Luvaiku 1:1-22
1 Ezazi i nkumbu za wan’a Isaele ana bayenda yo Yakobo muna Engipito, konso muntu y’esi nzo andi:+
2 Rubeni, Simeone, Levi yo Yuda;+
3 Yisakare, Zebulune yo Benyamini;
4 Dani yo Nafetali; Ngadi yo Asere.+
5 Awonso ana bawutwa kwa Yakobo,* 70 lwa wantu.* Kansi, Yosefe wakikadila kuna Engipito.+
6 Kuna kwalanda, Yosefe ofwidi+ ye mpangi zandi zawonso, ye mbandu yayina yawonso.
7 Aneyisaele* bawutanene, basayanene kikilu yo kwamanana wokela yo sunda e ngolo, e nsi izele yo Aneyisaele.+
8 I bosi, muna Engipito muvaikidi ntinu ampa ona kazaya Yosefe ko.
9 Ovovese nkangu andi vo: “Tala, o nkangu a Isaele utusundidi muna lutangu ye muna ngolo.+
10 Tufwete vanga diambu muna kubakakidila, avo ke wau ko, bekwamanana wokela. Avo vabwidi vita, beyikama e mbeni zeto yo kutunuanisa yo sisa e nsi.”
11 Muna kuma kiaki, babatumbikidi afidi a salu yangolo* muna kubamwesa e mpasi muna salu yangolo.+ Batungidi Faro e mbanza za malundilu, i sia vo, Pitome ye Ramesese.+
12 Kana una vo babamwesanga e mpasi, bakwamanana wokela yo sayana. Esi Engipito bamwene o wonga wayingi mu kuma kia Aneyisaele.+
13 Muna kuma kiaki, esi Engipito babundwini Aneyisaele muna salu yangolo.+
14 Bakitwidi e zingu kiau se kiandudi muna salu yangolo, babakomekene balamba o ntoto yo vanga bilikisi yo sala mpila zawonso za salu ya mpatu. Elo, babamwesese e mpasi muna mpila zawonso za ubundu.+
15 Kuna kwalanda, o ntinu a Engipito ovovese awutisi a Ayibere, e nkumbu zau, Sifera yo Pua,
16 oku vo: “Vava nusadisa akento a Ayibere mu wuta+ yo mona vo bavuende vana kunda kia wutilu, avo mwan’ayakala nufwete kumvonda; kansi avo mwan’ankento, nuyambula kazinga.”
17 Kansi, awutisi Nzambi aludi bavuminanga, ke bavangidi ko dina o ntinu a Engipito kabavovese. Bakwamanene vukisa wan’amakala.+
18 Kuna kwalanda, o ntinu a Engipito obokele awutisi yo kubayuvula vo: “Ekuma nukwamanene vukisila wan’amakala?”
19 Awutisi bavovese Faro vo: “Akento a Ayibere ke bena nze akento a esi Engipito ko. Bavuidi nkum’ayingi, bewutanga vitila awutisi balwaka vana bena.”
20 Muna kuma kiaki, Nzambi osambwidi awutisi, o nkangu ukwamanene wokela yo sunda e ngolo.
21 Wau vo awutisi Nzambi aludi bavuminanga, kuna kwalanda o Nzambi wabavana wana.
22 I bosi, Faro okanikini nkangu andi awonso vo: “Konso nsedia una vo mwan’ayakala wa Ayibere, nuntuba muna Nzadi a Nile, kansi avo mwan’ankento nuyambula kazinga.”+
Mvovo vana yand'a lukaya
^ Mvovo wa sina: “ana batuka muna luketo lwa Yakobo.”
^ Mvovo wa sina: “Awana batuka muna luketo lwa Yakobo, 70 lwa mioyo.”
^ Mvovo wa sina: “O wan’a Isaele.”
^ Yovo “babatumbikidi mbuta za salu.”
