Zasoneka Yoane 18:1-40
18 Vava kavovele mambu mama, Yesu ovaikidi ye alongoki andi, wele kuna simu dia Ndimb’a Kiderone,+ kuna kwakala mpatu ina kakotele ye alongoki andi.+
2 Yuda ona okunyekola wazaya mpe fulu kiaki, e kuma kadi Yesu nkumbu miayingi kayendanga ko ye alongoki andi.
3 Dianu vo, Yuda otwese buka kia makesa ye ayingidi batumwa kwa nganga zambuta ye ayingidi a Afarisi, wizidi ko ye mini ye minda ye nuaninua.+
4 Yesu wau kazeye mawonso mekumbwila, otelamene kuna ntwala, ubayuvuidi vo: “Nani nuvavanga?”
5 Bamvutwidi vo: “Yesu wa musi Nazarete.”+ Ubavovese vo: “Mono oyu.” Yuda wa nyekodi otelamene yau mpe.+
6 Kansi, o Yesu vava kabavutwidi vo: “Mono oyu,” bavutukidi lunima-nima yo bwa vana ntoto.+
7 Ubayuvuidi diaka vo: “Nani nuvavanga?” Bavutwidi vo: “Yesu wa musi Nazarete.”
8 Yesu ubavutwidi vo: “Inuvovese kala vo mono oyu. Avo mono nuvavanga, nuyambula awaya benda kwau.”
9 Ediadi diavangama kimana dialungana dina kavova vo: “Kividisi kana mosi ko muna awana wampana.”+
10 I bosi, Simone Petelo ona wakala ye nsosolo, ovolele wo, ozengele kutu kwalunene kwa ntaudi a ngang’ambuta.+ Nkumbu a ntaudi, Maleko.
11 Yesu ovovese Petelo vo: “Vutula nsosolo muna kutu kiandi.+ Nga kifwete nua ko e mbungwa ina kampene o Se diame?”+
12 I bosi, makesa ye mfumu za makesa ye ayingidi a Ayuda babakidi Yesu, bankangidi o moko.
13 Entete, bele yandi kwa Anasi, kadi kô wa Kayafa,+ ona wakala se ngang’ambuta muna mvu wauna.+
14 Kayafa yandi walukisa Ayuda vo disundidi o mfunu kwa yau vo muntu mosi kafwa muna wete dia nkangu.+
15 Simone Petelo ye nlongoki ankaka, balende Yesu.+ O nlongoki ndioyo wazayakana kwa ngang’ambuta, okotele kumosi yo Yesu vana yanzala kia ngang’ambuta,
16 kansi, Petelo otelamene kuna mbazi, vana mwelo. Muna kuma kiaki, o nlongoki ona wazayakana kwa ngang’ambuta, wele mokena ye ndiona walangidilanga mwelo, okotese Petelo.
17 Ntaudi ankento ona walangidilanga mwelo, ovovese Petelo vo: “Ngeye mpe nga kumosi ko muna alongoki a muntu ndioyu?” Ovutwidi vo: “Ve, ke mono ko.”+
18 Antaudi yo makesa batelamene vana ndambu a tiya twa makala tuna balungidi kimana bayotela kadi kiozi kwakala. Petelo mpe otelamene vavana yo yotela.
19 O mbut’anganga oyuvuidi Yesu mu kuma kia alongoki andi ye malongi mandi.
20 Yesu umvutwidi vo: “Vana meso ma wantu awonso yavovelenge. Ntangwa zawonso yalongelenge muna masambilu ye muna tempelo,+ muna mukutakanenanga Ayuda awonso, kisidi vovela diambu kuna kinsweki ko.
21 Ekuma ungiuvulwidi? Yuvula awana bawidi mana yabavovesenge. Oyau bazeye mo.”
22 Vava kavova mambu mama, kesa dimosi diatelama vavana, owende Yesu e mbata vana lose,+ ovovele vo: “Nga i wau ofwete vutulwila mbut’anganga e?”
23 Yesu umvutwidi vo: “Avo diambu diambi mpovele, sila dio umbangi; kansi, avo diambote mpovele, ekuma ungwandidi?”
24 I bosi, Anasi umfididi kwa Kayafa wa ngang’ambuta yo moko makangwa.+
25 Muna ntangwa yayina, Simone Petelo watelama vana ndambu a ziku yo yotela. I bosi, bamvovese vo: “Ongeye nga kumosi ko muna alongoki andi e?” Ovakwidi nkalu, oku vo: “Ve, ke mono ko.”+
26 Mosi muna ntaudi za ngang’ambuta, una vo yitu kia ndiona wazengwa o kutu kwa Petelo,+ ovovele vo: “Ke ngeye ko mbwenenge okedi yandi muna mpatu e?”
27 Kansi, Petelo ovakwidi wo diaka nkalu, vana vau e nsusu ikokwele.+
28 I bosi, muna mene-mene, bakatwidi Yesu kwa Kayafa banète kuna lûmbu lwa nguvulu.+ Kansi yau kibeni ke bazolele kota kuna lûmbu lwa nguvulu ko, balembi funzuka+ kimana badia e lambu dia Nduta.
29 Dianu vo, Pilato ovaikidi kwa yau, vana mbazi, ovovele vo: “Nkia mfundu nuizidi fundila muntu ndioyo?”
30 Bamvutwidi vo: “O muntu ndioyo kele vo ke kimpumbulu ko, ke twadi kunyekola kwa ngeye ko.”
31 Pilato ubavovese vo: “Numbonga yeno kibeni, nuamfundisila muna nsiku eno.”+ Ayuda bamvutwidi vo: “Ke tuna yo nswa wa vonda muntu ko.”+
32 Ediadi dilunganisi dina kavova o Yesu mu songa e mpila lufwa kefwila.+
33 Pilato okotele diaka muna lûmbu lwa nguvulu, obokele Yesu, unyuvuidi vo: “Ngeye i Ntinu a Ayuda e?”+
34 Yesu ovutwidi vo: “Nga mu ngindu za ngeye kibeni oyuvulwidi diambu diadi yovo akaka bavovese dio mu kuma kiame?”
35 Pilato ovutwidi vo: “Nga mono i Nyuda e? Esi zula kiaku ye nganga zambuta bayekwele kwa mono. Adieyi ovangidi?”
36 Yesu ovutwidi vo:+ “E Kintinu kiame ke kia nza yayi ko.+ Kele vo Kintinu kiame kiakala kia nza yayi, alandi ame badi nuana kimana yalembi yekolwa kwa Ayuda.+ Kansi, e Kintinu kiame ke kitukidi mu nza yayi ko.”
37 Dianu Pilato umvovese vo: “Ngeye u ntinu e?” Yesu ovutwidi vo: “Ngeye kibeni ovovele wo vo mono i ntinu.+ Kadi i diau yawutukila, i diau yayizila ova nza, yasila e ludi kimbangi.+ Konso ona wina kuna sambu dia ludi owanga nding’ame.”
38 Pilato umvovese vo: “Nki i ludi?”
Vava kavovele diadi, wele diaka kwa Ayuda, ubavovese vo: “Kimwene ngielele ko muna yandi.+
39 Kansi, wau vo i fu kieno kiakunuyambulwila muntu muna nkinzi a Nduta,+ nga nuzolele yanuyambulwila o Ntinu a Ayuda e?”
40 Bakazidi diaka, oku vo: “Ke muntu ndioyo ko, Baraba kaka!” Baraba mwivi kakala.+
