Падышалар 1-китеп 8:1—66
8 Андан соң Сулайман падыша Ысрайылдын аксакалдарын,+ ысрайыл элинин уруу башчылары менен урук башчыларынын баарын Иерусалимге чогултту.+ Алар Жахабанын келишим сандыгын Дөөтүнүн+ шаарынан, башкача айтканда, Сиондон алып чыгыш үчүн келишти.+
2 Эйтаним* айында, тактап айтканда, жетинчи айда бүт ысрайылдыктар Алачык майрамында* Сулайман падышанын алдына чогулушту.+
3 Ошентип, Ысрайыл аксакалдарынын баары келгенде, дин кызматчылар келишим сандыгын алып жөнөштү.+
4 Алар Жахабанын келишим сандыгын, жолугушуу чатырын,+ анын ичиндеги ыйык нерселердин баарын көтөрүп жөнөштү, аларды дин кызматчылар менен лебилер көтөрүп барышты.
5 Сулайман падыша менен ага келген бүт Ысрайыл жамааты болсо келишим сандыгынын алдына чогулушту. Алар укмуштай көп, санап бүткүс кой менен бодо малды курмандыкка чалышты.+
6 Андан соң дин кызматчылар Жахабанын келишим сандыгын ибадаткананын ички бөлмөсүнө+ — Ыйыктын ыйыгына — алып кирип, ал үчүн даярдалган орунга, керуптардын+ канаттарынын астына, коюшту.
7 Келишим сандыгы коюлган жердеги ал керуптардын канаттары жайылып тургандыктан, алар келишим сандыгын да, анын шыргыйларын да жаап турду.+
8 Шыргыйлар+ узун болгондуктан, алардын учтары ички бөлмөнүн алдындагы Ыйык жайдан көрүнүп турчу, бирок сырттан көрүнчү эмес. Алар бүгүнкү күнгө чейин ошол жерде турат.
9 Келишим сандыгынын ичинде Муса пайгамбар Хореп тоосунда салган+ эки таш лооктон+ башка эч нерсе жок болчу. Муса аларды Жахаба Мисирден чыккан ысрайыл эли менен+ келишим түзгөндө+ салган эле.
10 Дин кызматчылар Жахабанын ибадатканасынан* чыгышканда, анын ичин булут+ каптады.+
11 Булут каптап, Жахабанын ибадатканасы Жахабанын даңкына толгондуктан, дин кызматчылар ал жерде кызмат кыла албай калышты.+
12 Ошондо Сулайман: «Жахаба, сен коюу кара булуттун ичинде жашай турганыңды өзүң айткансың.+
13 Мен сага заңгыраган, сен түбөлүк жашай турган жай курдум»,— деди.+
14 Анан падыша бурулуп, бүт ысрайыл жамаатына бата берди, бүт жамаат туруп турду.+
15 Сулайман: «Атам Дөөтүгө убада берип, аны аткарган* Ысрайылдын Кудайы Жахаба даңкталсын!
16 Ал: „Мен ысрайыл элимди Мисирден алып чыккан күндөн тартып ушу убакка чейин, менин ысмым менен атала турган үй курулушу үчүн,+ Ысрайылдын урууларына таандык бир да шаарды тандаган эмесмин. Бирок ысрайыл элимди башкарсын деп, Дөөтүнү тандадым“,— деп айткан.
17 Атам Дөөтүнүн жүрөгүндө Ысрайылдын Кудайы Жахабанын ысмына арнап үй курайын деген каалоосу бар болчу.+
18 Бирок Жахаба ага: „Менин ысмыма арнап үй курууну абдан каалап жатканың жакшы.
19 Бирок ал үйдү сен курбайсың. Менин ысмыма арнала турган үйдү сенин уулуң курат“,— деп айткан.+
20 Жахаба убадасын аткарды. Себеби, Жахаба убада кылгандай эле, мен атам Дөөтүнүн ордуна такка отуруп, Ысрайылга падыша болдум. Анан Ысрайылдын Кудайы Жахабага арнап үй куруп,+
21 Жахабанын ата-бабаларыбызды Мисир жеринен алып чыкканда алар менен түзгөн келишими салынган сандык+ үчүн орун даярдадым»,— деди.
22 Анан Сулайман Жахабанын курмандык жайынын алдына туруп, бүт ысрайыл жамаатынын алдында колун жайып асманга көтөрүп,+
23 мындай деди: «Оо, Ысрайылдын Кудайы Жахаба, асманда да, жерде да сендей Кудай жок!+ Сен келишимди бузбайсың, сага чын жүрөктөн+ кызмат кылгандарды дайыма сүйүүңө* бөлөйсүң.+
24 Сен атама, кызматчың Дөөтүгө, берген убадаңды аткардың. Өзүң берген ошол убадаңды бүгүн жүзөгө ашырдың.+
25 Оо, Ысрайылдын Кудайы Жахаба, эми атама, кызматчың Дөөтүгө: „Эгер уулдарың баскан жолун байкап, сага окшоп жолумдан чыкпаса, анда Ысрайылда падышалык тактыда ар дайым сенин тукумуң отурат“,— деп берген убадаңды аткара көр.+
26 Оо, Ысрайылдын Кудайы, кызматчыңа, атам Дөөтүгө, берген ушул убадаңды аткара көр.
