Zasoneka Luka 10:1-42
10 I bosi, o Mfumu osolele 70 lw’akaka, ubatumini nwole-nwole+ benda viti muna mbanza zawonso ye muna fulu yawonso ina kekwenda.
2 I bosi, ubavovese vo: “Kieleka, e mbongo yayingi ina muna kutika, kansi asadi bakete. Muna kuma kiaki, nudodokela Mfumu a nkutika katuma asadi muna nkutika andi.+
3 Nuenda! Inutumini nze wan’a mameme vana vena e mevua.+
4 Ke nunati nkutu a nzimbu ko yovo nkutu a madia, ngatu nsampatu,+ ke nukayisi muntu ko* muna nzila.
5 Konso nzo ina nukota, nuteka vova vo: ‘Yambula luvuvamu lwakala omu nzo yayi.’+
6 Avo nkwa luvuvamu una mo, o luvuvamu lweno lukala yandi. Kansi avo ke wau ko, luvutuka kwa yeno.
7 Dianu vo, nukala muna nzo yayina, nudia+ yo nua ina bekunuvana,+ kadi o nsadi ofwene mfutu andi.+ Ke nusobi nzo yankaka ko.
8 “Konso mbanza mpe nukota avo banutambwidi, nudia ina bekunuvana,
9 nuwuka e mbevo zina mo, nubavovesa vo: ‘E Kintinu kia Nzambi kinufinamene.’+
10 Kansi, konso mbanza nukota, avo ke banutambwidi ko, nuenda muna nzila zampwena, nuvova vo:
11 ‘Tunukubulwidi e mbundukutu a mbanza eno, ina ilaminini mu tambi yeto.+ Kansi nuzaya wo vo, e Kintinu kia Nzambi kifinamene.’
12 Inuvovese vo, muna lumbu kiakina, e mbanza yoyo ivewa e tumbu kisundidi kia esi Sodoma.+
13 “Tâtu kwa ngeye Korazi! Tâtu kwa ngeye Betesaida! kadi o mavangu mankuma mavangamene muna yeno, kele vo mavangamena muna Turo ye Sidone, nga kolo baviluka o ntima yo vuata e ngoto yo vuanda vana ntoto ampolo.+
14 Dianu vo, muna lufundisu, nuvewa e tumbu kisundidi kia esi Turo ye Sidone.
15 Ongeye Kafanau, nga obenze vo otundidikwa yakuna zulu e? Muna Ziami* okulumunua!
16 “Konso ona okunuwá, mono mpe kawidi.+ Konso ona okunubembola, mono mpe kabembwele. Konso ona okumbembola, Ndiona wantuma mpe kabembwele.”+
17 I bosi, yau 70 bavutukidi ye kiese, bavovele vo: “E Mfumu, e nkuya mpe mitusakalele muna nkumbu aku.”+
18 Ubavovese vo: “Mbwene Satana osangumukini+ nga nsemo kuna zulu.
19 Inuvene wisa kia diatakesa nioka ye yinkala-nkala,* ye ngolo zawonso muna sunda e mbeni,+ kavena lekwa ko kikunuvanga e mbi.
20 Kansi, ke numoni kiese ko wau vo e mianda minusakalele, kansi numona e kiese wau vo e nkumbu zeno zisonamene kuna zulu.”+
21 Muna ntangwa yayina, oyangalèle kikilu muna mwand’avelela, ovovele vo: “Ikembelele vana meso ma ndonga, e Tata, Mfumu a zulu yo ntoto, kadi watoma sweka mambu mama kwa akwa ngangu ye alungaladi+ yo sengomona mo kwa yingiana-ngiana. Elo, e Tata, kadi i wau wayangalela o vanga.+
22 Se diame umpene lekwa yawonso, ke vena muntu ko ozeye una kena o Mwana, kansi Se kaka, ke vena mpe muntu ko ozeye una kena o Se, kansi Mwana kaka,+ ye konso ona o Mwana kazolele sengomwenena Se.”+
23 Muna diadi ovilukidi kwa alongoki andi, ubavovese vana fulu kia yau kaka vo: “Kiese kw’awana bamwene mambu numonanga.+
24 Kadi inuvovese wo vo, ngunza zayingi ye atinu bazola mona mambu numonanga, kansi ke bamona mo ko,+ bazola wá mambu nuwanga, kansi ke bawá mo ko.”
