Жунус 3:1—10
3 Жахаба Жунуска экинчи жолу:+
2 «Тур, улуу шаар Нинебиге+ барып, айткандарымды жарыяла»,— деди.
3 Жунус Жахабанын айтканына баш ийип,+ Нинебиге+ жөнөдү. Нинеби аябай чоң шаар* эле: баштан-аяк жөө аралап чыкканга 3 күн кетчү.
4 Жунус шаарга барып, эртеден кечке чейин кыдырып: «Кырк күндөн кийин Нинеби кыйратылат»,— деп жарыялап жүрдү.
5 Нинебинин эли ал кабарды угуп, Кудайга ишенип калды.+ Алар орозо жарыялап, улук-кичик дебей баары таар жамынды.
6 Жунус айткан кабар Нинебинин падышасына жеткенде, ал тактысынан туруп, падыша кийимин чечти да, таар жамынып, күлгө отурду*.
7 Анан бүт Нинебиге мындай деп жар салууну буйрук кылды:
«Падыша менен беделдүү кишилеринин буйругу мындай: адам да, үй айбанаты да, бодо мал да, майда мал да эч нерсе жебесин. Эч ким эч нерсе жебесин, суу да ичпесин.
8 Эл таар жамынып, үй айбанаттарына да таар жаап, Кудайга катуу жалынып-жалбарсын. Жаман жолун таштап, зордук-зомбулугун токтотсун.
9 Ким билет, балким, чыныгы Кудай алаамат түшүрөм деген оюнан кайтып, кайнаган каарын басса, аман калаттырбыз!»
10 Алардын кылган иш-аракетин, жаман жолунан кайтканын көргөндө+ чыныгы Кудай алаамат жиберем деген оюнан кайтып, жиберген жок.+
Шилтемелер
^ Сөзмө-сөз: «Кудай үчүн улуу шаар».
^ Бул кимдир бирөөнүн кайгырып жатканын же кылган күнөөсү үчүн өкүнүп жатканын билдирет.
