Yindula e diambu edi: Ngonde zole kaka ziviokele tuka Mado kayantikila kimakangu yo Mayamona, kansi omonanga nze yandi bazayana se tuka kolo. Nkumbu miayingi betwikaziananga mensagem yo mokena ola zayingi muna telefone. Vitila nkutu mosi kamanisa ovova, mosi ozayanga kala dina o nkwandi kazolele vova. Kansi owau, Mayamona kazolele diaka ko vo bamokenanga kaka.

Mu ngonde zole ziviokele, Mayamona yo Mado moko kaka basimbananga yo fibana mu nzaki zawonso. Mado kazolele diaka vanga mambu mankaka ko. Kansi, kazolele mpe yambula Mayamona ko. Ke vena diaka muntu ankaka ko okumvuanga o mfunu yo kunyangidika. Mado ovovele muna nsi a ntima vo: ‘Mono yo Mayamona zolana kikilu tuzolananga. . .’

Avo mu ntela ya banda kimakangu wina yo wanana ye diambu nze dina Mado kawanana diau, adieyi ovanga?

Avo okulwidi o nsiku wa lembi telama vana ntandu a wulu diandá, dilenda kutwasila vonza. Diau dimosi mpe, olenda kuyisia mu vonza avo okulwidi e nsiku mia Nzambi nze owu uvovanga vo: ‘Nuyikenga ye zumba.’—1 Tesalonika 4:3.

O kulula o nsiku wau nkia vonza dilenda kutwasila? Nkand’a Nzambi uvovanga vo: “Konso ona otele zumba, nitu andi kasumukini.” (1 Korinto 6:18) Aweyi diambu diadi dinina dialudi?

 Lufimpu lusonganga vo aleke ayingi ana bevukananga vitila basompa, bekuyisianga mu mpasi nze ezi zina ova yanda.

• NTANTU ZASAKA. Ayingi mun’awana betanga e zumba vitila basompa, bekuyibanzanga mu kuma kia dina bavanga.

• LEMBI BUNDAZIANA VUVU. Avo bamanisi tá e zumba, konso muntu oyantikanga kukiyuvula vo: ‘Nani diaka wavukana yandi kala?’

• KUYIBANZA. Dumbelele yayingi bezolanga banda kimakangu yo muntu ona olenda kuntanina ke ona ozolele kunsakanena ko. Kuna diak’e sambu, matoko mayingi beyambulanga zola e ndumba ona bavukane yandi.

• Longi: Avo otambulwidi vukana vitila wasompa, nitu aku okondwa luzitu yo vidisa lekwa kisundidi o mfunu. (Roma 1:24) E nitu aku mfunu kikilu ina, kufwete yambula ko vo yasakanenwa.

Songa vo una yo nkuma wa lemvokela o nsiku wa ‘kuyikenga ye zumba.’ (1 Tesalonika 4:3) Vava osompa, olenda kwaku vukana. Okala ye kiese kia vukana lembi tokana, kuyibanza yovo kala ye wonga una wantu ayingi bekalanga wau vava bevukananga vitila basompana.—Ngana 7:22, 23; 1 Korinto 7:3.

• O muntu ona otoma kuzolanga, nga olenda vanga diambu dikutwasila mpasi muna nitu ye muna ngindu?

• O muntu ona okuvuanga kikilu o mfunu, nga olenda sia e ngwizani aku yo Nzambi mu vonza?—Ayibere 13:4.