«Күйөөлөр аялдарын өз денесин сүйгөндөй сүйүшү керек. Аялын сүйгөн эркек өзүн сүйөт. Анткени эч ким эч качан өз денесин жек көрбөйт, тескерисинче, азыктандырып, бапестейт» (ЭФЕСТИКТЕР 5:28, 29).

Үй-бүлөнүн башчысы — эркек (Эфестиктер 5:23). Бирок жакшы күйөө катаал, өктөм эмес. Үйдөгүлөрүнөн көптү талап кыла бербейт. Ал аялын баалайт, иштеп аны жакшы багат, ошондой эле жакшы көрөрүн айтып турат. Аялы дайыма жадырап-жайнап жүрүшү үчүн, колунан келгенин баарын кылат. Өзүнүкүн бербей, өжөрлөнө бербейт (Филипиликтер 2:4). Ал аны кунт коюп угат, өзүнүн ой-сезимдерин да жашырбай айтат. Ал ага «каарданбайт», кол көтөрбөйт же кагып-силкпейт (Колосалыктар 3:19).

«Аял... күйөөсүн терең урматтасын» (ЭФЕСТИКТЕР 5:33).

Күйөөсүн урматтаган жана анын чечимдерин колдогон аял үйдө тынчтык болушуна салым кошот. Эгер күйөөсү туура эмес бир нерсе кылып алса, кемсинтпейт. Кайра, сабыр сактап, сылык сүйлөйт (1 Петир 3:4). Эгер кайсы бир көйгөй тууралуу сүйлөшкүсү келсе, ылайыктуу учур тандап, оюн жылуу-жумшак билдирет (Насаатчы 3:7).

«Эркек... аялы менен биригет да, экөө бир дене болот» (БАШТАЛЫШ 2:24).

Эркек менен аял баш кошкондо, ортосунда өзгөчө ынактык пайда болот. Ошол мамилеси салкындап кетпеши үчүн, алар чер жазыша сүйлөшүп, бири-бирине кичинекей болсо да жакшы иштерди кылып турушу керек. Ошондой эле жарынын көзүнө чөп салбашы керек. Бул таш боордукка жатат. Андай ишке баргандар ишеничтен кетет жана үй-бүлөсүн талкалайт (Еврейлер 13:4).

«Баланы туура жолго сал. Ал ошол жолдон карыганда да чыкпайт» (НАКЫЛ СӨЗДӨР 22:6).

Ата-энелер балдарын тарбиялаганга Кудайдын алдында милдеттүү. Ошол милдетин жакшы аткарышы үчүн алар балдарын тартиптүү болгонго үйрөтүшү жана бул жагынан өздөрү жакшы үлгү болушу керек (Мыйзам 6:6, 7). Эгер баласы тентек кылса, эстүү ата-эне дароо эле урушуп кирбейт. Алар шак эле урушуп кирбей, адегенде баласын кунт коюп угушат (Жакып 1:19). Эгер тартипке салыш керек болсо, аша чаап кетпейт, ачууга алдырбайт.

«Балдар,.. ата-энеңердин тилин алгыла... Ата-энең[ер]ди сыйлагыла» (ЭФЕСТИКТЕР 6:1, 2).

Балдар ата-энесинин тилин алып, аларды сыйлашы керек. Ошентишсе, аларды кубантышат жана үй-бүлөдө тынчтык, ынтымак болот. Ал эми эресеге жеткен балдар ата-энесин кантип сыйлашкан болот? Аларга жакшы кам көрүшү керек. Мисалы, үй жумуштарына кол кабыш кылып турушу же тыйын-тыпыр жагынан жардам берип турушу керек (1 Тиметей 5:3, 4).