Zasoneka Yoane 12:1-50
12 Lumbu sambanu vitila e Nduta yayantika, o Yesu wizidi kuna Betania, kuna kwakala Lazaro,+ ona kafula muna mafwa.
2 Banlambìdi miadia ma nlekelo, Mareta ubasadidi vana meza,+ kansi Lazaro mosi muna awana bedianga yandi vana meza.
3 I bosi, Maria obongele ndambu a kilo* kia mazi mansunga, nardu yambote, yantalu, okusidi mo muna malu ma Yesu, okungwini malu mandi muna nsuki zandi. E nzo izele ye nsunga za mazi.+
4 Kansi, Yuda musi Kereote,+ wa nlongoki andi, ona okunyekola, ovovele vo:
5 “Ekuma tulembi tekela mazi mama mu 300 za denali* yo vana e nzimbu kwa asukami?”
6 Ekuma kavovele diambu diadi ke mu sia ko vo asukami katokanenanga, kansi wau vo mwivi kakala, kadi yandi walundanga e nkel’a nzimbu ye wayiyanga e nzimbu zasiwanga mo.
7 Yesu ovovele vo: “Nunyambula, kadi ovangidi wo mu kuma kia lumbu kia luziku lwame.+
8 Kadi asukami nukalanga yau ntangwa zawonso,+ kansi omono ke nukala yame ntangwa zawonso ko.”+
9 Ke kolo ko, ndong’ayingi ya Ayuda bazeye wo vo i kuna kena, bezidi, ke mu kuma kia Yesu kaka ko, kansi bamona mpe Lazaro ona kafula muna mafwa.+
10 Nganga zambuta bavuende e mfulu kimana bavonda mpe Lazaro,
11 kadi muna kuma kiandi, Ayuda ayingi bayendanga ko yo kwikila muna Yesu.+
12 Muna lumbu kialanda, ndong’ayingi ina yayiza kuna nkinzi, bawidi wo vo Yesu mu kwiza kena kuna Yerusaleme.
13 Babongele ndala, bavaikidi, bele kunkika, bakazidi oku vo: “E Nzambi, tudodokele, umvuluza! Nkwa nsambu ndiona okwizilanga muna nkumbu a Yave*+ wa Ntinu a Isaele!”+
14 Vava Yesu kasolwele swala dia buluku, ofongele dio,+ wauna wasonama vo:
15 “Kumoni wonga ko, e mwan’ankento a Zione. Tala! O ntinu aku okwizanga, ofongele vana mwan’a buluku.”+
16 O mambu mama alongoki ke bavita mo bakula ko, kansi vava Yesu kakembeswa,+ basungamena vo mambu mama masonama mu kuma kiandi, i mau mpe bamvangidi.+
17 E ndonga ina yakala yandi vava kabokela Lazaro muna ziami+ yo kumfula muna mafwa, basianga umbangi.+
18 Muna diambu diadi mpe, ndonga bezidi kunkika kadi bawidi wo vo sinsu kiaki kavangidi.
19 Afarisi bavovanene vo: “Nutala, ke tulenda vanga diambu ko. Numwene, e nza yawonso mu kunlanda ina.”+
20 Vakedi Mingerekia miankaka vana ven’awana bezidi sambila kuna nkinzi.
21 Bezidi kwa Filipo+ wa musi Betesaida a Ngalili, bamvovese vo: “E Mfumu, tuzolele monana yo Yesu.”
22 Filipo wizidi samunuina Andere. Andere yo Filipo bezidi samunuina Yesu.
23 Kansi, Yesu ubavutwidi vo: “E ntangwa ifwene kimana o Mwan’a muntu kakembeswa.+
24 Kieleka, kieleka, inuvovese vo, e mbwaz’a witi,* avo ilembele bwa muna ntoto yo fwa, imosi kaka ikala; kansi avo ifwidi,+ mbongo ayingi iwuta.
25 Konso ona ozolele o moyo andi fwasa kefwasa wo, konso ona omenga o moyo andi+ omu nza yayi, lunda kelunda wo yamuna moyo a mvu ya mvu.+
26 Avo muntu ozolele kunsadila, yambula kandanda, konso oku ngina, i kuna mpe kekala selo kiame.+ Avo muntu ozolele kunsadila, o Se diame okunzitisa.
