Zasoneka Matai 21:1-46
21 Vava bafinamene muna Yerusaleme yo lwaka kuna Betefangi vana Mongo a Olive, Yesu otumini alongoki andi wole,+
2 ubavovese vo: “Nuenda muna vata dina kuntwala, vava nulwaka, nuwana e buluku diakangidilwa kumosi yo mwan’andi vana ndambu. Nukutulula mo, nuantwasila mo.
3 Avo muntu unuvovese diambu, nuvova vo: ‘Mfumu ovuidi mo mfunu.’ Vana vau okunuyambula nuiza mau.”
4 Ediadi diavangama muna lunganesa dina diavovua muna ngunza, oku vo:
5 “Nuzayisa kwa mwan’ankento a Zione vo: ‘Tala! O ntinu aku ona okwizanga nkwa ngeye,+ nlembami,+ ofongele vana swala dia buluku, elo, mwan’a buluku.’”+
6 Alongoki bele, bavangidi una Yesu kabakanikini.+
7 Batwese e buluku ye mwan’andi, babatensekele mvuatu miau, Yesu ovuende vana swala dia buluku.+
8 Ayingi muna nkangu bayadidi e mvuatu miau muna nzila,+ ankaka bazengele ndala, bayadidi zo muna nzila.
9 E ndonga ikedi kuna ntwala ye awana banlende, bakazidinge vo: “E Nzambi, tudodokele, vuluza o Mwan’a Davidi!+ Nkwa nsambu ndiona okwizilanga muna nkumbu a Yave!*+ Tudodokele kuna kayengele, umvuluza!”+
10 Vava kakotele muna Yerusaleme, e nkangu wawonso muna mbanza unikukini, oku vo: “Nani ndioyo?”
11 E ndonga ikwamanene vova vo: “Ondioyu i Yesu wa ngunza,+ musi Nazarete a Ngalili!”
12 Yesu okotele muna tempelo, ovaikisi awonso batekelenge yo sumba muna tempelo, okindwidi e meza ma asobi a nzimbu* ye kunda ya awana batekelenge mayembe.+
13 Ubavovese vo: “Diasonama vo, ‘E nzo ame iyikilwa vo nzo a sambu,’+ kansi oyeno nukitwidi yo se nzo a mivi.”+
14 E mpofo ye mbevo za malu zizidi kwa yandi muna tempelo, ubawukidi.
15 Vava nganga zambuta ye asoneki bamwene masivi kavangidi ye yingiana-ngiana ikazanga muna tempelo, oku vo: “E Nzambi, tudodokele, vuluza Mwan’a Davidi!”+ bafungidi kikilu o makasi,+
16 banyuvuidi vo: “Nga owidi dina bevovanga awaya e?” Yesu ubavutwidi vo: “Elo, ngwidi dio. Nga ke nuatanga wo ko vo: ‘Muna nua mia yingiana-ngiana ye nsedia mu tuka lusanisinu e’?”+
17 Ubasisidi, ovaikidi muna mbanza, wele kuna Betania yo leka kuna.+
18 Ekolo kavutukidinge muna mbanza muna mene-mene, omwene nzala.+
19 Omwene nsanda vana ndambu a nzila, wele wo finama, kansi kawene mo bundu ko, makaya mankatu kaka,+ ovovese wo vo: “Kuyima diaka bundu ko.”+ Vana vau o nsanda uyumini.
20 Vava alongoki bamwene wo, basivikidi yo vova vo: “Aweyi o nsanda uyumini vana vau?”+
21 Yesu ubavutwidi vo: “Kieleka inuvovese wo vo, avo nuna ye lukwikilu yo lembi katikisa, ke nuvanga kaka edi mpangidi ko muna nsanda, kansi avo nuvovese mpe o mongo wau vo: ‘Katuka yo tubwa muna mbu,’ ediadi divangama.+
22 Mawonso nulomba muna sambu, avo nuina yo lukwikilu, tambula nutambula mo.”+
23 Vava kakotele muna tempelo, nganga zambuta ye akuluntu a nkangu bezidi kwa yandi ekolo kelonganga, banyuvuidi vo: “Mu nkia wisa ovangilanga e mambu mama? Nani uvene wisa kiaki?”+
24 O Yesu ubavovese vo: “Mono mpe diambu ikunuyuvula. Avo numvutwidi, ozevo omono mpe ikunuvovesa kana mu nkia wisa ivangilanga mambu mama:
25 E mvub’a Yoane, akweyi yatuka? Ku zulu yovo kwa wantu?” Bayantikidi vovaziana, oku vo: “Avo tuvovele vo, ‘Ku zulu,’ okutuyuvula vo, ‘Ekuma nualembi kunkwikidila?’+