27 Оо, Кудай, чынында сен жерде жашамак белең?+ Сени атүгүл асман, асмандын асманы да батыра албаса,+ анда мен курган бул үй кантип батырмак эле?!+
28 Оо, Жахаба Кудайым, кулуңдун тилегине, ырайым кылышыңды сурап өтүнгөнүнө көңүл бура көр, бүгүн алдыңда тиленип жаткан кулуңдун үнүн, жардам сурап жалынганын уга көр.
29 „Менин ысмым ошол жерде болот“,+— деп өзүң айткан ушул жерден, ушул үйдөн күнү-түнү көзүңдү алба, ушул жакты карап тиленип жаткан кулуңдун үнүнө кулак сала көр.+
30 Кулуң ырайым кылышыңды суранганда, ысрайыл элиң ушул жакты карап тиленгенде, өзүң жашаган жайдан, асмандан,+ уга көр; аларды угуп, кечире көр.+
31 Кимдир бирөө башка бирөөгө каршы күнөө кылса жана жабыр тарткан ошол киши андан ант* беришин талап кылса, анан ант берген киши ушул үйгө келип, курмандык жайыңдын алдына турса,+
32 асмандан угуп, кулдарыңа сот жүргүз: ыймансызын айыптап, кылган ишине жараша жазала, адилин болсо актап, адилдигине жараша батаңды бер.+
33 Ысрайыл элиң көз алдыңда күнөө кыла бергени үчүн+ душмандарынан жеңилип калса, анан кайра сага кайрылып, ысмыңды даңктап,+ ушул үйдө сенден ырайым кылышыңды сурап жалбарса,+
34 асмандан ысрайыл элиңди угуп, күнөөсүн кечирип, ата-бабаларына берген жерге кайра алып келе көр.+
35 Алар сенин алдыңда күнөө кыла бергени үчүн,+ асман жабылып, жаан жаабай калганда,+ ушул жакты карап тиленип, ысмыңды даңкташса жана сен аларды жазалагандыктан, күнөө кылганын токтотушса,+
36 асмандан кулдарыңды, ысрайыл элиңди угуп, күнөөсүн кечире көр, аларга туура жолдо, жүрүшү керек болгон жолдо жүргөндү үйрөт;+ өз элиңе мураска берген жериңе жаан-чачын жаадыра көр.+
37 Алардын жеринде ачарчылык болобу+ же ысык шамал согобу, же жугуштуу оору жайылабы, жерин көк басабы,+ баарын мойсогон чегиртке каптайбы, же кайсы бир шаарын душмандар курчоого алабы, же дагы башка балээге же ооруга кабылышабы,+
38 бүт ысрайыл элиң же арасынан кимдир бирөө (себеби жүрөгүн эмне өйүп жатканын ар ким өзү жакшы билет)+ колун ушул үйдү көздөй сунуп, сенден тиленсе, ырайым кылышыңды сурап жалынса,+
39 асмандан, өзүң жашаган жайдан угуп,+ кечире көр+ жана чара көрүп, ар кимге жүргөн жолуна жараша тиешесин бер,+ анткени сен анын жүрөгүндө эмне бар экенин билесиң (ар бир адамдын жүрөгүндөгүсүн жалгыз сен гана билесиң).+
40 Ошондо алар өзүң ата-бабаларыбызга берген жерде өмүр бою сенден коркуп, сени урматтап жашашат.
41 Ошондой эле ысрайыл элиңен болбогон бөтөн жерлик бирөө сенин ысмың үчүн*+ алыскы жерден келсе
42 (себеби алар сенин улуу ысмың+ менен кудуреттүү күчүң жөнүндө угушат), анан ушул үйдү карап тиленсе,
43 асмандан, өзүң жашаган жайдан, ошол бөтөн жерликтин өтүнүчүн угуп,+ баарын аткара көр. Ошондо жер бетиндеги бардык элдер сенин ысмыңды билип, сенден ысрайыл элиң корккондой коркуп,+ мен курган ушул үйдүн сенин ысмың менен аталарын билишет.
44 Эгер элиңди кайсы бир жакка душмандары менен согушканы жөнөтсөң,+ анан элиң сен тандаган шаар тарапты,+ мен ысмыңа арнап курган үй+ тарапты карап сенден тиленсе,+ оо, Жахаба,
45 асмандан алардын тилегин, жалынычын угуп, жардам бере көр.
