yambula kabasadisa kimana nkutakani yalembi kala ye zitu. Ozevo, nkutakani ilenda sadisa akento bafwilwa akala ana bena vo asukami kikilu.*+
17 Akuluntu ana betoma filanga e nkutakani,+ yambula batoma zitiswanga,*+ musungula awana befuntukanga muna vova e diambu dia Nzambi yo longa.+
18 Kadi e sono kivovanga vo: “Kukaki nu’a ngombe ko ekolo ibundanga e mbwaza,”+ ye mpe: “O nsadi ofwene mfutu andi.”+
19 Avo mbuta* ofundilu, kutambulwila ko, nanga vo kwa mbangi zole yovo zitatu utukidi.+
20 Awana besumukanga ubatumbila+ vana ndose a wantu awonso,+ diakala se lulukisu kwa ankaka.*
21 Ikanikini vana ndose a Nzambi yo Kristu Yesu ye mbasi zina zasolwa vo, sadila nkanikinu miami lembi tala ndose yovo sia mpambula.+
22 Kuyampika muntu moko mu nzaki ko;*+ ngatu kala e ntwadi muna masumu ma wantu ankaka; uyikeba wakala kaka wavelela.
23 Kunue kaka maza ko, kansi nuanga mpe fivinyu muna diambu dia vumu kiaku ye kimbevo kiaku kikwamanananga.
24 Masumu ma wantu ankaka mesenzamanga vana vau yo kubanata kuna lufundisu, kansi masumu ma wantu ankaka mezayakananga kuna ntwala.+
25 Diau dimosi mpe, mavangu mambote mezayakananga kwa awonso,+ mana ke mazayakene ko ke malendi swekama yakwele mvu ko.+
Mvovo vana yand'a lukaya
^ Mvovo wa sina: “Zitisisanga.”
^ Yovo “awana bakondelo nsadisi.”
^ Yovo “ona wakondwa nsadisi.”
^ Nanga “zolela ya vukana.”
^ Yovo “awana bakondelo nsadisi.”
^ Mvovo wa sina: “yambula babadikilwa vo bafwene nzitiswa zole.”
^ Yovo “nkuluntu.”
^ Mvovo wa sina: “kimana ankaka bamona wonga.”
^ I sia vo, kukadi ye nzaki ko muna vana kiyekwa kwa muntu.
