Tuku 41:1-57
41 E mvu miole vava mialunga, Faro olotele ndozi+ vo otelamene vana kumu dia Nzadi a Nile.
2 Muna nzadi mutombokele ngombe nsambwadi zankento, zambote ye zamazi, zididinge vana titi ya Nile.+
3 Ngombe nsambwadi zakaka zankento zambi ye zamana tanda zivaikidi muna Nile, zitelamene vana ndambu a ngombe zamazi, vana kumu dia Nile.
4 E ngombe zambi ye zamana tanda ziyantikidi dia e ngombe nsambwadi zambote ye zamazi. O Faro osikamene.
5 I bosi, ovutukidi kuna tulu, olotele diaka ndozi yanzole. Omwene ntu nsambwadi mia witi mivaikidi mu nti umosi, miazala ye witi ye miambote.+
6 I bosi, vavaikidi ntu nsambwadi miakaka mia witi miamana tanda yo yuminina mu kuma kia mbangazi a tembwa kia este.
7 E ntu nsambwadi mia witi miamana tanda, miminini e ntu nsambwadi miazala ye witi ye miambote. O Faro osikamene, omwene vo ndozi kwandi.
8 Kansi muna mene, Faro otokanene kikilu. Muna kuma kiaki, obokelese nganga zawonso za nkisi ye akwa ngangu awonso a Engipito. Faro ubazayisi e ndozi zandi, kansi ke vakedi muntu ko olendele zo sasila kwa Faro.
9 Muna diadi, o mfidi wa atambiki a mbungwa ovovese Faro vo: “O unu ifunguna masumu mame.
10 E Faro, ongeye wafungila selo yaku makasi. Muna kuma kiaki, watuma vo yasiwa muna pelezo ya nzo a mfidi wa ayingidi, mono yo mfidi wa avangi a mbolo.+
11 I bosi, twalota ndozi muna fuku umosi. Omono yo yandi twalota konso muntu ye ndozi andi, konso ndozi ye nsas’andi.+
12 Twakala ye toko dimosi wa Nyibere, wa ntaudi a mfidi wa ayingidi.+ Vava twanzayisa e ndozi zeto,+ oyandi watusasila e ndozi ya konso muntu.
13 Mawonso mavangamena nze una katusasila mo. Omono yavutulwa muna salu kiame, kansi o nkwame wamanikwa vana nti.”+
14 Muna diadi, Faro obokelese Yosefe.+ Vana vau bamvaikisi muna pelezo.*+ Yosefe okatwidi e nzevo yo soba e mvuatu miandi, wele kwa Faro.
15 Faro ovovese Yosefe vo: “Ndozi ndotele, kansi ke vena muntu ko olendele yo sasila. Edi ngwidi mu kuma kiaku vo, olenda wá e ndozi yo sasila yo.”+
16 Yosefe ovutwidi Faro vo: “Ke mono ko. Nzambi ovana e nsas’ambote ya ndozi aku e Faro.”+
17 Faro ovovese Yosefe vo: “Muna ndozi ame, ntelamene vana kumu dia Nzadi a Nile.
18 Mbwene ngombe nsambwadi zankento zambote ye zamazi zitombokele muna Nile, ziyantikidi dia e titi vana kumu dia Nile.+
19 Ngombe nsambwadi zankaka zankento zitombokele, zamana yoya, zambi ye zamana tanda. Muna nsi yawonso ya Engipito, kisidi mona ngombe zambi za mpila yayi ko.
20 E ngombe zankento zamana tanda ye zambi ziyantikidi dia e ngombe nsambwadi zankento zantete zamazi.
21 Kansi vava zimene kubadia, e nitu zau zambi kaka zikedi nze kuna lubantiku, kulendi wo zaya nkutu ko vo dia zididi. Muna kuma kiaki, nsikamene.
22 “I bosi, muna ndozi mbwene diaka ntu nsambwadi mia witi mivaikidi mu nti umosi, miazala ye masa ye miambote.+
23 I bosi, vavaikidi ntu nsambwadi miankaka mia witi miamana tanda yo yuminina mu kuma kia mbangazi a tembwa kia este.
24 E ntu mia witi miamana tanda, miminini e ntu nsambwadi miambote. Nzayisi e ndozi zazi kwa nganga za nkisi,+ kansi ke vakedi muntu ko olendele zo kunsasila.”+
25 Yosefe ovovese Faro vo: “E ndozi za Faro imosi kwandi ye nsasa mosi kaka zina. O Nzambi aludi ovovese kwa Faro mana kevanga.+
26 E ngombe nsambwadi zankento zambote, i mvu nsambwadi. Diau adimosi mpe, e ntu nsambwadi mia witi miambote, mvu nsambwadi. E ndozi zaku imosi kwandi ye nsasa mosi kaka zina.
27 E ngombe nsambwadi zankento zambi ye zamana tanda zina zitombokele kuna nima ngombe zambote, mvu nsambwadi; e ntu nsambwadi mia witi miankatu ye miayuma mu kuma kia mbangazi a tembwa kia este, mikala se mvu nsambwadi mia mvengele.
28 Nze una mpovele kala kwa Faro: O Nzambi aludi osongele kwa Faro mana kevanga.
29 “Vekala mvu nsambwadi mia ulolo wa madia mwamu nsi yawonso ya Engipito.
30 Kansi kuna nim’a mvu miami, mukwiza mvu nsambwadi mia mvengele, wantu bevilakana o ulolo wa madia wakala omu nsi ya Engipito. O mvengele ufwasa e nsi.+
31 O ulolo wa madia wakala mwamu Engipito ke usungamenua diaka ko mu kuma kia mvengele ukwiza, kadi wampasi kikilu ukala.
