Лебилер 24:1—23
24 Жахаба Мусага дагы мындай деди:
2 «Чырактар дайыма күйүп турушу үчүн, ысрайыл элине таза зайтун майын алып келип тургула деп буйрук кыл.+
3 Арун жолугушуу чатырындагы келишим сандыгын тосуп турган көшөгөнүн сырт жагындагы чырактардын Жахабанын алдында кеч киргенден таң атканга чейин күйүп турушуна көз салсын. Бул — өзүңөр да, укум-тукумуңар да түбөлүккө сакташыңар керек болгон көрсөтмө.
4 Арун дайыма Жахабанын алдында таза алтындан жасалган чыракпаянын чырактарын+ даярдасын.
5 Эң жакшы ундан ортосу оюк 12 токоч жаса. Ар бирине эки килограммдай ун кетиши керек.
6 Аларды Жахабанын алдындагы таза алтындан жасалган үстөлдүн+ үстүнө алты-алтыдан кылып экиге бөлүп кой.+
7 Үстү-үстүнө коюлган ал нандардын үстүнө таза ладандан кой. Ал Жахабага арналган өрттөлчү тартуу катары нандардын ордуна тартуу кылынат.+
8 Дин кызматчы дем алыш сайын Жахабанын алдына ушундай нандарды коюп турсун.+ Бул — ысрайыл эли менен түбөлүккө түзүлгөн келишим.
9 Ал нандар Арун менен анын уулдарыныкы болот.+ Аларды ыйык жерде жешет.+ Анткени алар — Жахабага арналган өрттөлчү тартуулардын ичинен дин кызматчыга таандык абдан ыйык тартуу. Бул — түбөлүккө аткарыш керек болгон көрсөтмө».
10 Мисирлик кишиге турмушка чыккан бир ысрайылдык аялдын уулу+ бир жолу конуштан ысрайылдык бирөө менен мушташа кетти.
11 Ал Кудайдын ысмына тил тийгизип, каргай баштады.+ Ошондо аны Мусага алып барышты.+ Анын энесинин аты Шеломит эле. Ал Дан уруусундагы Дибри деген кишинин кызы болчу.
12 Жахабанын эмне деп чечкени билингенге чейин, анын уулун камап коюшту.+
13 Жахаба Мусага мындай деди:
14 «Менин ысмымды каргаган адамды конуштун сыртына алып чыккыла. Анын айткандарын уккандардын баары анын башына колдорун коюшсун, анан бүт жамаат аны таш бараңга алсын.+
15 Ысрайыл элине болсо мындай деп айт: „Ким Кудайын каргаса, күнөөсү үчүн жоопко тартылсын.
16 Жахабанын ысмына тил тийгизген адам өлүм жазасына тартылсын.+ Бүт жамаат аны таш бараңга алсын. Араңарда жашаган бөтөн жерлик болобу, ысрайылдык болобу, Кудайдын ысмына тил тийгизген адам өлүм жазасына тартылсын.
17 Ким киши өлтүрсө, өлүм жазасына тартылсын.+
18 Ким бирөөнүн малын уруп өлтүрсө, кунун төлөсүн: малдын ордуна мал берсин.
19 Ким бирөөнүн денесин жабыркатса, анын кылганы өзүнө да кылынышы керек.+
20 Ага кандай зыян келтирсе, өзүнө да ошондой зыян келтирилсин: сыныкка сынык, көзгө көз, тишке тиш.+
21 Бирөөнүн малын уруп өлтүргөн адам кунун төлөсүн,+ ал эми киши өлтүргөн адам өлүм жазасына тартылсын.+
22 Силер үчүн да, араңарда жашаган бөтөн жерлик үчүн да+ бир мыйзам болсун. Мен Жахабамын, силердин Кудайыңармын“».
23 Муса ушулардын баарын ысрайыл элине айткандан кийин, алар Кудайдын ысмын каргаган адамды конуштун сыртына алып чыгып, таш бараңга алышты.+ Жахаба Мусага кандай айтса, так ошондой кылышты.
