Tuku 27:1-46
27 Vava Isaki kanunini, o meso mandi ke mamonanga diaka ko, obokele Esau+ wa mwan’andi ambuta, ovovele vo: “E mwan’ame!” Oyandi vo: “Mon’oyu!”
2 Isaki ovovele vo: “Owau ndunini kwame. E lumbu ifwa kizeye kio ko.
3 Muna kuma kiaki, dodokolo, bonga e salanganu yaku ya nkonda, kutu kiaku ye nzanz’aku, wenda kuna mfuta wambakila e mbizi.+
4 I bosi, undambila yo muna mpila izolanga yo kuntwasila yo. Ozevo, omono idia yo kimana yasambula vitila yafwa.”
5 Kansi, Rebeka owidi Isaki ekolo kamokenenge yo Esau wa mwan’andi. Esau wele kuna mfuta mu konda e bulu katwasa kio.+
6 Rebeka ovovese Yakobo wa mwan’andi vo:+ “Ngwidi se diaku ovovesenge Esau wa mpangi aku vo:
7 ‘Untwasila e mbizi a nkonda yo kundambila yo, yadia, kimana yasambula ova ndose a Yave vitila yafwa.’+
8 Owau e mwan’ame, toma wá yo vanga mana ikukanikina.+
9 Dodokolo, wenda kuna kwin’e kambi, bonga ko wan’a nkombo wole ana basundidi o wete, kimana yatoma kubalamba muna mpila ina o se diaku kezolanga.
10 I bosi, ubanata kwa se diaku kadia, kimana kasambula vitila kafwa.”
11 Yakobo ovovese Rebeka wa ngudi andi vo: “Kansi, o Esau wa mpangi ame nkwa mika,+ omono nkand’ame a nitu walengoka.
12 Adieyi ivanga avo se diame umbabate?+ Kieleka, o se diame oyindula vo yandi nsakanene. Ozevo, sibu ikuyitwasila ke nsambu ko.”
13 Muna diadi, o ngudi umvovese vo: “E mwan’ame, yambula e sibu kikaninu omu ngeye kiza kwa mono. Ongeye vanga kaka dina ivovese, wenda, untwasila wan’a nkombo.”+
14 Yakobo wele, obongele wana nkombo yo kubatwasa kwa ngudi andi. O ngudi andi otomene kubalamba muna mpila ina se diandi kezolanga.
15 I bosi, Rebeka obongele mvuatu ambote wa Esau wa mwan’andi ambuta, una wakala muna nzo, ovuikidi wo kwa Yakobo wa mwan’andi anleke.+
16 Ovuikidi mpe nkanda mia wan’a nkombo muna moko mandi ye muna nsingu, vana vakondelo e mika.+
17 I bosi, Rebeka obongele madia ye mbolo ina kakubikidi, ovene mo kwa Yakobo wa mwan’andi.+
18 Yakobo okotele vana vena se diandi yo vova vo: “E tata!” Oyandi vo: “Mon’oyu! Ngeye i nani e mwan’ame?”
19 Yakobo ovutwidi kwa se diandi vo: “Mono Esau wa mwan’aku antete.+ Mpangidi una umpovese. Dodokolo vumbuka, wadia e mbizi ame a nkonda, kimana wansambula.”+
20 Muna diadi, Isaki oyuvuidi mwan’andi vo: “E mwan’ame, aweyi obakidi e mbizi yoyo mu nzaki?” Yakobo ovutwidi vo: “Kadi Yave wa Nzambi aku otwese yo kwa mono.”
21 Isaki ovovese Yakobo vo: “E mwan’ame, finama yababata yazaya kana vo ngeye kikilu i Esau wa mwan’ame yovo ve.”+
22 Yakobo ofinamene se diandi Isaki, o Isaki umbabate, i bosi ovovele vo: “E ndinga ya Yakobo, kansi o moko, i moko ma Esau.”+
23 Kanzayididi ko, kadi muna moko mandi mukedi mika nze moko ma mpangi andi Esau. Muna kuma kiaki, unsambwidi.+
24 I bosi, unyuvuidi vo: “Ngeye kikilu i mwan’ame Esau?” Ovutwidi vo: “Ingeta.”
25 Isaki ovovele vo: “E mwan’ame, untwasila e mbizi a nkonda obakidi yadia, i bosi ikusambula.” Yakobo untwasidi yo, odidi; untwasidi vinyu, onuini.
26 I bosi, Isaki wa se diandi umvovese vo: “E mwan’ame, dodokolo finama wamfiba.”+
27 Yakobo ofinamene yo kumfiba, Isaki owilu e nsunga* za nlele miandi.+ Unsambwidi yo vova vo:
“Tala, e nsunga za mwan’ame zina nze nsunga za kiana kisambwilu kwa Yave.