32 E ndozi iloteso nkumbu miole kwa Faro, kadi e diambu ditomene sikidiswa kwa Nzambi aludi, o Nzambi aludi olungisa dio.
33 “Ozevo, ngeye Faro vava muntu walungalala ye nkwa ngangu, wansia kinkengi kia nsi ya Engipito.
34 E Faro, tumbika akengi omu nsi, kutika tini kia tanu kia mbongo yawonso ya Engipito muna mvu nsambwadi mia ulolo wa madia.+
35 Yambula akengi bakutika madia mawonso ma mvu miambote mikwiza; muna lutumu lwa Faro, bavambula witi usiwa muna malundilu ma mbanza zawonso se madia yo lunga-lunga wo.+
36 Madia momo i mesadilwa muna nsi, muna mvu nsambwadi mia mvengele mikwiza omu nsi ya Engipito, kimana e nsi yalembi fwaswa mu kuma kia mvengele.”+
37 E ngindu zazi ziyangidikidi Faro ye ntaudi zandi zawonso.
38 Muna kuma kiaki, Faro ovovese ntaudi zandi vo: “Nga valenda soloka diaka muntu ankaka una ye mwand’a Nzambi nze ndioyu?”
39 Faro ovovese Yosefe vo: “Wau vo Nzambi uzayisi mawonso mama, ke vena muntu ko walungalala ye nkwa ngangu nze ngeye.
40 Ngeye kibeni okala nkengi a nzo ame, o nkangu ame wawonso ukulemvokela muna mawonso.+ Vana kunda kiame kia kintinu kaka ikusundila.”
41 Faro ovovese diaka Yosefe vo: “Tala, itumbikidi kinkengi kia nsi yawonso ya Engipito.”+
42 I bosi, okatwidi e mpeto* kakele yau muna koko, osidi yo muna koko kwa Yosefe, umvuikidi e mvuatu mia lino yo nsang’a wolo muna nsingu.
43 Vana ntandu, undiatisidi muna kalu diandi dianzole dia kimfumu, muna diadi o nkangu ukazidinge kuna ntwal’andi vo: “Avréke!”* Muna mpila yayi, otumbikilu kinkengi kia nsi yawonso ya Engipito.
44 Faro ovovese diaka Yosefe vo: “Mono i Faro, kansi ke vena muntu ko omu nsi yawonso ya Engipito+ ovanga konso diambu* kondwa kwa nsw’aku.”
45 I bosi, Faro ovene Yosefe nkumbu vo Zafenate-paneka, umvene mpe Asenate+ wa mwan’ankento a Potifera, wa ngang’a One* se nkaz’andi. Yosefe oyantikidi tumina* nsi ya Engipito.+
46 Yosefe mvu 30 kakala miau+ vava kayenda vana ndose a* Faro, wa ntinu a Engipito.
Yosefe okatukidi vana ndose a Faro, wele akangadi muna nsi yawonso ya Engipito.
47 Muna mvu nsambwadi mia ulolo wa madia, o ntoto wayima mbongo ayingi.
48 Yosefe okwamanene kutika madia mawonso ma mvu nsambwadi muna nsi ya Engipito yo lunda mo muna mbanza zawonso. Muna konso mbanza, olundidi madia matukanga muna mpatu zazunga e mbanza.
49 Yosefe okwamanene lunda witi wayingi, nze senge dia mbu, yavana balembwa mo teza, kadi ke malendi tezakana ko.
50 Vitila walwaka o mvu wa mvengele, Yosefe+ owutidi wana wole amakala, ana bawutukidi muna Asenate wa mwan’ankento a Potifera, wa ngang’a One.*
51 Yosefe oyikidi o mwan’antete vo Manase,*+ kadi ovovele vo: “Nzambi unsadisi mu vilakana e mpasi zame zawonso ye nzo a se diame yawonso.”
52 O mwan’anzole unyikidi vo Eferaime,*+ kadi ovovele vo: “Nzambi umpene wana muna nsi a mpasi zame.”+
53 I bosi, e mvu nsambwadi mia ulolo wa madia muna nsi a Engipito mifokokele.+
54 Nze una Yosefe kavova,+ e mvu nsambwadi mia mvengele miyantikidi. Mukedi mvengele muna nsi zawonso, kansi muna nsi yawonso ya Engipito mukedi ye madia.*+
55 Kuna kwalanda, o mvengele ukotele muna nsi yawonso ya Engipito, o nkangu uyantikidi kaza kwa Faro mu kuma kia madia.+ Faro ovovese esi Engipito awonso vo: “Nuenda kwa Yosefe, nuvanga konso dina kekunuvovesa.”+
56 O mvengele ukwamanene mu nza yawonso.+ I bosi, Yosefe oyantikidi ziula malundilu mawonso ma madia bakedi mau yo tekela esi Engipito,+ kadi o mvengele uwokele kikilu muna nsi ya Engipito.
57 Vana ntandu, o wantu ova nza yawonso bayendanga kuna Engipito muna sumba witi kwa Yosefe, kadi o mvengele uwokele kikilu ova nza yawonso.+
Mvovo vana yand'a lukaya
^ Mvovo wa sina: “wulu dia maza; wulu.”
^ Mpeto ina wantu basadilanga mu sia e dimbu muna nkanda.
^ O mvovo wau nanga wasadilwanga mu lomba kw’akaka basonga zitu yo vana nkembo kwa muntu.
^ Mvovo wa sina: “ozangula koko yovo kulu kwandi.”
^ I sia vo, Eliopolise.
^ Yovo “kangala muna.”
^ Yovo “vava kayantika sadila.”
^ I sia vo, Eliopolise.
^ Ina ye nsasa vo: “Ndiona Ovilakesanga.”
^ Ina ye nsasa vo: “Wuta Dianzole.”
^ Mvovo wa sina: “mbolo.”
