Ayingi muna wantu beyuvulanga e yuvu yayi babwila sumbula ye ke bevavanga kaka zaya e mvutu ko kansi bevavanga mpe lufiaulwisu. Wantu ankaka bemonanga vo e vangu diadi i vangu dilutidi nsoki dina wantu bavanga, muna kuma kiaki diampasi dikalanga kwa yau mu kwikila muna Nzambi.

 Luvunu: Diambi mu yuvula e kuma Nzambi kayambulwila e vangu diadi diansoki.

 Ludi: Kana nkutu wantu ana bakala ye lukwikilu lwasikila, bayuvula e kuma Nzambi keyambulwilanga o mambu mambi. Muna bonga e nona, Kabakuke wa ngunza wayuvula Nzambi vo: “Ekuma lufwasu ye nsoki unina va ndose ame? Ekuma ntantani ye nkindu ziwokelele?” (Kabakuke 1:3, Nsekola ya Nz’ampa) Vana fulu kia tumba Kabakuke, Nzambi wayambula vo yuvu yandi yasonekwa muna Bibila kimana yatangwa kwa wantu awonso.

 Luvunu: Nzambi ke tokanenanga e mpasi za wantu ko.

 Ludi: Nzambi omenganga mambu mawonso mambi ye mpasi metwasanga. (Ngana 6:16-19) Muna lumbu ya Noa, Nzambi wakendalala mu kuma kia mambu mansoki mawokelanga ova ntoto. (Tuku 6:5, 6) Kalukatikisu ko vo, Nzambi wakendalala kibeni vava ayadi a Nazi bavonda ulolo wa Ayuda.—Malaki 3:6.

 Luvunu: Nzambi wayambula e vangu diadi diansoki muna tumba Ayuda.

 Ludi: Nzambi wayambula vo Yerusaleme yafwaswa kwa esi Roma muna tandu kiantete. (Matai 23:37–24:2) Tuka kolo kiakina, Nzambi ke solanga nkangu ko muna kubasonga e dienga yovo kubatumba. Vana meso ma Nzambi “kavena nswaswani ko vana vena Nyuda yo Mungerekia.”—Roma 10:12.

 Luvunu: Kele vo vakala ye Nzambi anzodi yo Mpungu-ngolo, kadi yambula ko vo e vangu diadi diansoki diavangama.

 Ludi: Kanele vo ke Nzambi ko otwasanga e mpasi, ezak’e ntangwa oyambulanga e mpasi mu kolo kiandwelo.—Yakobo 1:13; 5:11.

 E kuma kiafila Nzambi mu yambula e vangu diadina diansoki i kiau mpe kikumfilanga mu yambula vo wantu bamona e mpasi, i sia vo, muna vana e mvutu muna mpaka zavaikiswa vioka mvu miayingi. Bibila kitoma songanga vo Nkadi ampemba i muntu oyalanga e nza yayi, ke Nzambi ko. (Luka 4:1, 2, 6; Yoane 12:31) Tala mambu mole meyikwanga muna Bibila oma malenda kutusadisa mu zaya e kuma Nzambi kayambulwila e vangu diadina diansoki.

1.   Nzambi wavanga wantu yo nswa wakuyisolela. Nzambi wavovesa wantu antete, i sia vo, Adami yo Eva mana kazola vo bavanga, kansi kabakomekena ko vo balemvokela. Yau kibeni babaka e nzengo zavanga edi diambote ye edi diambi. E nzengo zau zambi ye nzengo wantu ankaka bebakanga muna lusansu lwawonso, zatwasa mfwilu miayingi kwa wantu. (Tuku 2:17; 3:6; Roma 5:12) O nkanda Statement of Principles of Conservative Judaism (Declaração de Princípios do Judaísmo Conservador) wavova vo: Wau vo wantu besadilanga o nswa wakuyisolela mu mpila yambi, ediadi ditwasanga mpasi zayingi.” Vana fulu kia katula elau diadi kwa wantu, Nzambi wavana e ntangwa kwa wantu kimana bateza singika mambu muna mpil’au.

2.   Nzambi olenda ye osinga fokola e mfwilu miawonso miatwasa e vangu diadi diansoki. Nzambi osianga nsilu wafutumuna ulolo wa wantu bafwa kumosi ye awana bafwa mu kuma kia vangu diadi diansoki. Ofokola mpe mpasi ye ntantu bemonanga awana bavuka muna vangu diadi. (Yesaya 65:17; Mavangu 24:15) Wau vo Nzambi ozolanga wantu, ediadi dikutuvananga e vuvu vo olungisa e nsilu miami.—Yoane 3:16.

 Wantu ayingi bavuka muna vangu diadi diansoki, basikila muna lukwikilu yo solola e kani dia zingu muna bakula e kuma Nzambi keyambulwilanga e mpasi ye mana kevanga muna fokola zo.