28 Yambula o Nzambi aludi kavana e unge dia zulu+ yo ntoto uyimanga e mbongo+ ye ulolo wa mbongo ye vinyu yampa.+
29 Yambula o nkangu wasadila, e zula yavumbamena. Kala mfumu a mpangi zaku, yambula wan’a ngudi aku bavumbamena.+ Konso ndiona okusiba, osibwa, konso ndiona okusambula, osambulwa.”+
30 Vava Isaki kamene sambula Yakobo, o Yakobo una kakatukidi kaka vana ndose a Isaki wa se diandi, Esau wa mpangi andi otukidi muna nkonda.+
31 Oyandi mpe olambidi madia mambote yo twasa mo kwa se diandi. Ovovese se diandi vo: “Vumbuka e tata wadia e mbizi a mwan’aku, kimana wansambula.”
32 Isaki unyuvuidi vo: “Ngeye i nani?” Ovutwidi vo: “Mono Esau wa mwan’aku antete.”+
33 Isaki oyantikidi zakama ye ngolo zawonso, oyuvuidi vo: “Ozevo, nani wele muna nkonda yo kuntwasila e mbizi? Ndidi yo vitila walwaka, insambwidi. Nkwa nsambu kikilu kekala!”
34 Vava kawidi e mvovo mia se diandi, Esau obokomokene ye dilu yo kendalala kwayingi, ovovese se diandi vo: “E tata, unsambula, unsambula mpe omono!”+
35 Isaki ovovele vo: “Nleke aku umvunini yo tambula e nsambu zikaninu kwa ngeye.”
36 Muna diadi, Esau ovovele vo: “Ikuma kenena ye nkumbu Yakobo,* kadi unsundidi mu nkumbu miole!+ Obakidi kala e kimbuta* kiame,+ owau obakidi diaka e nsambu zame!”+ Unyuvuidi vo: “Kundundidi nsambu ko e?”
37 Isaki ovutwidi Esau vo: “Inkitwidi se mfumu aku,+ imven’e mpangi zandi zawonso se ntaudi zandi, imven’e mbongo ye vinyu yampa se madia.+ E mwan’ame, adieyi diaka ndenda vanga kwa ngeye?”
38 Esau oyuvuidi se diandi: “E tata, lusambulu lumosi kaka una lwau e? Unsambula, unsambula mpe omono e tata!” Muna diadi, Esau obokomokene ye dilu.+
39 Isaki wa se diandi umvutwidi vo:
“Tala, kwandá ozingila ye ntoto miyimanga e mbongo ova nza, kutambula mpe dime* ko dituka kuna zulu.+
40 Muna nsosolo aku ozingila,+ osadila nleke aku.+ Kansi, vava kulenda diaka zizidila ko, ongeye otolola e vangu kiandi muna nsingu aku.”+
41 Kansi, Esau olundidi Yakobo makasi mu kuma kia nsambu kavewa kwa se diandi,+ Esau ovovele muna ntim’andi vo: “O lufwa lwa se diame lufinamene.+ Avo kafwa kaka, o nleke ame Yakobo vonda ikumvonda.”
42 Vava Rebeka kazayiswa e mvovo mia Esau wa mwan’andi ambuta, vana vau obokelese Yakobo wa mwan’andi anleke yo kumvovesa vo: “Tala! O mpangi aku Esau okanini kulanda e kunda kavonda.*
43 Owau, e mwan’ame vanga dina ikuvovesa. Telama, watinina kuna kwa mpangi ame Labani kuna Karani.+
44 Zingila kûna yavana makasi ma mpangi aku mekuluka,
45 yavana makasi kena mau o mpangi aku omu ngeye mekuluka yo vilakana dina umvangidi. I bosi, ikutwikila e nsangu wavutuka. Kilendi vidisa yeno awole mu lumbu kimosi ko.”
46 I bosi, Rebeka okwamanene vovesa Isaki vo: “Kina diaka ye kiese kia zinga ko mu kuma kia wan’amakento a Kete.+ Avo Yakobo obongele nkento vana vena wan’amakento a Kete, nze wan’amakento a nsi yayi, e zingu kiame nkia mfunu kikala?”+
Mvovo vana yand'a lukaya
^ Yovo “mvumba.”
^ Ina ye nsasa vo: “Nsimbi a Bombo; Nsundi.”
^ Yovo “nswa wa kimwan’antete.”
^ Yovo “lowa.”
^ Yovo “okuyifiaulwisanga muna kani dia kuvonda.”