46 Эгер алар сенин алдыңда күнөө кылышса (анткени күнөө кылбаган киши жок),+ анан сен каарданып, аларды душмандарынын колуна салып берип, душмандары аларды алыс же жакын бир жерине туткундап кетишсе,+
47 анан элиң туткун болуп жүргөн жеринде акылына келип,+ кайра сага кайрылып,+ ошол жактан: „Биз күнөө кылдык, жаңылдык, ыймансыздык кылдык“,+— деп ырайым кылышыңды сурап жалынса,+
48 туткундап кеткен душмандарынын жеринде жүргөндө сага бүт жүрөгү,+ бүт жаны менен кайрылса, ата-бабаларына өзүң берген жерди көздөй бурулуп, өзүң тандаган шаар тарапты, мен ысмыңа арнап курган үй тарапты карап тиленсе,+
49 асмандан, өзүң жашаган жайдан,+ алардын тиленгенин, ырайым кылышыңды өтүнгөнүн угуп, жардам бере көр.
50 Элиңдин сенин алдыңда кылган күнөөсүн, кылмыштарын кечире көр. Аларга боору оорушу үчүн, туткундап кеткендердин жүрөгүн жумшарта көр+
51 (себеби алар — сенин Мисирден,+ темир эриткен мештен,+ алып чыккан элиң, энчиң+).
52 Ырайым кылышыңды тилеп жаткан кулуң менен ысрайыл элиңден көзүңдү ала көрбө,+ алар сага качан жалынышпасын*, уга көр.+
53 Анткени сен, Эгедер Теңир Жахаба, ата-бабаларыбызды Мисирден алып чыгып келатканда кызматчың Муса аркылуу убада кылгандай эле, аларды башка элдерден бөлүп алып,+ өзүңө энчи кылып алгансың».
54 Сулайман Жахабанын курмандык жайынын алдында тизелеп, колдорун асманга жайып,+ Жахабага ушулардын баарын айтып, ырайым кылышын сурап тиленгенден кийин ордунан турду.
55 Анан үнүн катуу чыгарып, бүт ысрайыл жамаатына батасын берип:
56 «Өзү убада кылгандай, ысрайыл элине бейпил жай берген Жахаба даңкталсын.+ Ал кызматчысы Муса аркылуу убада кылган жакшы нерселердин бири да аткарылбай калган жок.+
57 Жахаба Кудайыбыз ата-бабаларыбыз менен болгондой эле,+ биз менен да болсун. Ал бизди калтырбасын, таштабасын.+
58 Бизге ата-бабаларыбызга берген осуяттарын, көрсөтмөлөрүн, мыйзамдарын чын жүрөктөн аткарып,+ өз жолунда жүргөнгө түрткү берсин.
59 Жахабадан ырайым кылышын жалбарып айтып жаткан ушул сөздөрүм күнү-түнү Жахаба Кудайыбыздын эсинде болсун. Ал өзүнүн кулуна, ысрайыл элине күн сайын, канча жолу керек болсо, ошончо жолу жардам берсин.
60 Ошондо жер бетиндеги бардык элдер Жахабанын чыныгы Кудай экенин билишет.+ Андан башка Кудай жок!+
61 Ошон үчүн Жахаба Кудайыбызга бүт жүрөгүңөр менен берилип,+ бүгүнкүдөй эле мындан ары да анын көрсөтмөлөрү менен осуяттарына карманып жашагыла»,— деди.
62 Анан падыша менен бүт ысрайыл эли Жахабанын алдында аябай көп курмандык чалышты.+
63 Сулайман Жахабага арнап тынчтык курмандыгына+ 22 000 бодо мал, 120 000 кой чалды. Ошентип, падыша менен бүт ысрайыл эли Жахабанын ибадатканасынын ачылыш аземин өткөрүштү.+
64 Ошол күнү падышага бүтүндөй өрттөлчү курмандыктарды чалып, дан азыктарын, тынчтык курмандыктарынын майын Жахабага тартуу кылыш үчүн ибадаткананын алдындагы короонун ортоңку бөлүгүн ыйыктаганга туура келди. Анткени бүтүндөй өрттөлчү курмандыктар, дан азыктарынан алынып келген тартуу, тынчтык курмандыктарынын майы+ Жахабанын ибадатканасынын алдында турган жез курмандык жайына+ батпай калды.
65 Ошентип, Сулайман менен бүт ысрайылдыктар — Лебо-Хаматтан* Мисир+ жактагы өрөөнгө* чейинки жерлерден келген көп эл — той өткөрүп,+ Жахаба Кудайыбыздын алдында 7 күн, андан кийин дагы 7 күн, бардыгы болуп 14 күн майрамдашты.
66 Кийинки күнү падыша элди таратты. Алар ага батасын берип, Жахабанын өз кызматчысы Дөөтүгө жана ысрайыл элине кылган бардык жакшылыктарына+ чын жүрөктөн кубанып-шаттанып үйлөрүнө кайтышты.
Шилтемелер
^ Б15 тиркемесин кара.
^ Сөзмө-сөз: «ыйык жерден».
^ Сөзмө-сөз: «өз оозу менен убада берип, аны өз колу менен аткарган».
^ Же: «туруктуу сүйүүңө».
^ Же: «каргыш камтылган ант». Мындай ант ант берген киши антын бузса же жалган ант берсе жазаланарын билдирген.
^ Же: «сенин ысмың жөнүндө уккандыктан».
^ Же: «эмнени өтүнбөсүн».
^ Же: «Хаматтын кире беришинен».
^ Же: «сайга».
