Ngana 27:1-27
27 Kuyisani ko mu kuma kia mbazi,Kadi kuzeye ko dina ditwasa* konso lumbu.+
2 Yambula muntu ankaka* kasanisina, ke nu’aku ko;Yambula akaka* bavanga wo, ke befo yaku ko.+
3 E tadi dia zitu, e senge dia zitu kikilu,Kansi o makasi ketwasanga o zowa masundidi yau yole e zitu.+
4 O makasi diambu diampasi, e ngazi i nkukula,Kansi nani olenda zizidila kimpala?+
5 O sembela muntu vana ndonga disundidi o wete ke mu zola kwaswekama ko.+
6 O lusembo lwa nkundi lulenda twasa ntantu, kansi muna vanga wo, osonga vo nkwa ziku,+E mfiba za mbeni zayingi.*
7 Ndiona oyukwiti, obembolanga wiki wa sasala,Kansi ndiona una ye nzala, kana nkutu lekwa kia ndudi kuna kwa yandi kia nzenzo.
8 Nze nuni ovavukidi* e nzialw’andiI wau wina muntu ovavukidi nzo andi.
9 O mazi ye ndumbu imwesanga ntima e kiese,Diau dimosi ye kikundi kiambote kitukanga muna longi dia kieleka.*+
10 Kubembola nkundi aku ko ngatu nkundi a se diaku,Kukoti muna nzo a mpangi aku ko muna lumbu kiampasi zaku;O muntu una lukufi osundidi mpangi una kwanda.+
11 E mwan’ame, kala ye ngangu wamwesa ntim’ame kiese,+Kimana yavana mvutu kwa ndiona okuntiangunanga.+
12 O muntu una vo nlungaladi omwene e vonza, oswekamene,+Kansi e minkondwa ngangu balutakene yo baka mfwilu.*
13 Bonga mvuatu mia muntu avo obundidi nzenza e ntulu;Umbonga e nsimbi avo obundidi nkento a nzenza e ntulu.+
14 Avo muntu osambwidi nkwandi muna nding’angolo muna mene-mene,Dibadikilwa se sibu kwa yandi.
15 O nkento wazola ntantani* una nze nludi a nzo ukwamanananga noka muna lumbu kia mvula.+
16 Ndiona okunkakidila, olenda kakidila mpe tembwaYo batikina mazi muna koko kwandi kwalunene.
17 Wauna sengwa kisekeselanga e sengwa,O muntu mpe olengolanga nkundi andi.*+
18 Ndiona olunga-lunganga nsanda odia bundu yandi,+Ndiona olunga-lunganga mfumu andi ozitiswa.+
19 Nze una zizi kia muntu kimonekenanga muna maza,I una ntim’a muntu umonekenanga muna ntim’a nkwandi.
20 E Ziami ye fulu kia lufwasu* ke kilendi yukuta ko,+O meso ma muntu mpe ke meyukutanga ko.
21 Nze palata ye wolo uveleleselwanga muna fûlu dia tiya,+O muntu mpe otontelwanga muna lusanisinu ketambulanga.
22 Kana nkutu otutidi e zowaNze masa matutilu muna dibuka,*O uzowa ke ukunkatuka ko.
23 Ofwete toma zaya e mpw’a kambi diaku.
Toma lunga-lunganga* mameme maku,+
24 Kadi e kimvuama ke kizingilanga yakwele mvu ko,+Ngatu kolowa yakala yamu mbandu ke mbandu.
25 E titi ya nkunzu ivididi, e titi yampa ivaikidi,E titi ya miongo ikutikilu.
26 E wan’a mameme bekuvananga mvuatu,E vaka ya nkombo ivananga e ntalu a mpatu.
27 Vena ye kimvumina kiafwana kia nkombo muna kuyidikila,Yo dikila esi nzo aku ye ntaudi zaku zamakento.
Mvovo vana yand'a lukaya
^ Mvovo wa sina: “dina diwuta.”
^ Yovo “nzenza.”
^ Mvovo wa sina: “Anzenza.”
^ Nanga, “zakivunina; zakomekena.”
^ Yovo “otinini.”
^ Yovo “longi dia nsi a ntima.”
^ Yovo “vewa tumbu.”
^ Yovo “wuninina.”
^ Mvovo wa sina: “ndose a nkundi andi.”
^ Yovo “Seol ye Abadone.”
^ Yovo “kiamba.”
^ Yovo “Sia ntima muna; Sia sungididi muna.”