25 Mosi muna alongi a Nsiku otelamene kimana kantonta, ovovele vo: “E Nlongi, adieyi mfwete vanga muna vua o moyo a mvu ya mvu?”+
26 Umvovese vo: “Adieyi diasonama muna Nsiku? Adieyi otanganga?”
27 Ovutwidi vo: “‘Ofwete zola Yave* wa Nzambi aku muna nsi a ntim’aku wawonso, muna moyo* aku wawonso, muna ngolo zaku zawonso, muna nyindu aku wawonso,+ zola mpe o nkwaku wauna okuyizolelanga.’”+
28 Umvovese vo: “Otomene vutula; kwamanana wo vanga, ovua o moyo.”+
29 Kansi, wau kazolele kuyisonga vo walunga,+ ovovele kwa Yesu vo: “Nani kieleka i nkwame?”
30 Yesu ovutwidi vo: “Vakedi muntu okulumukini tuka kuna Yerusaleme yakuna Yeriko, wele bwa vana moko ma mivi, bakutumwini lekwa yandi, banwende, bele kwau, bansisidi wafwa e kiambu.
31 I bosi, nganga mosi okulumukini muna nzila yayina, kansi vava kamwene, ovengomokene kuna sambu diankaka.
32 Diau dimosi mpe, vava Nlevi kalweke vana fulu kiakina, umwene, ovengomokene kuna sambu diankaka.
33 Kansi Nsamaria+ mosi, wau kakangalanga, olweke vana kena, umwene, umfwididi e nkenda.
34 Wele vana kena, okangidi e mputa zandi, okusidi zo mazi ye vinyu. Umfongese vana bulu kiandi, untwese muna nzo a tambulwila nzenza, otomene kunlunga-lunga.
35 Muna lumbu kialanda, obongele denali* zole, ovene zo kwa ntambudi a nzenza, ovovele vo: ‘Toma kunlunga-lunga, konso kina okumfutila diaka, vava ivutuka ikuvutulwila kio.’
36 Muna wantu awaya yau atatu, nani wakala nkwandi+ a ndiona wabwa vana moko ma mivi?”
37 Ovutwidi vo: “Ndiona wansonga e nkenda.”+ O Yesu umvovese vo: “Wenda, vanga diau dimosi.”+
38 Ekolo bayendanga, olweke muna vata dimosi. Mukedi nkento nkumbu andi Mareta,+ untambwidi muna nzo andi.
39 Wakala mpe ye mpangi, nkumbu andi Maria, ofongele vana malu ma Mfumu yo wunikina mana kavovelenge.*
40 Kansi, Mareta kasianga sungididi ko mu kuma kia ulolo wa salu. Wizidi kwa Yesu, ovovele vo: “E Mfumu, nga kumwene ko vo mpangi ame unsisidi mono mosi kaka ye salu e? Umvovesa keza kunsadisa.”
41 O Mfumu umvutwidi vo: “E Mareta, e Mareta, mambu mayingi otelekele o moyo yo tokanena.
42 Kansi, makete kaka yovo dimosi kaka dina o mfunu. Maria osolele ndambu ambote,*+ ina ke ikunkatulwa ko.”
Mvovo vana yand'a lukaya
^ Yovo “ke nubimbana yo muntu ko.”
^ Yovo “Hades.” i sia vo, ziami kia wantu awonso. Tala Nsas’a Mvovo.
^ Yovo “nkutu.”
^ Tala Nsas’a Mvovo.
^ Mvovo wa sina: “e diambu diandi.”
^ Yovo “ndambu isundidi o wete.”
