Vava kiafinama lufwa lwandi, Yesu wavova vo: “E nsangu zazi zambote za kintinu zisamunwa muna nza yawonso, muna umbangi kwa zula yawonso; i bosi iluak’e mbaninu.” (Matai 24:​14) Kansi, aweyi e nsangu zambote zadi samunwinwa mu nza yawonso? Muna landa e mbandu kasisa o Yesu vava kakala ova ntoto.​—Luka 8:⁠1.

Tuvavanga wantu muna nzo zau. Yesu wakubika alongoki andi mu samuna e nsangu zambote muna nzo ye nzo. (Matai 10:​11-13; Mavangu 5:42; 20:​20) Akristu a tandu kiantete bavewanga e zunga kiasikididi muna sila umbangi. (Matai 10:​5, 6; 2 Korinto 10:​13) Diau adimosi mpe o unu, muna samuna nsangu zambote, konso nkutakani ivuidi zunga kina ifwete sadila. Ediadi dikutusadisanga mu lungisa nkanikinu wa Yesu wa ‘telekela nkangu, yo sila wo umbangi.’​—Mavangu 10:⁠42.

Tusianga e ngolo za mokena yo wantu konso fulu tulenda kubawana. Yesu watusisila mbandu ambote muna silanga umbangi vana fulu kia ndonga nze vana ndambu a mbu yovo va sima kia maza. (Maku 4:1; Yoane 4:​5-​15) Oyeto mpe tumokenanga yo wantu oma ma Nkand’a Nzambi konso fulu tulenda kubawana​—muna mpambu za nzila, muna mazandu, vana fulu iningamenanga makalu yovo muna telefone. Tusilanga mpe umbangi kwa mfinangani zeto, akundi a salu ye sikola ye yitu yeto vava tukalanga y’elau dia vanga wo. Ngolo zazi zawonso tuvanganga muna sila umbangi zisadisanga mazunda ye mazunda ma wantu mu nza yawonso mu wá ‘e nsangu zambote za luvuluzu.’​—Nkunga 96:2.

Nga vena yo muntu ozolele samunwina e nsangu zambote za Kintinu kia Nzambi? Nkia nsendo zilenda kuntwasila kuna se ntu? Kulundi e nsangu zazi ko zitwasanga e vuvu kwa wantu, ubazayisa zo mu nzaki zawonso.

• Nki i “nsangu zambote” zifwete samunwa?

• Mbangi za Yave aweyi betangininanga e mbandu a Yesu muna samuna e nsangu zambote?