LONGI 2
Rebeka Wayangidikanga Yave
Rebeka i nkento mosi watoma zolanga Yave. E nkumbu a nkaz’andi Isaki. Oyandi mpe Yave kazolanga. Aweyi Rebeka kazayila Isaki? Aweyi kasongela vo Yave kazolanga yangidika? Yambula twazaya diaka mayingi mu kuma kiandi.
Isaki mwan’a Abarayama yo Sara kakala. Kuna nsi ya Kenani bazingilanga. Esi Kenani ke basambilanga Yave ko. Kansi, Abarayama wazola vo mwan’andi kasompa nkento ona wasambilanga Yave. Muna kuma kiaki, watuma Elieze wa selo kiandi kenda vavila Isaki o nkento kuna Karani kwazingilanga yitu ya Abarayama.
Rebeka wasala kwayingi mu vana maza kwa samo
Elieze wayenda ye ntaudi zakaka za Abarayama. Nkangalu wandá kikilu wakala. Bayenda ye samo kumi zanata madia ye tukau. Elieze aweyi kadi zayila o nkento kesola mu kuma kia Isaki? Vava Elieze ye ntaudi zakaka balwaka kuna Karani, baningama vana sima kia maza, kadi Elieze wazaya wo vo ke kolo ko akento bekwiza teka maza. Wasamba kwa Yave vo: ‘O ndumba mvovesa vo, umpana maza yanua, kampana mo kumosi ye samo zame, i nzaya izaya vo ndioyo i nkento osolele.’
I bosi, nleke Rebeka wayiza vana sima kia maza. O Nkand’a Nzambi uvovanga vo mote kikilu kakala. Elieze wanlomba maza kanua. Rebeka wavova vo: ‘Ingeta, ikuvana maza kumosi ye samo zaku.’ Sungamena vo e samo zina ye vwina maza mayingi zinuanga. Muna kuma kiaki, Rebeka wayendanga nkumbu miayingi kuna sima mu teka maza. Nga omwene muna fwaniswa e mpila kesadilanga?— Elieze wasivika kikilu mu mpila ina Yave kavanina e mvutu za sambu kiandi.
Elieze wavana Rebeka tukau twayingi twambote. Rebeka wanata Elieze ye selo yakaka kuna nzo a mase mandi. Elieze wavova ekuma Abarayama kantumina kuna Karani ye una Yave kavanina e mvutu za sambu kiandi. Mase ma Rebeka bayangalala kikilu yo yambula vo kasompana yo Isaki.
Rebeka wayenda kumosi yo Elieze kuna Kenani mu kazala yo Isaki
Nga obenze vo Rebeka watambulwila kazala yo Isaki?— Rebeka wazaya wo vo Yave watuma Elieze kuna Karani. Muna kuma kiaki, vava mase mandi banyuvula kana vo ozolele kwenda kuna Kenani yo kazala yo Isaki, Rebeka wavova vo ‘Ingeta nzolele kwenda.’ Vana vau, wayenda yo Elieze. Vava balwaka kuna Kenani, wakazala yo Isaki.
Wau vo Rebeka wavanga dina Yave kazola vo kavanga, Yave wansambula. Muna mvu mialanda, Yesu wawutukila muna kanda diandi! Avo otanginini mbandu a Rebeka yo yangidika Yave, ngeye mpe osambulwa.