26 Kansi, avo tuvovele vo, ‘Kwa wantu,’ wonga wa ndonga tuna wau, kadi yau awonso bekwikilanga vo Yoane i ngunza.”
27 Bavutwidi kwa Yesu vo: “Ke tuzeye ko.” Ubavutwidi vo: “Omono mpe kikunuvovesa ko kana mu nkia wisa ivangilanga e mambu mama.
28 “Adieyi nubenze? Muntu una ye wana wole. Wele kwa mwan’antete, umvovese vo: ‘E mwana, wenda sala muna mpatu a vinyu o unu.’
29 Ovutwidi vo: ‘Kikwenda ko,’ kansi kuna kwalanda, uyibenze, wele.
30 Wele kwa mwan’anzole, ovovele diau dimosi. Umvutwidi vo: ‘Se ngienda, e Mfumu,’ kansi kele ko.
31 Nani muna yau awole ovangidi luzolo lwa se diandi?” Bavutwidi vo: “Ona wantete.” Yesu ubavovese vo: “Kieleka inuvovese vo, avakulwisi a mpaku ye minta-zumba vita bekunuvita muna Kintinu kia Nzambi.
32 Kadi Yoane wayiza kunusonga e nzil’a nsongi, ke nuankwikila ko. Kansi avakulwisi a mpaku ye minta-zumba bankwikila,+ oyeno kana una vo nuamona wo, ke nuayibanza ko kimana nuankwikila.
33 “Nuwa e kingana kiankaka: Vakedi mfumu mosi a mpatu a vinyu, okunini e mpatu a vinyu,+ ozungidi yo lûmbu, otimini mo e kaminu dia vinyu yo tunga mo nzo yandá;+ osompekele yo kwa avati, i bosi wele ku nsi ankaka.+
34 Vava e nsungi a kutika e mbongo yafwana, otumini ntaudi zandi kwa avati kimana benda tambula e mbongo andi.
35 Kansi, avati babakidi ntaudi zandi, omosi banwende, wankaka bamvondele, wankaka bantubidi matadi.+
36 Otumini diaka ntaudi zankaka, ziviokele lutangu lwa buka kiantete, kansi babavangidi diau dimosi.+
37 I bosi, ubatwikidi o mwan’andi, oku vo: ‘O mwan’ame bekunzitisa.’
38 Wau bamwene o mwana, avati bavovazianene vo: ‘I yandi ndioyu osala ye fwa dia mpatu a vinyu.+ Nuiza twamvonda, twabaka e fwa diandi!’
39 Dianu vo, bambakidi, bamvaikisi kuna mbazi a mpatu a vinyu, bamvondele.+
40 Ozevo, vava mfumu a mpatu a vinyu kekwiza, adieyi kevanga kw’avati awaya?”
41 Bamvutwidi vo: “Vonda kekubavonda mu kuma kia bi wau yo sisa e mpatu a vinyu kw’avati ankaka, ana bekumvana e mbongo muna nsungi andi.”
42 Yesu ubavovese vo: “Nga ke nuatanga dio ko muna Sono vo: ‘E tadi dina diabembolwa kw’atungi i diau diakituka se mbut’a tadi dia konko?*+ Ediadi kwa Yave* diatuka, diasivi mu meso meto.’+
43 Kiaki i kuma inuvovesele vo, e Kintinu kia Nzambi kikatulwa kwa yeno yo vewa kwa zula kiyimanga e mbongo andi.
44 Ndiona mpe obwa vana tadi diadi, kosomoka kekosomoka.+ Konso ona dibwila, tufakesa dikuntufakesa.”+
45 Vava nganga zambuta ye Afarisi bawidi yingana yandi, babakwidi vo yau kavovelenge.+
46 Kana una vo bazolele kumbaka,* bamwene o wonga mu kuma kia ndonga, kadi bambadikilanga se ngunza.+
Mvovo vana yand'a lukaya
^ I sia vo, “awana basobanga e nzimbu muna baka nluta.”
^ Mvovo wa sina: “ntu a konko.”
^ Yovo “kunkanga.”
