Muna samuna e “nsangu zambote” kuna “kwa zula yo makanda, ye ndinga, ye nkangu miawonso” una ufwene, tuvaikisanga nkanda mu tezo kia 750 za ndinga. (Lusengomono 14:6) Aweyi tusadilanga e salu kiaki? Tusalanga kio muna lusadisu lwa buka ki’asoneki a nsi zayingi ana besonekanga e nkanda miami kumosi ye buka kia asekodi akwa vema. Yau awonso Mbangi za Yave.

E nkanda mu ndinga Kingelezo mikubikilwanga. Buka kia Selo Yambuta, yau bevitang’o ntu muna salu kisalwanga kwa Buka kia Asoneki kuna vula diasina. Ampangi a buka kiaki befilanga e salu kisalanga asoneki besadilanga kuna vula diasina ye muna mavula makaka. O kala ye asoneki mu nsi zayingi, dikutusadisanga mu soneka mambu mevangamanga mu fulu yayingi kimana e nkanda mieto miayangalelwa kwa wantu a zula yawonso.

Malongi mama metwikwanga kwa asekodi. Avo bamene kubika malongi mama yo tondwa kwa Selo Yambuta, metwikwanga muna nzila internete kwa buka kia asekodi mu nza yawonso ana besekolanga mo, fimpa yo tangulula malongi mama. Asekodi besianga ngolo za sadila ‘mvovo miasikila mia ludi’ mivananga e nsas’a mvovo mia Kingelezo muna ndinga besekolanga.​—Kimpovi 12:10.

O sadila komputador disadisanga mu sala mu nzaki. E komputador ka zilendi sala ko e salu kisalwanga kwa asoneki ye asekodi. Kansi, e salu kiau kilenda salwa mu nzaki muna sadila dicionário zina muna komputador ye programa zakaka zisadisanga mu vavulula mambu. Mbangi za Yave bavanga e programa iyikilwanga vo (MEPS). E programa yayi isadisanga mu singika malongi mu ndandani, kayanesa e tini, lamika mafoto, i bosi e nkanda minietekwanga.

Ekuma tuvangilanga e ngolo za sekola e nkanda kana nkutu muna ndinga ke zivovuanga kwa wantu ayingi ko? E kuma kadi, i luzolo lwa Yave vo, “wantu awonso bavuluzwa yo luaka muna visa kia zay’e ludi.”​—1 Timoteo 2:​3, 4.

• Aweyi nkanda mieto mikubikilwanga?

• Ekuma tusekolwelanga e nkanda mieto mu ndinga zayingi?