27 Owau o ntim’ame uyangamene,+ adieyi ivova? E Tata, umpuluza mu ntangwa yayi yampasi.+ Kansi, e ntangwa yayi yampasi ifwete kundwakila, kadi ekiaki i kuma ngizidi.
28 E Tata, kembesa e nkumbu aku.” I bosi, e ndinga+ itukidi kuna zulu, oku vo: “Nkembese yo kala, kembesa ikembesa yo diaka.”+
29 E ndonga ikedi vavana bawidi wo, bavovele vo, mbandanu utalumukini. Akaka bavovele vo: “Mbasi ovovele kwa yandi.”
30 Yesu ovutwidi vo: “E ndinga yayi ke izidi muna kuma kiame ko, kansi muna kuma kieno.
31 Owau e nza yayi mu fundiswa ina; owau o nyadi a nza+ yayi se keyinganeswa.+
32 Kansi, vava imanikwa ova ntoto,+ itunta wantu a mpila zawonso oku ngina.”
33 Ovovele e mvovo miami mu songa e mpila lufwa kefwa.+
34 I bosi, e ndonga imvutwidi vo: “Twawa muna Nsiku vo o Kristu ozinga yakwele mvu.+ Aweyi ovovele vo, o Mwan’a muntu kafwete manikwa?+ Nani i Mwan’a muntu ndioyo?”
35 Yesu ubavovese vo: “O ntemo mu fikolo kaka ukala vovo nuina. Nukangala wau nuina yo ntemo, kimana e tombe kialembi kunubukamena; konso ona okangalelanga muna tombe, kuna kekwendanga kazeye ko ko.+
36 Ekolo nuina yo ntemo, nukwikila muna ntemo, kimana nuakituka wan’a ntemo.”+
O Yesu wau kavovele mambu mama, okatukidi, ubaswekamene.
37 Kana una vo sinsu yayingi kavanganga vana bena, ke bakwikilanga muna yandi ko,
38 kimana e mvovo mia Yesaya wa ngunza mialungana, ona wavova vo: “E Yave,* nani okwikidi muna mana tuvovele?*+ Vo i koko kwa Yave* kwa nani kusengomweno?”+
39 Yesaya wayika diaka e kuma balembi kwikidila, vava kavova vo:
40 “Ovondele meso mau yo badisa ntima miau, kimana balembi mona muna meso mau ngatu bakula muna ntima miau, baviluka, omono yabawuka.”+
41 Yesaya wavova mambu mama mu kuma kia Kristu kadi wamona nkembo andi.+
42 Kana nkutu mfumu za Ayuda, engi bakwikidi muna yandi,+ kansi muna diambu dia Afarisi i balembele kuntambulwila vana meso ma ndonga, kimana balembi yingwa muna sambilu;+
43 kadi balutidi zola nkembo a wantu, ke mu nkembo a Nzambi ko.+
44 Kansi, Yesu ovovele mu nding’angolo, oku vo: “Konso ona okwikilanga omu mono, ke mu mono kaka ko kekwikilanga, kansi muna ndiona wantuma mpe;+
45 konso ona umbwene, omwene mpe Ndiona wantuma.+
46 Omono ngizidi nze ntemo ova nza,+ kimana konso ona okwikilanga omu mono, ke kala mu tombe ko.+
47 Kansi, avo muntu owa mvovo miame yo lembi mio lunda, kikuntumba ko; kadi kizidi tumba nza ko, kansi nza ngizidi vuluza.+
48 Konso ona okumbembola yo lembi tambula mvovo miame, vena ye ndiona okuntumba. E diambu dina mpovele, i diau kekuntumbila muna lumbu kia mbaninu.
49 Kadi kivovele muna ngindu za mono kibeni ko, kansi, o Se ona wantuma, i yandi wampana nkanikinu wa mana ivova yo mana ilonga.+
50 Nzeye wo vo o nkanikinu wau ufilanga ku moyo a mvu ya mvu.+ Dianu vo mana ivovanga, wauna o Se kampovesela, i una ivovelanga mo.”+
Mvovo vana yand'a lukaya
^ Witi i mbwaza zivangilwanga e mfumfu a mbolo.
^ Mvovo wa sina: “mana bawidi kwa yeto.”
