Zasoneka Yoane 3:1-36
3 Vakala Mfarisi mosi, nkumbu andi Nikodemo,+ wa nkuluntu a Ayuda.
2 Muntu ndioyo wayiza kwa Yesu mu fuku,+ umvovese vo: “E Rabi,+ tuzeye wo vo nge i nlongi watuka kwa Nzambi, kadi ke vena ona olenda vanga sinsu+ ina ovanganga ko, nanga vo Nzambi kakala yandi.”+
3 O Yesu umvutwidi vo: “Kieleka, kieleka, ivovese vo, avo muntu kawutulukidi ko,*+ kalendi mona Kintinu kia Nzambi ko.”+
4 Nikodemo umvovese vo: “O muntu una vo mbuta aweyi kalenda wutulukila? Nga lenda kwandi kota muna vumu kia ngudi andi, kawutuluka diak’e?”
5 Yesu ovutwidi vo: “Kieleka, kieleka, ivovese vo, muntu avo kalembi wutwa kwa maza+ yo mwanda,+ kalendi kota muna Kintinu kia Nzambi ko.
6 Eki kiawutwa kwa nsuni i nsuni, eki kiawutwa kwa mwanda i mwanda.
7 Kusiviki ko wau ivovese vo: Nufwete wutuluka.
8 E tembwa kivevomokanga konso kuna kizolèle, ongeye owanga o mazu mandi, kansi kuna kitukidi kuzeye ko ko, ngatu kuna kikwendanga. I wau wina konso ona wawutwa kwa mwanda.”+
9 Nikodemo umvutwidi vo: “Aweyi mambu mama malenda vangamena?”
10 Yesu umvutwidi vo: “Ngeye i nlongi a Isaele, kuzeye mambu mama ko e?
11 Kieleka, kieleka, ivovese vo, dina tuzeye i diau tuvovanga, dina tumwene i diau tusilanga umbangi, kansi o umbangi weto ke nutambwidi wo ko.
12 Wau inuvovese mambu ma nza, ke nukwikidi ko, ozevo, aweyi nukwikidila avo inuvovese mambu ma zulu?
13 Ke vena muntu ko watomboka kuna zulu,+ ndiona kaka wakulumuka kuna zulu,+ wa Mwan’a muntu.
14 Wauna Mose kamanikina e nioka vana makanga,+ i una kafwete manikinua o Mwan’a muntu,+
15 kimana konso ona okwikilanga muna yandi, kavua moyo a mvu ya mvu.+
16 “Kadi muna nzola katoma zola o wantu,* o Nzambi i kavanina o Mwan’andi mosi kaka,+ kimana konso ona osonga lukwikilu muna yandi ke fwaswa ko, moyo a mvu ya mvu kevua.+
17 Kadi o Nzambi watuma Mwan’andi ova nza, ke mu fundisa wantu* ko, kansi o wantu* bavuluzilwa kaka muna yandi.+
18 Konso ona osonga lukwikilu muna yandi ke fundiswa ko.+ Konso ona olembi songa lukwikilu, ofundisu kala, wau kalembele songa lukwikilu muna nkumbu a Mwana mosi kaka a Nzambi.+
19 Kiaki i kuma kia lufundisu: o ntemo wizidi omu nza,+ kansi o wantu balutidi zola e tombe ke mu ntemo ko, kadi mavangu mau mambi.
20 Kadi konso ona ovanganga mambu mambi omengene o ntemo, ke kwiza ku ntemo ko, kimana mavangu mandi malembi tumbwa.*
21 Kansi konso ona ovanganga mambu maludi okwiza ku ntemo,+ kimana mavangu mandi masengomoka, wau vo muna luzolo lwa Nzambi mavangamena.”
22 I bosi, Yesu ye alongoki andi bele muna mavata ma Yuda, mûna kanangini yau yo vuba wantu.+
23 O Yoane mpe wavubilanga kuna Ainone, kuna ndambu a Salemi, e kuma kadi, i kûna kwakala o maza mayingi,+ o wantu bayizanga yo vubwa;+
24 kadi Yoane kasilu ntete muna pelezo ko.+
25 Alongoki a Yoane bafilanene mpaka yo Nyuda mosi mu kuma kia fu kia luveleleso.
26 Bezidi kwa Yoane, bamvovese vo: “E Rabi, o muntu ona wakala yaku kuna simu dia Yodani, ndiona wasila kimbangi,+ yandi ovubanga, wantu awonso kwa yandi bekwendanga.”
27 Yoane ovutwidi vo: “O muntu kalendi tambula lekwa ko, avo kaveno kio ko kuna zulu.
28 Yeno kibeni nukunsilanga e kimbangi mu dina yavova vo: ‘Ke mono ko i Kristu,+ kansi tumwa yatumwa yamvita oku ntwala.’+
29 Konso ndiona una ye ndumb’ansompi i toko diansompi.+ Kansi o nkundi a toko diansompi wau katelamene yo kunwá, omwene kiese kiayingi mu kuma kia nding’a toko diansompi. Muna kuma kiaki, e kiese kiame kilunganene.
30 E salu kiandi wokela kaka kiwokela, vo i kiame, kuluka kaka kikuluka.”
31 Ndiona otukidi kuna ntandu,+ vana ntandu a wantu awonso i kena. Ndiona otukidi omu nza, wa nza, mambu ma nza kevovanga. Ndiona otukidi kuna zulu, vana ntandu a wantu awonso i kena.+
32 Mana kamwene yo wá,+ i mau kesila kimbangi, kansi ke vena muntu ko otambulwidi kimbangi kiandi.+
33 Konso ona otambulwidi kimbangi kiandi, osidi wo e dimbu* vo Nzambi waludi.+
34 Dianu vo, ndiona o Nzambi katuma, mambu ma Nzambi kevovanga,+ kadi Oyandi ke vanina mwanda mu tezo* ko.
35 O Se ozolele o Mwana,+ oyekekele lekwa yawonso vana moko mandi.+
36 Ndiona osonganga lukwikilu muna Mwana, una yo moyo a mvu ya mvu;+ ndiona okolamenanga Mwana, ke mona moyo ko,+ kansi o makasi ma Nzambi muna yandi kaka mekala.+
Mvovo vana yand'a lukaya
^ Nanga, “kawutukidi kuna ntandu ko.”
^ Mvovo wa sina: “zola e nza.”
^ Mvovo wa sina: “nza.”
^ Mvovo wa sina: “nza.”
^ Yovo “senzekwa.”
^ Yovo “osikidisi wo.”
^ Yovo “mu nzongo.”
